Tipisalema

83 U nga miyeli,+ Xikwembu xanga;

U nga miyeli kumbe u khondla mavoko, Xikwembu xanga.

 2 Hikuva languta, valala va wena va sungule mpfilumpfilu;+

Lava ku vengaka va tikukumuxa.*

 3 Va boha makungu yo kanganyisa vanhu va wena;

Va rhiya vanhu va wena lava u va rhandzaka.

 4 Va ri: “A hi yeni hi ya va herisa hinkwavo,+

Leswaku vito ra Israyele ri nga ha pfuki ri tsundzukiwile.”

 5 Va boha makungu yo biha;

Va endle ntwanano leswaku va lwa na wena+

 6 Vaedomu, Vaiximayele, Vamowabu+ ni Vahageri,+

 7 Vagebali, Vaamoni,+ Vaamaleke,

Vafilista+ ni lava tshamaka eTiri.+

 8 Vaasiriya+ na vona va va joyinile;

Va pfuna vana va Lota.+ (Selah)

 9 Va hlule hilaha u hluleke Vamidiyani hakona,+

Hilaha u endleke hakona eka Sisera na Yabini enkoveni wa Kixoni.+

10 Va lovisiwile eEni-dori;+

Va hundzuke manyoro ya misava.

11 Endla leswaku tindhuna ta vona ti fana na Orebe na Zebe+

Tihosana* ta vona a ti fane na Zeba na Salmuna,+

12 Hikuva ti te: “A hi tekeni tiko leri Xikwembu xi tshamaka eka rona.”

13 Xikwembu xanga, va endle va fana ni swilungwa leswi biwaka hi moya,+

Ku fana ni mahlanga lama hungiwaka hi moya.

14 Ku fana ni ndzilo lowu hisaka khwati,

Ku fana ni langavi leri vavulaka tintshava,+

15 Va hlongorise hi xidzedze xa wena+

U va chavisa hi moya wa wena wa matimba.+

16 Va khomise tingana,

Leswaku va ta lavisisa vito ra wena, wena Yehovha.

17 Onge va nga khomiwa hi tingana, va tshama va chuhile;

Onge va nga nyuma va lovisiwa;

18 Vanhu a va swi tive leswaku wena loyi vito ra wena ku nga Yehovha,+

Hi wena ntsena La Nge Henhlahenhla emisaveni hinkwayo.+