Hagayi
1 Hi lembe ra vumbirhi ra ku fuma ka Hosi Dariyosi, hi n’hweti ya vutsevu, hi siku ro sungula ra n’hweti, rito ra Yehovha ri fike hi muprofeta Hagayi*+ eka Zerubabele+ n’wana wa Salatiyele, ndhunankulu ya Yuda ni le ka Yoxuwa n’wana wa Yohozadaki, muprista lonkulu, ri ku:
2 “Yehovha wa mavuthu u ri, ‘Vanhu lava va ri, “A wu si fika nkarhi wa leswaku yindlu* ya Yehovha yi akiwa.”’”*+
3 Yehovha a tlhela a vulavula hi muprofeta Hagayi+ a ku: 4 “Xana i nkarhi wa leswaku mi tshama etindlwini ta n’wina leti khavisiweke hi mapulanga yo saseka, kasi yindlu ya mina i marhumbi?+ 5 Yehovha wa mavuthu u ri, ‘Anakanyisisani hi leswi mi swi endlaka. 6 Mi byale mbewu yo tala, kambe mi tshovele switsongo.+ Ma dya, kambe a mi xurhi. Ma nwa, kambe a mi kolwi. Ma ambala, kambe a nga kona la kufumelaka. Loyi a tirhaka u hoxa muholo wakwe enkwameni lowu boxekeke.’”
7 “Yehovha wa mavuthu u ri, ‘Anakanyisisani hi leswi mi swi endlaka.’
8 “‘Yanani entshaveni mi tisa timhandzi.+ Mi ndzi akela yindlu+ leswaku ndzi ta tsaka ha yona, kutani ndzi vangamisiwa,’+ ku vula Yehovha.”
9 “‘A mi langutele swo tala, kambe mi kume switsongo; loko mi swi tisa endlwini ya mina ndzi swi hunge hi moya.+ Hikwalaho ka yini?’ ku vula Yehovha wa mavuthu. ‘Hikuva yindlu ya mina i marhumbi, kasi un’wana ni un’wana wa n’wina wa yimayima a lunghisa yindlu yakwe.+ 10 Hikwalaho matilo a ma yi humesanga mberha ni misava a yi wu humesanga ntshovelo wa yona. 11 Ndzi ya emahlweni ndzi tisa dyandza emisaveni, etintshaveni, eka mavele, eka vhinyo leyintshwa, eka mafurha, eka leswi misava yi swi humesaka, evanhwini ni le ka swifuwo ni le ka mitirho hinkwayo ya n’wina.’”
12 Zerubabele+ n’wana wa Salatiyele+ na Yoxuwa n’wana wa Yohozadaki,+ muprista lonkulu ni vanhu hinkwavo va yingisa rito ra Yehovha Xikwembu xa vona ni marito ya muprofeta Hagayi, hikuva a a rhumiwe hi Yehovha Xikwembu xa vona; kutani vanhu va sungula ku chava Yehovha.
13 Hiloko Hagayi murhumiwa wa Yehovha a byela vanhu rungula leri hi ku pfumelelana ni ntirho lowu Yehovha a n’wi nyikeke wona, a ku: “‘Ndzi na n’wina,’+ ku vula Yehovha.”
14 Kutani Yehovha a susumetela*+ Zerubabele n’wana wa Salatiyele, ndhunankulu ya Yuda+ na Yoxuwa+ n’wana wa Yohozadaki, muprista lonkulu ni vanhu lavan’wana hinkwavo; hiloko va ta va sungula ku tirha endlwini ya Yehovha wa mavuthu, Xikwembu xa vona.+ 15 Leswi swi endleke hi siku ra vu-24 ra n’hweti ya vutsevu hi lembe ra vumbirhi ra ku fuma ka Hosi Dariyosi.+