Tihosi Ta Vumbirhi

18 Hi lembe ra vunharhu ra ku fuma ka Hoxeya+ n’wana wa Elaha hosi ya Israyele, Hezekiya+ n’wana wa Hosi Akazi+ wa Yuda a va hosi. 2 A a ri ni malembe ya 25 loko a va hosi naswona u fume malembe ya 29 eYerusalema. Vito ra mana wakwe a ku ri Abi* n’wana wa Zakariya.+ 3 U ye emahlweni a endla leswinene emahlweni ka Yehovha,+ hilaha Davhida kokwa wakwe a endleke hakona.+ 4 Hi yena loyi a suseke tindhawu leti tlakukeke,+ a tlhela a tshovelela tiphuphu leti va ti hundzuleke swikwembu, a tsema ni mhandzi ya Axera.*+ U tlhele a fayetela ni nyoka ya koporo leyi endliweke hi Muxe;+ hikuva ku fikela nkarhi wolowo Vaisrayele a va gandzela nyoka yoleyo ya koporo, a yi vitaniwa nyoka ya xifaniso xa koporo.* 5 A a tshemba Yehovha+ Xikwembu xa Israyele; a ku vanga na hosi leyi fanaka na yena eka tihosi hinkwato ta Yuda, hambi eka leti veke kona endzhaku ka yena, kumbe leti fumeke a nga si fuma. 6 U namarhele Yehovha.+ A nga n’wi fularhelanga; u yingise swileriso leswi Yehovha a swi nyikeke Muxe. 7 Yehovha a a ri na yena. A a endla swilo hi vutlhari hinkwako laha a a ya kona. U xandzukele hosi ya Asiriya a ala ku yi tirhela.+ 8 U tlhele a hlula Vafilista+ ku ya fika eGaza ni tindhawu leti nga ekusuhi, ku suka exihondzweni xo rindza ku ya fika emutini lowu biyeriweke.

9 Hi lembe ra vumune ra ku fuma ka Hosi Hezekiya, ku nga lembe ra vunkombo ra ku fuma ka Hoxeya+ n’wana wa Elaha hosi ya Israyele, Hosi Xalmanezere wa Asiriya u tile a fika a rhendzela muti wa Samariya.+ 10 Va wu tekile+ endzhaku ka malembe manharhu; hi lembe ra vutsevu ra ku fuma ka Hezekiya, ku nga lembe ra vukaye ra ku fuma ka Hosi Hoxeya wa Israyele, Samariya wu tekiwile. 11 Hiloko hosi ya Asiriya yi teka Vaisrayele yi va yisa evuhlongeni+ eAsiriya, yi va tshamisa eHala ni le Habori enambyeni wa Gozana ni le mitini ya Vameda.+ 12 Leswi swi endleke hikwalaho ka leswi va nga n’wi yingisangiki Yehovha Xikwembu xa vona, kambe a va tshamela ku tlula ntwanano wa yena ni hinkwaswo leswi Muxe nandza wa Yehovha a va leriseke swona.+ A va yingisanga nchumu.

13 Hi lembe ra vu-14 ra ku fuma ka Hosi Hezekiya, Senakeribi hosi ya Asiriya+ u tile a ta hlasela miti hinkwayo leyi biyeriweke ya Yuda kutani a yi hlula.+ 14 Hiloko Hosi Hezekiya wa Yuda a rhumela rito eka hosi ya Asiriya eLakixi a ku: “Ndzi dyohile. U nga ndzi hlaseli, muka, ndzi ta ku nyika xin’wana ni xin’wana lexi u nga ta xi lava eka mina.” Hosi ya Asiriya yi lava titalenta* ta silivhere ta 300 ni titalenta ta nsuku ta 30 eka Hosi Hezekiya wa Yuda. 15 Kutani Hezekiya a n’wi nyika silivhere hinkwayo leyi a yi ri endlwini ya Yehovha ni leyi a yi ri endlwini ya hosi.+ 16 Hi nkarhi wolowo Hezekiya a tlhela a susa* tinyangwa ta tempele+ ya Yehovha ni timhandzi ta kona leswi Hosi Hezekiya wa Yuda a a swi nameke nsuku,+ a swi nyika hosi ya Asiriya.

17 Endzhaku ka sweswo hosi ya Asiriya yi rhuma Tartani,* Rabusarisi* na Rabuxake,* va suka eLakixi+ va ya eka Hosi Hezekiya eYerusalema+ va ri ni masocha yo tala swinene. Va ya eYerusalema kutani va fika va yima emugerhweni wa le henhla lowu nga endleleni leyi yaka ensin’wini ya muhlantswi.+ 18 Loko va fika va vitana hosi, ku hume Eliyakimi+ n’wana wa Hilkiya loyi a a hlayisa ndyangu wa hosi, Xebina+ loyi a a ri matsalana na Yowa n’wana wa Asafa mutsari wa matimu kutani va ya hlangana na vona.

19 Hiloko Rabuxake a ku eka vona: “Ndzi kombela mi ya byela Hezekiya mi ku, ‘Hosi leyikulu, hosi ya Asiriya yi ri: “Xana u tshembe yini?+ 20 U ri, ‘Ndzi tiva ku lwa nyimpi,’ kambe a wu tivi nchumu. Xana u tshembe mani lerova u kanya mbilu u ndzi pfukela?+ 21 Vona! U tshembe ku seketeriwa hi rihlanga leri, leri tshovekeke, ku nga Egipta,+ leri loko munhu a tiseketela ha rona ri nga ta nghena exandleni xakwe ri xi tlhava. Faro hosi ya Egipta u tano eka hinkwavo lava n’wi tshembaka. 22 Loko mi ku, ‘Hi tshembe Yehovha Xikwembu xa hina,’+ xana a hi yena loyi tindhawu takwe leti tlakukeke ni tialtari takwe swi susiweke hi Hezekiya,+ kasi hi hala tlhelo u byela vanhu va Yuda ni va Yerusalema a ku, ‘Mi fanele mi gandzela ealtarini leyi, leyi nga eYerusalema’?”’+ 23 Kutani ndzi kombela u bejelana ni hosi ya mina, hosi ya Asiriya: Ndzi ta ku nyika tihanci ta 2 000 ku vona loko u ta swi kota ku kuma vanhu lava nga ta ti gada.+ 24 Xana u ta swi kota ku hlula hambi ko va ndhuna yin’we leyi nga nandza lontsongo wa hosi ya mina, leswi wa ha titshegaka hi Egipta leswaku ri ku nyika makalichi ni vagadi va tihanci? 25 Xana a hi Yehovha loyi a ndzi nyikeke mpfumelelo wo hlasela ndhawu leyi ndzi yi lovisa? Yehovha u ndzi byele a ku, ‘Famba u ya hlasela tiko leri u ri lovisa.’”

26 Hiloko Eliyakimi n’wana wa Hilikiya na Xebina+ na Yowa va ku eka Rabuxake:+ “Hi kombela u vulavula ni malandza ya wena hi Xiaramu,*+ hikuva ha xi twa; u nga vulavuli na hina hi ririmi ra Vayuda hikuva lava nga ekhumbini va swi twa.”+ 27 Kambe Rabuxake a ku eka vona: “Xana hosi ya mina yi ndzi rhume ku vulavula ni hosi ya n’wina na n’wina ntsena? Xana a yi ndzi rhumanga ni le ka vanhu lava tshameke ehenhla ka khumbi, lava nga ta dya thyaka ra vona va tlhela va nwa ni mitsakamiso ya vona swin’we na n’wina?”

28 Hiloko Rabuxake a yima, a huwelela hi ririmi ra Vayuda a ku: “Twanani rito ra hosi leyikulu, hosi ya Asiriya.+ 29 Hosi yi ri, ‘Mi nga xisiwi hi Hezekiya, hikuva a nge swi koti ku mi ponisa eka mina.+ 30 Naswona mi nga pfumeli loko Hezekiya a mi kucetela ku tshemba Yehovha, a ku: “Yehovha u ta hi ponisa, hosi ya Asiriya a yi nge wu hluli muti lowu.”+ 31 Mi nga n’wi yingisi Hezekiya hikuva hosi ya Asiriya yi ri: “Endlani ku rhula na mina mi tinyiketa, kutani un’wana ni un’wana wa n’wina u ta dya emurhini wakwe wa madiriva ni le nkuweni wakwe, a nwa ni mati exihlobyeni xakwe, 32 kukondza ndzi ta ndzi mi yisa etikweni leri fanaka ni tiko ra n’wina,+ tiko ra koroni ni vhinyo leyintshwa, tiko ra xinkwa ni masimu ya madiriva, tiko ra masimu ya mitlhwari ni vulombe. Kutani mi ta hanya a mi nge fi. Mi nga n’wi yingisi Hezekiya, hikuva wa mi xisa loko a ku, ‘Yehovha u ta hi ponisa.’ 33 Xana swikwembu swa matiko laman’wana swi swi kotile ku ponisa matiko ya swona eka hosi ya Asiriya? 34 Swi kwihi swikwembu swa Hamati+ na Aripadi? Swi kwihi swikwembu swa Sefaravhayimi,+ Hena na Ivha? Xana swi swi kotile ku ponisa Samariya eka mina?+ 35 Xana xi kona xikwembu eka swikwembu hinkwaswo swa matiko lexi koteke ku ponisa vanhu va xona eka mina, lerova mi tshemba leswaku Yehovha u ta ponisa Yerusalema evokweni ra mina?”’”+

36 Kambe vanhu va miyela va ku whii, hikuva hosi a yi va lerise yi ku, “Mi nga n’wi hlamuli.”+ 37 Hiloko Eliyakimi n’wana wa Hilkiya loyi a a hlayisa ndyangu wa hosi, Xebina loyi a a ri matsalana na Yowa n’wana wa Asafa mutsari wa matimu, va ta eka Hezekiya va handzule swiambalo swa vona, va fika va n’wi byela leswi Rabuxake a swi vuleke.