Yohane

5 Endzhaku ka sweswo, hiloko ku va ni nkhuvo+ wa Vayuda, kutani Yesu a ya eYerusalema. 2 EYerusalema eGedeni ya Tinyimpfu+ a ku ri ni ndhawu yo hlambela leyi vuriwaka Betesda hi Xiheveru, leyi nga ni makupakupa* ya ntlhanu. 3 Exikarhi ka wona a ku etlele vavabyi, lava feke matihlo, lava khwitaka ni lava lamaleke. 4* —— 5 Kambe a ku ri ni wanuna un’wana loyi a a ri ni malembe ya 38 a ri karhi a vabya. 6 Loko Yesu a vona wanuna loyi a etlele naswona a xiya leswaku se u ni malembe yo tala a ri karhi a vabya, a ku eka yena: “Xana wa swi lava ku hola?”+ 7 Wanuna loyi a n’wi hlamula a ku: “Nkulukumba, a ku na munhu loyi a ndzi pfunaka ku nghena ematini loko ma pfindlusiwa, loko ndzi lava ku nghena, un’wana wa ndzi rhangela.” 8 Yesu a ku eka yena: “Pfuka u teka sangu ra wena u famba.”+ 9 Hiloko wanuna yoloye a hola hi nkarhi wolowo kutani a teka sangu rakwe a famba.

Siku rero a ku ri Savata. 10 Hiloko Vayuda va byela wanuna loyi a horisiweke va ku: “A swi pfumeleriwi ku rhwala sangu hi Savata.”+ 11 Kambe a va hlamula a ku: “Loyi a ndzi horiseke u te, ‘Teka sangu ra wena u famba.’” 12 Va n’wi vutisa va ku: “I mani loyi a ku byeleke a ku, ‘Ri teke u famba’?” 13 Kambe wanuna yoloye a a nga swi tivi leswaku u horisiwe hi mani, hikuva Yesu a a nghene exikarhi ka ntshungu.

14 Endzhaku ka sweswo, Yesu a n’wi kuma a ri etempeleni hiloko a ku: “Vona, u horile. U nga ha tlheli u dyoha, leswaku u nga humeleriwi hi swo biha ngopfu.” 15 Kutani wanuna yoloye a famba a ya byela Vayuda leswaku u horisiwe hi Yesu. 16 Hiloko Vayuda va sungula ku karhata Yesu, hikuva a a endla swilo leswi hi Savata. 17 Kambe a va hlamula a ku: “Tata wa mina wa ha tirha ku fikela sweswi, na mina ndzi ya emahlweni ndzi tirha.”+ 18 Hi yona mhaka Vayuda a va lava ku n’wi dlaya hikuva a a tlula nawu wa Savata a tlhela a vula leswaku Xikwembu i Tata wakwe,+ a tiringanisa ni Xikwembu.+

19 Hiloko Yesu a va hlamula a ku: “Hakunene ndzi tiyisile ndzi ri eka nʼwina, N’wana a nge endli nchumu hi ku tisungulela handle ka loko a vona Tata wakwe a wu endla.+ Hikuva swilo hinkwaswo leswi Tatana a swi endlaka, N’wana na yena wa swi endla. 20 Hikuva Tatana u rhandza N’wana+ naswona u n’wi komba swilo hinkwaswo leswi a swi endlaka, naswona u ta n’wi komba mitirho leyikulu ku tlula leyi lerova mi ta hlamala.+ 21 Tanihi leswi Tatana a pfuxaka lava feke,+ kutani na yena N’wana u pfuxa lava a rhandzaka ku va pfuxa.+ 22 Hikuva Tatana a nga avanyisi munhu, kambe matimba yo endla tano u ma nyike N’wana,+ 23 leswaku hinkwavo va ta xixima N’wana hilaha va xiximaka Tatana hakona. Loyi a nga n’wi xiximiki N’wana a nga n’wi xiximi Tatana loyi a n’wi rhumeke.+ 24 Hakunene ndzi tiyisile ndzi ri eka n’wina, loyi a ndzi yingisaka a tlhela a tshemba Loyi a nga ndzi rhuma, u ta kuma vutomi lebyi nga heriki+ naswona a nge avanyisiwi kambe u ta pona rifu a kuma vutomi.+

25 “Hakunene ndzi tiyisile ndzi ri eka n’wina, nkarhi wa ta naswona se wu fikile, lowu vafi va nga ta twa rito ra N’wana wa Xikwembu, kutani lava n’wi yingiseke va ta kuma vutomi. 26 Tanihi leswi Tatana a nga ni nyiko ya vutomi,+ u nyike N’wana nyiko ya vutomi.+ 27 U n’wi nyike matimba yo avanyisa+ hikuva i N’wana wa munhu.+ 28 Mi nga hlamali, hikuva nkarhi wa ta lowu hinkwavo lava nga emasirheni va nga ta twa rito ra yena+ 29 kutani va huma, lava endleke leswinene va ta kuma vutomi, kambe lava a va endla leswo biha va ta pfukela ku avanyisiwa.+ 30 A ndzi nge endli xilo ni xin’we hi ku tisungulela. Ndzi avanyisa hi ku landza ndlela leyi ndzi lerisiwaka ha yona naswona ndzi avanyisa hi ndlela leyinene,+ hikuva a ndzi endli ku rhandza ka mina, kambe ndzi endla ku rhandza ka loyi a ndzi rhumeke.+

31 “Loko ndzi nyikela vumbhoni hi mina n’wini, vumbhoni bya mina a hi ntiyiso.+ 32 Ku ni un’wana loyi a nyikelaka vumbhoni hi mina naswona ndza swi tiva leswaku leswi a swi vulaka ha mina i ntiyiso.+ 33 Mi rhumele vanhu eka Yohane naswona leswi a mi byeleke swona hi mina i ntiyiso.+ 34 Hambiswiritano, a ndzi lavi ku fakazeriwa hi munhu, kambe ndzi vula swilo leswi leswaku mi ta ponisiwa. 35 Munhu yoloye a a fana ni rivoni leri pfurhaka ri tlhela ri voninga naswona a mi tsakile swa nkarhinyana hikwalaho ka ku vonakala kakwe.+ 36 Yohane u byele vanhu leswaku ndzi huma eka Tatana. Kambe ndzi ni vumbhoni bya nkoka lebyi kombaka leswaku ndzi rhumiwe hi Tatana. Hi yona mhaka leyi ndzi endlaka mitirho leyi Tatana a ndzi rhumeke yona.+ 37 Nakambe Tatana u vurile leswaku hi yena loyi a nga ndzi rhuma.+ A mi si tshama mi twa rito rakwe kumbe ku n’wi vona,+ 38 naswona rito rakwe a mi ri amukelanga, hikuva a mi n’wi tshembanga loyi a n’wi rhumeke.

39 “Mi kambisisa Matsalwa+ hikuva mi ehleketa leswaku mi ta kuma vutomi lebyi nga heriki hikwalaho ka wona; kasi hi wona* ma nyikelaka vumbhoni ha mina.+ 40 Kambe a mi swi lavi ku ta eka mina+ leswaku mi ta kuma vutomi. 41 A ndzi swi lavi ku dzunisiwa hi vanhu, 42 kambe ndza swi tiva leswaku a mi xi rhandzi Xikwembu. 43 Ndzi te hi vito ra Tatana, kambe a mi ndzi amukeli. Kambe loko a ku lo ta munhu un’wana hi vito ra yena n’wini, a mi ta n’wi amukela. 44 A mi nge ndzi tshembi hikuva mi tsakela ku dzunisana, a mi ku lavi ku dzuneka loku humaka eka Xikwembu lexi nga xin’we xa ntiyiso.+ 45 Mi nga ehleketi leswaku ndzi ta mi hehla eka Tatana; kambe Muxe+ loyi mi n’wi tshembaka, hi yena loyi a mi hehlaka. 46 Kahlekahle, loko a mi tshemba Muxe na mina a mi ta ndzi tshemba, hikuva u tsale ha mina.+ 47 Kambe loko mi nga swi tshembi leswi a swi tsaleke, mi ta swi tshemba njhani leswi ndzi swi vulaka?”