Samuwele Wo Sungula
15 Kutani Samuwele a byela Sawulo a ku: “Yehovha u ndzi rhume leswaku ndzi ta ku hlawula u va hosi ya vanhu vakwe, ku nga Vaisrayele;+ sweswi yingisa leswi Yehovha a swi vulaka.+ 2 Yehovha wa mavuthu u ri: ‘Ndzi ta tirihisela eka Vaamaleke hikwalaho ka leswi va swi endleke eka Vaisrayele loko va ri endleleni va suka eEgipta.+ 3 Sweswi famba u ya dlaya Vaamaleke,+ u va lovisa+ ni hinkwaswo leswi va nga na swona. U nga tshuki u va tsetselela; u fanele u va dlaya,+ wanuna ni wansati, n’wana ni ricece, nkuzi ni nyimpfu, kamela ni mbhongolo.’”+ 4 Sawulo a vitana vanhu a va hlaya eTelayimi: A ku ri ni masocha ya 200 000 lama fambaka hi milenge ni vavanuna va 10 000 va Yuda.+
5 Sawulo a famba kukondza a ya fika emutini wa Amaleke, a veka vanhu va tumbelela enkoveni. 6 Sawulo a byela Vakena+ a ku: “Sukani exikarhi ka Vaamaleke leswaku ndzi nga mi lovisi na vona.+ Hikuva mi va kombise tintswalo vanhu va Israyele+ hinkwavo loko va huma eEgipta.” Hiloko Vakena va suka exikarhi ka Vaamaleke. 7 Endzhaku ka sweswo, Sawulo a dlaya Vaamaleke+ ku suka eHavhila+ ku ya fika eXure+ ekusuhi ni le Egipta. 8 A khoma Agaga+ hosi ya Vaamaleke a ha hanya, kambe vanhu lavan’wana hinkwavo a va lovisa hi banga.+ 9 Hambiswiritano, Sawulo ni vanhu va tsetselela Agaga ni swifuwo hinkwaswo leswinene swa ntlhambi wa tinyimpfu ni swa ntlhambi wa tihomu ni swifuwo swo nona, makhuna ni hinkwaswo leswi a swi ri swinene.+ A va nga lavi ku swi lovisa. Kambe nhundzu hinkwayo leyi a yi nga pfuni nchumu naswona a yi nga laviwi, va yi lovisile.
10 Kutani rito ra Yehovha ri fika eka Samuwele ri ku: 11 “Ndza tisola* hi leswi ndzi vekeke Sawulo ku va hosi, hikuva u tshike ku ndzi landzela naswona a nga ma hetisisanga marito ya mina.”+ Samuwele a karhateka swinene, a rilela Yehovha vusiku hinkwabyo.+ 12 Loko Samuwele a pfuka nimpundzu ku ya hlangana na Sawulo, Samuwele u byeriwe leswi: “Sawulo u ye eKarimeli+ naswona kwalaho u tiakele ribye ra xitsundzuxo.+ Ku suka kwalaho u rhelele a ya eGiligala.” 13 Loko Samuwele a hetelele a n’wi kumile, Sawulo u te: “Onge Yehovha a nga ku katekisa. Ndzi swi endlile leswi Yehovha a ndzi leriseke swona.” 14 Kambe Samuwele a ku: “Loko swi ri tano, se mpfumawulo lowu ndzi wu twaka wa tinyimpfu ni tihomu wu vula yini?”+ 15 Sawulo a hlamula a ku: “Ti huma eka Vaamaleke, vanhu va siye tinyimpfu letinene ni tihomu letinene emintlhambini leswaku va ta endlela Yehovha Xikwembu xa wena magandzelo; kambe leswi saleke hi swi lovisile.” 16 Hiloko Samuwele a ku eka Sawulo: “Yimanyana! Yingisa ndzi ku byela leswi Yehovha a ndzi byeleke swona tolo nivusiku.”+ A ku eka yena: “Vulavula!”
17 Samuwele a ya emahlweni a ku: “Xana a wu nga tivoni u nga pfuni nchumu+ loko u endliwa murhangeri wa tinyimba ta Israyele ni loko Yehovha a ku hlawula leswaku u va hosi ya Israyele?+ 18 Endzhaku ka sweswo Yehovha u ku rhumile a ku, ‘Famba u ya lovisa Vaamaleke lava nga vadyohi.+ Lwana na vona kukondza u va herisa.’+ 19 Hikwalaho, ha yini u nga yingisanga rito ra Yehovha? Hi makwanga u tsutsumele eka swilo leswi phangiweke,+ u endla swo biha ematihlweni ya Yehovha!”
20 Hambiswiritano, Sawulo a ku eka Samuwele: “Kambe ndzi ri yingisile rito ra Yehovha! Ndzi wu endlile ntirho lowu Yehovha a ndzi rhumeke wona, ndzi vuye na Agaga hosi ya Vaamaleke kambe Vaamaleke ndzi va lovisile.+ 21 Kambe vanhu va teke tinyimpfu ni tihomu eka leswi phangiweke, leswinene swa kona eka leswi a swi fanele swi lovisiwa, leswaku va ta endlela Yehovha Xikwembu xa wena magandzelo eGiligala.”+
22 Hiloko Samuwele a ku: “Xana Yehovha u tsakisiwa hi magandzelo yo hisiwa+ hi ndlela leyi a tsakisiwaka ha yona hi ku yingisa rito ra Yehovha? Waswivo! Ku yingisa swa antswa ku tlula ku endla gandzelo+ ni ku rhiya ndleve ku tlula ku nyikela hi mafurha+ ya makhuna; 23 hikuva ku xandzuka+ i xidyoho lexi fanaka ni ku hlahluva,+ ni ku tikurisa swa fana ni ku endla masalamusi ni ku gandzela swikwembu swa mavunwa.* Leswi u bakanyeke rito ra Yehovha,+ na yena wa ku bakanya leswaku u nga ha vi hosi.”+
24 Kutani Sawulo a ku eka Samuwele: “Ndzi dyohile hileswi ndzi nga tlula xileriso xa Yehovha ni marito ya wena hikwalaho ka ku chava vanhu ni ku yingisa leswi va swi vuleke. 25 Sweswi ndzi kombela u ndzi rivalela xidyoho xa mina, u famba na mina leswaku ndzi ya gandzela Yehovha.”+ 26 Kambe Samuwele a byela Sawulo a ku: “A ndzi nge fambi na wena hikuva u bakanye rito ra Yehovha, kutani Yehovha na yena wa ku bakanya leswaku u nga ha yi emahlweni u va hosi ya Israyele.”+ 27 Loko Samuwele a hundzuluka a lava ku famba, Sawulo a n’wi khoma hi xiambalo xakwe xo pfumala mavoko, kambe xi handzuka. 28 Kutani Samuwele a ku eka yena: “Namuntlha Yehovha u handzule vuhosi bya Israyele byi suka eka wena, u ta byi nyika warikwenu loyi a antswaka ku ku tlula.+ 29 Ku tlula kwalaho, Xikwembu lexi Tlakukeke xa Israyele+ a xi hembi+ kumbe xi cinca miehleketo ya xona, hikuva a xi fani na munhu lerova xi nga boheka ku cinca miehleketo.”+
30 Hiloko a ku: “Ndzi dyohile. Kambe ndzi kombela u nga ndzi khomisi tingana emahlweni ka vakulukumba va vanhu va ka hina ni le mahlweni ka Israyele. Famba na mina kutani ndzi ta khinsamela Yehovha Xikwembu xa wena.”+ 31 Hiloko Samuwele a famba na Sawulo, kutani Sawulo a khinsamela Yehovha. 32 Endzhaku ka sweswo Samuwele a ku: “Tisani Agaga hosi ya Vaamaleke eka mina.” Hiloko Agaga a ya a ri karhi a kanakana,* hikuva a a tibyerile a ku: ‘Kunene se ndzi pone rifu.’ 33 Hambiswiritano, Samuwele a ku: “Leswi u ririseke vavasati vo tala hi ku dlaya vana va vona hi banga, mana wa wena na yena u ta ku rila ku fana na vona.” Hiloko Samuwele a khavangela Agaga emahlweni ka Yehovha eGiligala.+
34 Endzhaku ka sweswo Samuwele a ya eRhama, kambe Sawulo a ya endlwini yakwe eGibiya wa Sawulo. 35 Samuwele u kale a fa a nga ha vonananga na Sawulo, hikuva Samuwele a a rila Sawulo.+ Hiloko Yehovha a tisola hileswi a nga endla Sawulo ku va hosi eIsrayele.+