Ezekiyele

48 “Lawa i mavito ya tinyimba ku sukela emakumu ya le n’walungwini: Xiphemu xa Dani+ xi famba etlhelo ka ndlela ya le Hetiloni ku ya eLebo-hamati*+ ku ya fika eHasara-enana, etlhelo ka ndzilakana wa Damaska hi tlhelo ra le n’walungwini, etlhelo ka Hamati;+ naswona xi sukela endzilakaneni wa le vuxeni xi ya endzilakaneni wa le vupeladyambu. 2 Xiphemu xa Axere+ xi sukela endzilakaneni wa Dani, ku sukela endzilakaneni wa le vuxeni ku ya endzilakaneni wa le vupeladyambu. 3 Xiphemu xa Neftali+ xi sukela endzilakaneni wa Axere, ku sukela endzilakaneni wa le vuxeni ku ya endzilakaneni wa le vupeladyambu. 4 Xiphemu xa Manase+ xi sukela endzilakaneni wa Neftali, ku sukela endzilakaneni wa le vuxeni ku ya endzilakaneni wa le vupeladyambu. 5 Xiphemu xa Efrayimi xi sukela endzilakaneni wa Manase,+ ku sukela endzilakaneni wa le vuxeni ku ya endzilakaneni wa le vupeladyambu. 6 Xiphemu xa Rhuveni xi sukela endzilakaneni wa Efrayimi,+ ku sukela endzilakaneni wa le vuxeni ku ya endzilakaneni wa le vupeladyambu. 7 Xiphemu xa Yuda xi sukela endzilakaneni wa Rhuveni,+ ku sukela endzilakaneni wa le vuxeni ku ya endzilakaneni wa le vupeladyambu. 8 Endzilakaneni wa Yuda, ku sukela endzilakaneni wa le vuxeni ku ya endzilakaneni wa le vupeladyambu, munyikelo lowu mi faneleke mi wu nyikela wu fanele wu va wu aname swisungunu swa 25 000*+ naswona wu fanele wu ringana ni ku leha ka swiphemu swa mindyangu leyin’wana ku sukela endzilakaneni wa le vuxeni ku ya endzilakaneni wa le vupeladyambu. Ndhawu yo kwetsima yi ta va exikarhi ka wona.

9 “Munyikelo lowu mi nga ta wu nyikela eka Yehovha wu ta leha swisungunu swa 25 000 wu anama swisungunu swa 10 000.* 10 Lowu wu ta va munyikelo wo kwetsima wa vaprista.+ Wu ta va swisungunu swa 25 000 etlhelweni ra le n’walungwini, wu va swisungunu swa 10 000 evupeladyambu, wu va swisungunu swa 10 000 evuxeni naswona wu va swisungunu swa 25 000 edzongeni. Ndhawu yo kwetsima ya Yehovha yi ta va exikarhi ka wona. 11 Wu ta va wa vaprista lava hlawuriweke eka vana va Sadoki,+ lava ndzi tirheleke naswona va nga ndzi fularhelangiki loko Vaisrayele ni Valevhi va ndzi fularhela.+ 12 Va ta kuma xiphemu xa munyikelo eka munyikelo wa tiko lowu nga nchumu wo kwetsima ngopfu, endzilakaneni wa Valevhi.

13 “Kwala tlhelo ka ndhawu ya vaprista, Valevhi va ta va ni xiphemu lexi leheke swisungunu swa 25 000 xi anama swisungunu swa 10 000. (Hinkwaxo xi ta va xi lehe swisungunu swa 25 000 xi anama swisungunu swa 10 000.) 14 A va fanelanga va xavisa, va cincisa kumbe va nyika munhu un’wana xiphemu lexi lexinene ngopfu xa ndhawu leyi, hikuva i nchumu lowu kwetsimaka eka Yehovha.

15 “Ndhawu leyi saleke leyi anameke swisungunu swa 5 000* etlhelo ka ndzilakana lowu nga swisungunu swa 25 000 yi ta tirhiseriwa swilo leswi tolovelekeke emutini,+ ku ta akiwa eka yona yi tlhela yi va madyelo ya swifuwo. Muti wu ta va exikarhi ka yona.+ 16 Leyi i mimpimo ya muti: Ndzilakana wa le n’walungwini i swisungunu swa 4 500,* ndzilakana wa le dzongeni i swisungunu swa 4 500, ndzilakana wa le vuxeni i swisungunu swa 4 500 ni ndzilakana wa le vupeladyambu i swisungunu swa 4 500. 17 Madyelo ya swifuwo ya muti lowu ma ta va swisungunu swa 250* ku ya en’walungwini, swisungunu swa 250 ku ya edzongeni, swisungunu swa 250 ku ya evuxeni na swisungunu swa 250 ku ya evupeladyambu.

18 “Xiphemu lexi saleke xi ta ringana ni munyikelo wo kwetsima hi ku leha,+ swisungunu swa 10 000 ku ya evuxeni na swisungunu swa 10 000 ku ya evupeladyambu. Xi ta ringana ni munyikelo wo kwetsima naswona leswi nga ta tshoveriwa eka xona swi ta dyiwa hi lava tirhaka emutini. 19 Lava tirhaka emutini lava humaka eka tinyimba hinkwato ta Israyele va ta rima xiphemu lexi.+

20 “Matlhelo hinkwawo ya munyikelo i swisungunu swa 25 000. Mi fanele mi wu nyikela tanihi munyikelo wo kwetsima swin’we ni ndhawu leyi nyikiweke muti.

21 “Ndhawu leyi nga ta va yi sele eka matlhelo hamambirhi ya munyikelo wo kwetsima ni ndhawu leyi nyikiweke muti yi ta va ya ndhuna.+ Yi ta va etlhelo ka mindzilakana leyi nga swisungunu swa 25 000 leyi nga evuxeni ni le vupeladyambu bya ndhawu leyi nga munyikelo. Yi ta ringana ni swiphemu leswi nga le kusuhi naswona yi ta va ya ndhuna. Munyikelo wo kwetsima ni ndhawu yo kwetsima ya tempele swi ta va exikarhi ka yona.

22 “Ndhawu ya Valevhi ni ndhawu leyi nyikiweke muti swi ta va exikarhi ka ndhawu leyi nga ya ndhuna. Ndhawu ya ndhuna yi ta va exikarhi ka ndzilakana wa Yuda+ ni ndzilakana wa Benjamini.

23 “Loko ku ri tinyimba letin’wana hinkwato, xiphemu xa Benjamini xi sukela endzilakaneni wa le vuxeni xi ya endzilakaneni wa le vupeladyambu.+ 24 Xiphemu xa Simiyoni xi sukela endzilakaneni wa Benjamini,+ ku sukela endzilakaneni wa le vuxeni ku ya endzilakaneni wa le vupeladyambu. 25 Xiphemu xa Isakara+ xi sukela endzilakaneni wa Simiyoni, ku sukela endzilakaneni wa le vuxeni ku ya endzilakaneni wa le vupeladyambu. 26 Xiphemu xa Zebuloni xi sukela endzilakaneni wa Isakara,+ ku sukela endzilakaneni wa le vuxeni ku ya endzilakaneni wa le vupeladyambu.+ 27 Xiphemu xa Gadi xi sukela endzilakaneni wa Zebuloni,+ ku sukela endzilakaneni wa le vuxeni ku ya endzilakaneni wa le vupeladyambu. 28 Ndzilakana wa le dzongeni lowu nga le ndzilakaneni wa Gadi wu ta sukela eTamari+ wu ya ematini ya Meribati-kadexi,+ ku ya fika eNkoveni*+ ni ku ya fika eLwandle Lerikulu.*

29 “Leri i tiko leri mi faneleke mi ri avela tinyimba ta Israyele tanihi ndzhaka+ naswona swiphemu swa rona swi ta va swa tona,”+ ku vula Yehovha Hosi Leyi Tlakukeke.

30 “Leti ku ta va tindhawu to huma ha tona emutini: Tlhelo ra le n’walungwini ri ta va swisungunu swa 4 500.+

31 “Tigede ta muti ti ta thyiwa mavito hi ku ya hi tinyimba ta Israyele. Eka tigede tinharhu en’walungwini, ku ni gede yin’we ya Rhuveni, gede yin’we ya Yuda ni gede yin’we ya Levhi.

32 “Tlhelo ra le vuxeni ri ta va ri lehe swisungunu swa 4 500 naswona ku ni tigede tinharhu: gede yin’we ya Yosefa, gede yin’we ya Benjamini ni gede yin’we ya Dani.

33 “Tlhelo ra le dzongeni ri ta va swisungunu swa 4 500 naswona ri ri ni tigede tinharhu: gede yin’we ya Simiyoni, gede yin’we ya Isakara ni gede yin’we ya Zebuloni.

34 “Tlhelo ra le vupeladyambu ri ta va ri lehe swisungunu swa 4 500 naswona ri ri ni tigede tinharhu: gede yin’we ya Gadi, gede yin’we ya Axere ni gede yin’we ya Neftali.

35 “Mpfhuka lowu nga kona ematlhelo hinkwawo ya muti wu ta va swisungunu swa 18 000.* Kutani vito ra muti wolowo ku sukela hi siku rero ku ya emahlweni ri ta va, Yehovha U Kwalaho.”+