Vakorinto Wa Vumbirhi

4 Hikwalaho, leswi hi nga ni ntirho lowu hikwalaho ka tintswalo leti hi kombiweke tona a hi karhali. 2 Kambe hi fularhele swilo leswi endliwaka exihundleni leswi khomisaka tingana. A hi fambi hi vukanganyisi kumbe ku soholota rito ra Xikwembu;+ kambe hi ku komba vanhu ntiyiso hi ve swikombiso leswinene eka ripfalo ra munhu un’wana ni un’wana emahlweni ka Xikwembu.+ 3 Entiyisweni, loko mahungu lamanene lawa hi ma chumayelaka ma funengetiwile, ma funengetiwile eka lava lovaka. 4 Lava nga riki vapfumeri,+ lava xikwembu xa misava leyi+ xi va dlayeke mianakanyo, leswaku ku voninga* ka mahungu lamanene lama vangamaka ha Kreste, loyi a nga xifaniso xa Xikwembu,+ ku nga va voningeli.+ 5 Hikuva a hi chumayeli hi hina, kambe hi chumayela leswaku Yesu Kreste i Hosi naswona hina hi malandza ya n’wina hikwalaho ka Yesu. 6 Hikuva Xikwembu hi xona xi nga te: “Ku vonakala a ku voninge emunyameni”+ naswona xi voninge timbilu ta hina hi ku ti voningela+ hi vutivi lebyi vangamaka bya Xikwembu, hi xikandza xa Kreste.

7 Hambiswiritano, hi ni xuma+ lexi eswibyeni swa vumba,*+ lerova matimba lama tlulaka lama tolovelekeke ma huma eka Xikwembu ku nga ri eka hina.+ 8 Hi tshikilelekile hi tindlela hinkwato kambe a hi manyiwanga lerova hi nga swi koti ni ku famba; hi pfilunganyekile kambe a hi yi pfumali hi ku helela ndlela yo huma;*+ 9 ha xanisiwa kambe a hi cukumetiwanga;+ ha tlatlalatiwa ehansi kambe a hi lovisiwi.+ 10 Hi tshama hi ri karhi hi tiyisela khombo ra ku dlayiwa ku fana na Yesu,+ leswaku vutomi bya Yesu byi vonaka ni le mirini wa hina. 11 Hikuva hina lava hanyaka hi tshamela ku langutana ni rifu+ hikwalaho ka Yesu, leswaku vutomi bya Yesu byi vonaka emirini ya hina leyi faka. 12 Kutani rifu ra tirha eka hina kambe eka n’wina ku tirha vutomi.

13 Hikwalaho ka leswi sweswi hi nga ni moya wa ripfumelo lowu fanaka ni lowu ku tsariweke leswi ha wona: “Ndzi kombise ripfumelo, hikwalaho ndzi vulavurile”;+ na hina hi kombisa ripfumelo, hikwalaho ha vulavula, 14 hi ri karhi hi swi tiva leswaku Loyi a pfuxeke Yesu, na hina u ta hi pfuxa swin’we na Yesu naswona u ta hi tisa emahlweni ka yena.+ 15 Hikuva swilo leswi hinkwaswo swi endleriwe n’wina, leswaku musa lowukulu wa Xikwembu wu ta engeteleka swinene; wa engeteleka loko vo tala va dzunisa Xikwembu hi ku xi khensa.+

16 Hikwalaho a hi heli matimba, hambiloko munhu loyi hi nga yena ehandle a hlakala, munhu loyi hi nga yena endzeni wa pfuxetiwa siku ni siku. 17 Hikuva hambileswi nhlomulo* wu nga wa nkarhinyana naswona wu nga wutsongo, wu hi tisela ku vangama lokukulu swinene ni loku nga heriki;+ 18 kutani a hi tshameli ku anakanya hi swilo leswi voniwaka kambe hi anakanya hi swilo leswi nga voniwiki.+ Hikuva swilo leswi voniwaka i swa nkarhinyana kambe swilo leswi nga voniwiki i swa hilaha ku nga heriki.