Vakorinto Wo Sungula
4 Munhu u fanele a hi teka hi ri malandza ya Kreste ni valanguteri va swihundla swo kwetsima swa Xikwembu.+ 2 Emhakeni leyi, leswi languteriweke eka valanguteri hileswaku va tshembeka. 3 Kutani a ndzi chavi ku avanyisiwa hi n’wina kumbe ku avanyisiwa ehubyeni. Ku vula ntiyiso, hambi ku ri mina a ndzi tiavanyisi. 4 Hikuva a ku na nchumu lexi ndzi tivonaka nandzu eka xona. Kambe leswi a swi ndzi endli ndzi va loyi a lulameke; loyi a ndzi avanyisaka i Yehovha.*+ 5 Hikwalaho mi nga avanyisi+ ku nga si fika nkarhi lowu faneleke, kukondza Hosi yi ta. Yi ta swi humesela eku vonakaleni swilo swa munyama leswi nga xihundla naswona yi ta paluxa makungu ya timbilu ta vanhu, kutani Xikwembu xi ta bumabumela un’wana ni un’wana hi ku ya hi leswi n’wi fanelaka.+
6 Vamakwerhu, ndzi vule swilo leswi hi ku tirhisa Apolosi+ na mina tanihi swikombiso leswaku mi pfuneka, leswaku mi ta dyondza eka hina nawu lowu nge: “Namarhelani leswi tsariweke,” leswaku mi nga tikukumuxi,+ mi rhandza un’wana mi venga un’wanyana. 7 Hikuva i mani loyi a ku endlaka u hambana ni un’wana? Kahlekahle i yini lexi u nga na xona lexi u nga nyikiwangiki?+ Loko ku ri hi ku u lo nyikiwa, hikwalaho ka yini u tibuma onge a wu lo nyikiwa?
8 Xana se mi enerisekile? Xana se mi fuwile? Xana se mi sungule ku va tihosi+ hina hi nga ri kona? Hakunene ndzi navela leswaku mi va mi sungule ku va tihosi, leswaku na hina hi ta va tihosi swin’we na n’wina.+ 9 Hikuva ndzi vona onge Xikwembu xi endle leswaku hina vaapostola hi va vo hetelela tanihi vanhu lava gweviweke rifu,+ hikuva hi fana ni vanhu lava nga le ku tlangeni ka ntlangu exitejini lava hlaleriweke hi misava,+ tintsumi ni vanhu. 10 Hina hi swiphukuphuku+ hikwalaho ka Kreste kambe n’wina mi tlharihile eka Kreste; hina hi tsanile kambe n’wina mi ni matimba; n’wina ma dzunisiwa kambe hina hi khomisiwa tingana. 11 Ku ta fikela sweswi hi tshama hi ri ni ndlala+ ni torha+ ni ku pfumala swiambalo leswi eneleke* ni ku biwa*+ ni ku pfumala makaya 12 ni ku tirha hi matimba hi mavoko ya hina.+ Loko hi rhuketeriwa ha katekisa;+ loko hi xanisiwa ha tiyisela hi nga heli mbilu;+ 13 loko hi onhiwa vito hi hlamula hi ndlela yo rhula;*+ hi fana ni thyaka ra misava, tala ra swilo hinkwaswo, ku ta fikela namuntlha.
14 Swilo leswi a ndzi swi tsaleli ku mi khomisa tingana, kambe ndzi swi tsalela ku mi tsundzuxa tanihi vana va mina lava ndzi va rhandzaka. 15 Hikuva hambiloko mo va ni vakongomisi* va 10 000 eka Kreste, kahlekahle a mi na vatatana vo tala; hikuva ndzi ve tata wa n’wina eka Kreste Yesu hikwalaho ka mahungu lamanene.+ 16 Hikwalaho ndza mi kombela, ndzi tekeleleni.+ 17 Hi yona mhaka leyi ndzi rhumelaka Timotiya eka n’wina hikuva i n’wana wa mina loyi ndzi n’wi rhandzaka, loyi a tshembekaka eHosini. U ta mi tsundzuxa matirhelo* ya mina entirhweni wa Kreste Yesu,+ hilaha ndzi dyondzisaka hakona hinkwako emavandlheni hinkwawo.
18 Van’wana va tikukumuxa onge a ndzi nge ti eka n’wina. 19 Kambe ndzi ta ta ku nga ri khale loko Yehovha* a swi rhandza, kutani ndzi ta tiva matimba ya lava tikukumuxaka ku nga ri mavulavulelo ya vona. 20 Hikuva Mfumo wa Xikwembu a hi mavulavulelo ya hina kambe i matimba ya Xikwembu. 21 Xana mi lava yini? Xana ndzi fanele ku ta eka n’wina ni nkhavi+ kumbe ndzi ta hi rirhandzu ni moya wo rhula?