Samuwele Wo Sungula
7 Hiloko vavanuna va le Kiriyati-yeyarimi va fika va teka Areka ya Yehovha, va yi yisa endlwini ya Abinadaba+ leyi a yi ri exintshabyanini, kutani va hlawula* n’wana wakwe Eliyazara leswaku a hlayisa Areka ya Yehovha.
2 Ku hundze nkarhi wo leha, malembe ya 20, ku sukela siku leri Areka yi teke eKiriyati-yeyarimi, kutani vanhu hinkwavo va Israyele va sungula ku lava* Yehovha.+ 3 Kutani Samuwele a byela Vaisrayele hinkwavo a ku: “Loko mi tlhelela eka Yehovha hi timbilu ta n’wina hinkwato,+ susani swikwembu swa matiko+ ni swifaniso swa Axitoreti+ exikarhi ka n’wina, mi tshembeka eka Yehovha hi ku helela, mi tirhela yena ntsena,+ kutani u ta mi ponisa evokweni ra Vafilista.”+ 4 Loko va twa sweswo, Vaisrayele va susa swifaniso swa Bali ni swa Axitoreti kutani va tirhela Yehovha ntsena.+
5 Kutani Samuwele a ku: “Hlengeletani tiko hinkwaro ra Israyele eMizpa+ leswaku ndzi ta mi khongelela eka Yehovha.”+ 6 Hiloko va hlengeletana eMizpa, kutani va ka mati va ma chululela Yehovha, va titsona swakudya hi siku rero.+ Kwalaho va ku: “Hi dyohele Yehovha.”+ Kutani Samuwele a sungula ku va muavanyisi+ wa Vaisrayele eMizpa.
7 Loko Vafilista va twa leswaku Vaisrayele va hlengeletane eMizpa, tihosi ta Vafilista+ ti famba ti ya lwa na vona. Loko Vaisrayele va swi twa, va sungula ku chava Vafilista. 8 Vaisrayele va byela Samuwele va ku: “U nga tshiki ku hi khongelela eka Yehovha Xikwembu xa hina leswaku xi hi pfuna+ ni ku hi ponisa evokweni ra Vafilista.” 9 Hiloko Samuwele a teka xinyimpfana lexa ha an’waka a endlela Yehovha gandzelo ro hisiwa;+ kutani Samuwele a kombela Yehovha leswaku a pfuna Vaisrayele, Yehovha a n’wi hlamula.+ 10 Loko Samuwele a ha endla gandzelo ro hisiwa, Vafilista va tshinela ku lwa ni Vaisrayele. Hi nkarhi wolowo Yehovha a endla leswaku ku va ni ku dzindza lokukulu+ hi siku rero eka Vafilista, A va pfilunganya,+ kutani va hluriwa emahlweni ka Israyele.+ 11 Hiloko vavanuna va Israyele va huma hi rivilo ku suka eMizpa, va hlongorisa Vafilista va va dlayetela ku ya fika edzongeni wa Beta-kara. 12 Kutani Samuwele a teka ribye+ a ri veka exikarhi ka Mizpa na Yexana, a ri thya vito ra Ebenezere,* hikuva a a ku: “Yehovha u hi pfunile ku ta fikela sweswi.”+ 13 Xisweswo Vafilista va hluriwa, a va ha tlhelanga va ta etikweni ra Israyele;+ voko ra Yehovha ri ya emahlweni ri lwa ni Vafilista masiku hinkwawo ya ku hanya ka Samuwele.+ 14 Nakambe miti leyi Vafilista a va yi tekele Vaisrayele yi tlheriseriwa eka Vaisrayele ku sukela eEkroni ku ya eGati, Vaisrayele va tlhela va kuma tiko ra vona leri a ri tekiwe hi Vafilista.
Nakambe a ku ri ni ku rhula exikarhi ka Vaisrayele ni Vaamori.+
15 Samuwele a ya emahlweni a avanyisa Vaisrayele vutomi byakwe hinkwabyo.+ 16 Lembe ni lembe a a rhendzeleka ni miti ya Bethele,+ Giligala+ na Mizpa,+ a avanyisa Vaisrayele etindhawini toleto hinkwato. 17 Kambe a a tlhelela eRhama,+ hikuva yindlu yakwe a yi ri kwalaho naswona a a avanyisa Vaisrayele a ri kwalaho. U akele Yehovha altari kwalaho.+