Samuwele Wo Sungula
24 Hi ku hatlisa loko Sawulo a vuyile hi le ku hlongoriseni ka Vafilista, va n’wi byela va ku: “Davhida u le mananga ya Eni-gedi.”+
2 Sawulo a teka vavanuna va 3 000 lava hlawuriweke etikweni hinkwaro ra Israyele, va famba va ya lava Davhida ni vanhu vakwe emaribyeni lawa ku tshamaka timbuti ta le tintshaveni. 3 Sawulo a fika ematshangeni ya tinyimpfu lama akiweke hi maribye etlhelo ka ndlela laha a ku ri ni bako, kutani a nghena a ya tipfuna* kasi Davhida ni vanhu vakwe a va tshame endzenindzeni ka bako rero.+ 4 Kutani vanhu lava a va ri na Davhida va ku eka yena: “Leri i siku leri Yehovha a ku byelaka ha rona a ku, ‘Ndzi nyiketa nala wa wena evokweni ra wena,+ u nga n’wi endla leswi u vonaka swi ri swinene eka wena.’” Hiloko Davhida a suka a yima a nyandlamela a ya tsema xilapana eka xiambalo xa Sawulo xo pfumala mavoko. 5 Kambe endzhaku ka sweswo Davhida a sungula ku biwa hi ripfalo+ hikwalaho ka leswi a tsemeke xilapana eka xiambalo xa Sawulo xo pfumala mavoko. 6 Hiloko a byela vanhu vakwe a ku: “A hi swinene ematihlweni ya Yehovha leswaku ndzi nga endla nchumu lowu eka hosi ya mina, muhlawuriwa wa Yehovha, hi ku tlakusa voko ra mina ndzi lwa na yena, hikuva i muhlawuriwa wa Yehovha.”+ 7 Davhida u pfale vanhu vakwe milomu hi marito lawa naswona a nga va pfumelelanga leswaku va hlasela Sawulo. Loko ku ri Sawulo, a huma ebakweni a famba.
8 Kutani Davhida a suka a yima a huma ebakweni a huwelela Sawulo a ku: “Hosi yanga!”+ Loko Sawulo a languta endzhaku, Davhida a khinsama, xikandza xakwe xi khumba ehansi. 9 Davhida a ku eka Sawulo: “Hikwalaho ka yini u yingisa marito ya vanhu lava nge, ‘Davhida u lava ku ku endla swo biha’?+ 10 Namuntlha u tivonele hi ya wena ndlela leyi Yehovha a ku nyiketeke ha yona evokweni ra mina ebakweni. Kambe loko un’wana a te ndzi ku dlaya,+ ndzi ku twele vusiwana ndzi ku, ‘A ndzi nge tlakusi voko ra mina ku lwa ni hosi yanga, hikuva i muhlawuriwa wa Yehovha.’+ 11 Kambe sweswi, vona tatana, ndzi khome xilapana xa xiambalo xa wena xo pfumala mavoko; hikuva loko ndzi tsema xilapana xa xiambalo xa wena xo pfumala mavoko, a ndzi ku dlayanga. Sweswi wa swi vona u tlhela u swi twisisa leswaku a ndzi tiyimiselanga ku ku endla swo biha kumbe ku ku xandzukela naswona a ndzi ku dyohelanga nchumu,+ kasi wena u le ku ndzi hloteni leswaku u ta ndzi dlaya.+ 12 Onge Yehovha a nga avanyisa exikarhi ka mina na wena+ naswona onge Yehovha a nga ndzi rihisela eka wena,+ kambe voko ra mina a ri nge lwi na wena.+ 13 Hilaha xivuriso xa khale xi nge, ‘Eka lavo homboloka ku huma swilo swo homboloka,’ kambe voko ra mina a ri nge lwi na wena. 14 Xana hosi ya Israyele yi hlongorisa mani? U hlongorisa mani? Mbyana leyi feke? Dzedze rin’we?+ 15 Onge Yehovha a nga va muavanyisi, u ta avanyisa exikarhi ka mina na wena, u ta swi vona naswona u ta kambisisa mhaka ya mina+ a ndzi avanyisa kutani a ndzi ponisa evokweni ra wena.”
16 Loko Davhida a heta ku vula marito lawa, Sawulo a ku: “Xana i rito ra wena n’wananga Davhida?”+ Kutani Sawulo a tlakusa rito a rila. 17 A ku eka Davhida: “Wena u lulame ku ndzi tlula, hikuva u ndzi endlele leswinene kambe mina ndzi ku hakele hi leswo biha.+ 18 Namuntlha u ndzi byele hi vunene lebyi u byi endleke hi ku ka u nga ndzi dlayi loko Yehovha a ndzi nyikete evokweni ra wena.+ 19 Hikuva hi wihi munhu loyi a nga hlanganaka ni nala wakwe ivi a n’wi tshika a famba a nga n’wi endlanga nchumu? Yehovha u ta ku hakela hi leswinene+ hikwalaho ka leswi u nga ndzi endlela swona namuntlha. 20 Waswivo! Sweswi ndza swi tiva leswaku u ta va hosi hakunene,+ ni leswaku mfumo wa Israyele wu ta tiya evokweni ra wena. 21 Sweswi ndzi hlambanyele hi Yehovha+ leswaku a wu nge va lovisi vatukulu va mina ni leswaku a wu nge ri herisi vito ra mina endyangwini wa tatana.”+ 22 Kutani Davhida a hlambanyela Sawulo, endzhaku ka sweswo Sawulo a muka.+ Kambe Davhida ni vanhu vakwe va tlhelela endhawini leyi swi tikaka ku yi fikelela.+