Vagalatiya
3 N’wina Vagalatiya vo hunguka! I mani loyi a mi kanganyiseke,+ n’wina lava hlamuseriweke swinene timhaka ta Yesu Kreste loko a beleriwa emhandzini onge hiloko swi humelele mi ri karhi mi swi vona?+ 2 Ndzi lava ku mi vutisa nchumu wun’we: Xana mi amukele moya hikwalaho ko landzela nawu kumbe hikwalaho ko va ni ripfumelo eka leswi mi swi tweke?+ 3 Xana mi hunguke hi ndlela yoleyo? Mi sungule hi ku famba hi ku pfumelelana ni moya wa Xikwembu, hikwalaho ka yini sweswi mi heta hi ku landzela ku navela ka vanhu?+ 4 Xana mi xaniseriwe swa hava? A ndzi tshembi. 5 Hikwalaho, xana loyi a mi nyikaka moya ni ku endla mitirho ya matimba+ exikarhi ka n’wina, u swi endla hikwalaho ka leswi mi landzelaka nawu kumbe hikwalaho ka ripfumelo ra n’wina eka leswi mi swi tweke? 6 Tanihi leswi Abrahama a “veke ni ripfumelo eka Yehovha* kutani a vuriwa lowo lulama hikwalaho ka sweswo.”+
7 Hakunene ma swi tiva leswaku lava nga ni ripfumelo hi vona va nga vana va Abrahama.+ 8 Hi ku tiva leswaku Xikwembu a xi ta vula leswaku vanhu vamatiko va lulamile hikwalaho ka ripfumelo, tsalwa ri vule mahungu lamanene khale eka Abrahama ri ku: “Matiko hinkwawo ma ta katekisiwa hikwalaho ka wena.”+ 9 Hikwalaho lava nga ni ripfumelo va katekisiwa swin’we na Abrahama, loyi a a ri ni ripfumelo.+
10 Hinkwavo lava titshembaka hileswi va landzelaka nawu va rhukaniwile, hikuva ku tsariwile: “A ku rhukaniwe loyi a nga endliki swilo hinkwaswo leswi tsariweke ebukwini* ya Nawu.”+ 11 Ku tlula kwalaho, swi le rivaleni leswaku eka Xikwembu a nga kona loyi a vuriwaka la lulameke hi ku yingisa nawu,+ hikuva “lowo lulama u ta hanya hikwalaho ka ripfumelo.”+ 12 Kutani Nawu a wu titsheganga hi ripfumelo. Kambe “loyi a endlaka swilo leswi u ta hanya hikwalaho ka swona.”+ 13 Kreste u hi xavile+ a hi tshunxa+ eka ndzhukano wa Nawu, yena a va ndzhukano ematshan’weni ya hina, hikuva ku tsariwile va ku: “U rhukaniwile munhu loyi a hayekiweke emhandzini.”+ 14 Leswi a swi endleriwa leswaku nkateko wa Abrahama wu ya eka matiko hi ku tirhisa Kreste Yesu+ leswaku hi ta amukela moya+ lowu tshembisiweke hikwalaho ka ripfumelo ra hina.
15 Vamakwerhu, ndzi vulavula hi xikombiso lexi vanhu va xi toloveleke: Loko ntwanano wu tiyisiwile, hambi ku ri hi munhu, a nga kona loyi a nga wu endlaka wu nga ha tirhi kumbe ku engetela swo karhi eka wona. 16 Kutani switshembiso swi vuriwe eka Abrahama ni le ka n’wana* wakwe.+ Tsalwa a ri vuli leswaku, “ni le ka vana* va wena,” onge hiloko ri vula vo tala. Kambe ri ri, “ni le ka n’wana wa wena,” ri vulavula hi un’we, ku nga Kreste.+ 17 Ku tlula kwalaho, ndzi vula leswi: Nawu lowu nga va kona endzhaku ka malembe ya 430,+ a wu endli leswaku ntwanano lowu Xikwembu xi nga wu endla khale, ku nga si va ni Nawu wu nga ha tirhi, leswaku wu herisa xitshembiso. 18 Hikuva loko ndzhaka yi titshege hi nawu, a ya ha titsheganga hi xitshembiso; kambe Xikwembu hi musa xi yi nyike Abrahama hi xitshembiso.+
19 Kutani, hikwalaho ka yini ku ve ni Nawu? Wu ve kona leswaku ku tlula ka nawu ku ta vonaka,+ kukondza ku fika n’wana*+ loyi xitshembiso xi endliweke ha yena; naswona wu tisiwe hi tintsumi+ hi voko ra muhlanganisi.+ 20 Kutani laha ku khumbekaka munhu un’we ntsena a ku laveki muhlanganisi, swi tano ni hi Xikwembu, a xi ri xoxe loko xi endla xitshembiso xexo. 21 Hikwalaho, xana Nawu wu lwisana ni switshembiso swa Xikwembu? Nikatsongo! Hikuva loko vanhu a va nyikiwe nawu lowu nga kotaka ku nyika vutomi, entiyisweni a va ta vuriwa lava lulameke hikwalaho ka nawu. 22 Kambe Tsalwa ri kombise leswaku vanhu va lawuriwa hi xidyoho, leswaku xitshembiso lexi kumiweke hi ku va ni ripfumelo eka Yesu Kreste xi nyikiwa lava kombisaka ripfumelo.
23 Hambiswiritano, loko ripfumelo ri nga si fika, a hi rindziwe hi nawu, hi lawuriwa hi wona, hi rindzele ripfumelo leri a ri ri kusuhi ni ku va kona.+ 24 Hikwalaho Nawu wu ve mukongomisi* wa hina loyi a hi yisaka eka Kreste,+ leswaku hi ta vuriwa lava lulameke hikwalaho ka ripfumelo.+ 25 Kambe leswi sweswi ripfumelo ri fikeke,+ a ha ha ri ehansi ka mukongomisi.*+
26 Kahlekahle hinkwenu mi vana va Xikwembu+ hikwalaho ka ripfumelo ra n’wina eka Kreste Yesu.+ 27 Hikuva hinkwenu ka n’wina lava khuvuriweke eka Kreste mi ambale Kreste.+ 28 A ku na Muyuda kumbe Mugriki,+ a ku na hlonga kumbe munhu loyi a tshunxekeke,+ a ku na wanuna kumbe wansati,+ hikuva hinkwenu mi ni vun’we leswi mi nga vadyondzisiwa va Kreste Yesu.+ 29 Ku tlula kwalaho, loko mi ri vadyondzisiwa va Kreste, hakunene mi vana* va Abrahama,+ vadyandzhaka+ hikwalaho ka xitshembiso.+