Samuwele Wa Vumbirhi

4 Loko Ixi-boxeti+ n’wana wa Sawulo a twa leswaku Abinere u file eHebroni,+ a tsemeka nhlana* kutani Vaisrayele hinkwavo na vona va hela matimba. 2 A ku ri ni vavanuna vambirhi, lava a va ri tindhuna ta mavuthu ya vaphangi ya n’wana wa Sawulo: mavito ya vona a ku ri Bana na Rekabi. A va ri vana va Rimoni wa le Beroti, wa nyimba ya Benjamini. (Hikuva Beroti+ na wona a wu tekiwa wu ri wa ndyangu wa Benjamini. 3 Vanhu va le Beroti va balekele eGitayimi,+ va fika va luvela kona ku ta fikela namuntlha.)

4 Yonathani+ n’wana wa Sawulo a a ri ni n’wana loyi a lamaleke+ milenge. A a ri ni malembe ya ntlhanu loko ku fika mahungu hi ta Sawulo na Yonathani ma huma eYizriyele,+ kutani muhlayisi wakwe a n’wi tlakula a baleka, kambe loko a ri karhi a baleka a chuhile, u wise n’wana loyi a lamala. Vito rakwe a ku ri Mefiboxete.+

5 Vana va Rimoni wa le Beroti, ku nga Rekabi na Bana, va ye endlwini ya Ixi-boxeti hi nkarhi lowu a a tiwiserile hileswi dyambu a ri hisa. 6 Va nghena endlwini onge va ya teka koroni, kutani va fika va tlhava Ixi-boxeti ekhwirini; hiloko Rekabi ni makwavo Bana+ va baleka. 7 Loko va nghena endlwini, a a etlele ekamareni rakwe, va fika va n’wi tlhava va n’wi dlaya, endzhaku ka sweswo va n’wi tsema nhloko. Kutani va teka nhloko ya yena va famba vusiku hinkwabyo hi ndlela leyi yaka eAraba. 8 Va yisa nhloko ya Ixi-boxeti+ eka Davhida eHebroni, va fika va ku: “Hi leyi nhloko ya Ixi-boxeti n’wana wa Sawulo nala wa wena,+ loyi a a lava ku ku dlaya.+ Namuntlha Yehovha u rihisela hosi ya mina eka Sawulo ni vana vakwe.”

9 Kambe, Davhida a hlamula Rekabi ni makwavo Bana, vana va Rimoni wa le Beroti, a ku eka vona: “Ndza hlambanya hi Yehovha Xikwembu lexi hanyaka, loyi a ndzi poniseke emaxangwini hinkwawo,+ 10 loko munhu un’wana a tile a ta ndzi vikela a ku, ‘Sawulo u file,’+ yena a ehleketa leswaku u ndzi tisela mahungu lamanene, ndzi n’wi khomile ndzi n’wi dlaya+ eSikilaga. Yoleyo a ku ri hakelo leyi ndzi n’wi nyikeke yona. 11 Swi ta va tano ni le ka vanhu vo homboloka lava dlayeke munhu wo lulama a etlele endlwini yakwe. Xana ngati yakwe a ndzi fanelanga ndzi yi lava emavokweni ya n’wina,+ kutani ndzi mi hambanisa ni misava?” 12 Kutani Davhida a lerisa majaha leswaku ma va dlaya.+ Ma va tsema mavoko ni milenge, kutani ma va hayeka+ ekusuhi ni xidziva eHebroni. Kambe ma teka nhloko ya Ixi-boxeti ma yi lahla esirheni ra Abinere eHebroni.