Yeremiya

32 Rito leri fikeke eka Yeremiya ri huma eka Yehovha hi lembe ra vukhume ra ku fuma ka Hosi Sedekiyasi wa le Yuda, ku nga lembe ra vu-18 ra ku fuma ka Nebukadnetsara.*+ 2 Hi nkarhi wolowo mavuthu ya hosi ya le Babilona a ma rhendzela Yerusalema naswona muprofeta Yeremiya a a pfaleriwe eXivaveni* xa Murindzi+ endlwini ya hosi ya le Yuda. 3 Hikuva Hosi Sedekiyasi wa le Yuda u n’wi pfalerile+ a ku, “Hikwalaho ka yini u profeta hi ndlela leyi? U ku, ‘Yehovha u ri: “Ndzi ta nyiketa muti lowu eka hosi ya le Babilona naswona yi ta wu teka,+ 4 kutani Hosi Sedekiyasi wa le Yuda a nge va balekeli Vakalidiya, hikuva entiyisweni u ta nyiketiwa eka hosi ya le Babilona, u ta vulavula na yona va langutanile naswona u ta yi languta ematihlweni.”’+ 5 ‘Yi ta teka Sedekiyasi yi n’wi yisa eBabilona, u ta tshama kona ku fikela loko ndzi endla xiboho hi leswi ndzi nga ta yi endla swona,’ ku vula Yehovha. ‘Hambileswi mi tshamelaka ku lwa ni Vakalidiya, a mi nge hluli.’”+

6 Yeremiya a ku: “Rito ra Yehovha ri fike eka mina ri ku, 7 ‘Hanamele n’wana wa Xalumu bavankulu* wa wena, a ku: “Tixavele nsimu ya mina leyi nga eAnathoti,+ hikuva hi wena u nga ni mfanelo yo sungula yo yi xava.”’”+

8 Hanamele n’wana wa bavankulu u te eka mina, hilaha Yehovha a vuleke hakona eXivaveni xa Murindzi, kutani a ku eka mina: “Ndzi kombela u xava nsimu ya mina leyi nga eAnathoti, etikweni ra Benjamini hikuva u ni mfanelo yo yi teka ni yo yi xava. Tixavele yona.” Hiloko ndzi swi twisisa leswaku a ku ri Yehovha loyi a a lava leswaku swi va tano.

9 Hiloko ndzi xava nsimu leyi a yi ri eAnathoti eka Hanamele n’wana wa makwavo wa tatana. Ndzi n’wi pimela mali,+ silivhere leyi tikaka 80 wa tigiramu* ni swiphemu swa khume swa silivhere. 10 Hiloko ndzi tsala papila ra vun’wini+ ndzi ri fungha, ndzi vitana timbhoni,+ kutani ndzi pima mali eswikalweni. 11 Ndzi teka papila ra vun’wini leri funghiweke hi ku ya hi xileriso ni leswi nawu a wu lava swona, ku katsa ni papila leri a ri nga funghiwanga, 12 kutani ndzi nyika Baruku+ n’wana wa Neriya+ n’wana wa Mahaseya papila ra vun’wini emahlweni ka Hanamele n’wana wa bavankulu, timbhoni leti sayineke papila ra vun’wini ni Vayuda hinkwavo lava a va tshame eXivaveni xa Murindzi.+

13 Hiloko ndzi lerisa Baruku emahlweni ka vona ndzi ku: 14 “Yehovha wa mavuthu, Xikwembu xa Israyele u ri, ‘Teka mapapila lawa ya vun’wini, papila leri ra vun’wini leri funghiweke ni papila lerin’wana ra vun’wini leri nga funghiwangiki, u ma veka endzeni ka xibya xa vumba leswaku ma ta tshama nkarhi wo leha.’ 15 Hikuva Yehovha wa mavuthu, Xikwembu xa Israyele u ri, ‘Tiyindlu, masimu ni masimu ya madiriva swi ta tlhela swi xaviwa etikweni leri.’”+

16 Endzhaku ka loko ndzi nyike Baruku n’wana wa Neriya papila ra vun’wini ndzi khongele eka Yehovha ndzi ku: 17 “Yehovha Hosi Leyi Tlakukeke! U endle matilo ni misava hi matimba ya wena lamakulu+ ni hi voko ra wena leri tshambulutiweke. A xi kona lexi nga kotekiki eka wena, 18 Loyi a kombisaka vanhu va magidi rirhandzu, kambe a xupulaka vana hikwalaho ka xihoxo xa vatata wa vona,+ Xikwembu xa ntiyiso, lonkulu ni Lowa matimba hinkwawo, loyi vito ra yena a nga Yehovha wa mavuthu. 19 U ni swikongomelo leswikulu naswona swiendlo swa wena i swa matimba,+ wena loyi matihlo ya wena ma xiyaka tindlela hinkwato ta vanhu+ leswaku u ta hakela un’wana ni un’wana hi ku ya hi tindlela takwe ni leswi a swi endlaka.+ 20 U endle swikombiso ni masingita etikweni ra Egipta, leswi tivekaka ninamuntlha naswona u tiendlele vito eIsrayele ni le xikarhi ka vanhu+ hilaha ri tivekaka hakona namuntlha. 21 U humesa vanhu va wena ku nga Vaisrayele etikweni ra Egipta, hi swikombiso, hi masingita, hi voko ra matimba, hi voko leri tshambulutiweke ni hi swiendlo leswi chavisaka.+

22 “Hi ku famba ka nkarhi u va nyike tiko leri, leri u hlambanyeke leswaku u ta ri nyika vakokwa wa vona,+ tiko leri khulukaka ntswamba ni vulombe.+ 23 Va tile va fika va ri teka kambe a va ri yingisanga rito ra wena kumbe nawu wa wena. A va swi endlanga leswi u va leriseke swona lerova u endle leswaku va weriwa hi khombo leri hinkwaro.+ 24 Waswivo! Vanhu va fike va aka makhumbi yo va pfuna ku hlasela muti+ va wu teka naswona muti wu ta tekiwa hi Vakalidiya lava lwaka na wona hikwalaho ka banga,+ ndlala ni ntungu;*+ leswi u swi vuleke swi endlekile hilaha sweswi u swi vonaka hakona. 25 Kambe Yehovha Hosi Leyi Tlakukeke u ndzi byerile u ku, ‘Tixavele nsimu hi mali kutani u vitana timbhoni,’ hambileswi entiyisweni muti wu nga ta nyiketiwa eka Vakalidiya.”

26 Hiloko Yehovha a vulavula na Yeremiya a ku: 27 “Hi mina Yehovha, Xikwembu xa vanhu hinkwavo. Xana xi kona lexi nga kotekiki eka mina? 28 Kutani Yehovha u te, ‘Ndzi nyiketa muti lowu eka Vakalidiya ni le ka Hosi Nebukadnetsara* wa le Babilona, u ta wu teka.+ 29 Vakalidiya lava lwaka ni muti lowu va ta ta va fika va lumeka muti lowu va wu hisa+ ku katsa ni tiyindlu leti emalwangwini ya tona vanhu va endlelaka Bali magandzelo ni ku chululela swikwembu swin’wana magandzelo ya swakunwa leswaku va ndzi hlundzukisa.’+

30 “‘Hikuva vanhu va le Israyele ni va le Yuda va ndzi dyoherile, ku sukela loko va ha ri vantshwa;+ vanhu va le Israyele va ya emahlweni va ndzi hlundzukisa hi swiendlo swa vona,’ ku vula Yehovha. 31 ‘Hikuva muti lowu wu ve nchumu lowu ndzi hlundzukisaka ni lowu ndzi karihisaka,+ ku sukela esikwini leri wu akiweke ha rona ku ta fikela namuntlha, kutani wu fanele wu susiwa emahlweni ka xikandza xa mina,+ 32 hikwalaho ka vubihi hinkwabyo lebyi endliweke hi vanhu va le Israyele ni va le Yuda leswaku va ndzi hlundzukisa, vona, tihosi ta vona,+ tihosana ta vona,+ vaprista va vona, vaprofeta va vona+ ni vanhu va le Yuda ni vaaki va le Yerusalema. 33 Va ye emahlweni va ndzi komba mihlana ku nga ri swikandza swa vona;+ hambileswi ndzi ringeteke ku va dyondzisa hi ku phindhaphindha,* a nga kona ni un’we wa vona loyi a nga yingisa, a amukela ndzayo.+ 34 Va veke swikwembu swa vona leswi nyenyetsaka endlwini leyi vitaniwaka hi vito ra mina, va yi thyakisa.+ 35 Ku engetela kwalaho, va ake tindhawu leti tlakukeke ta Bali eNkoveni wa N’wana wa Hinomu,*+ leswaku va hisa vana va vona va majaha ni va vanhwanyana hi ndzilo va va magandzelo ya Moleke,+ ku nga nchumu lowu ndzi nga va lerisangiki wona+ ni lowu nga si tshamaka wu ta embilwini* ya mina leswaku ndzi va kombela va endla nchumu wo tano wo nyenyetsa, lowu endlaka Yuda a dyoha.’

36 “Hikwalaho Yehovha Xikwembu xa Israyele u vula leswi hi muti lowu, lowu mi vulaka leswaku wu ta nyiketiwa eka hosi ya le Babilona hi banga, ndlala ni ntungu, 37 ‘Ndzi ta va hlengeleta ku suka ematikweni hinkwawo lawa ndzi va hangalaseke eka wona ndzi hlundzukile ni ku kariha swinene+ naswona ndzi ta va tlherisela endhawini leyi, ndzi va tshika va tshama va sirhelelekile.+ 38 Va ta va vanhu va mina kutani mina ndzi ta va Xikwembu xa vona.+ 39 Ndzi ta va nyika mbilu yin’we+ ni ndlela yin’we leswaku va ndzi chava mikarhi hinkwayo, leswaku swilo swi va fambela kahle vona ni vana va vona lava nga ta velekiwa endzhaku ka vona.+ 40 Kutani ndzi ta endla ntwanano wa hilaha ku nga heriki na vona,+ wa leswaku a ndzi nge tshiki ku va endlela swilo leswinene;+ naswona ndzi ta endla leswaku va ndzi chava etimbilwini ta vona leswaku va nga ndzi fularheli.+ 41 Ndzi ta tsakela ku va endlela swilo leswinene+ naswona ndzi ta endla leswaku va tshama etikweni leri hilaha ku nga heriki,+ hi mbilu ya mina hinkwayo ni hi matimba ya mina hinkwawo.’”

42 “Hikuva Yehovha u ri, ‘Hilaha ndzi tiseleke vanhu lava khombo leri lerikulu, ndzi ta va tisela swilo hinkwaswo leswinene leswi ndzi va tshembisaka swona.+ 43 Ku ta tlhela ku xaviwa masimu etikweni leri,+ hambileswi mi nge: “Tiko leri i rhumbi, a ku tshami munhu kumbe xiharhi naswona ri nyiketiwe eka Vakalidiya.”’

44 “‘Ku ta xaviwa masimu hi mali, ku ta tsariwa mapapila ya vun’wini ma tlhela ma funghiwa, ku ta vitaniwa timbhoni to huma etikweni ra Benjamini,+ etindhawini leti rhendzeleke Yerusalema, emitini ya Yuda,+ emitini leyi nga endhawini ya tintshava, emitini leyi nga enkoveni+ ni le mitini leyi nga le dzongeni, hikuva ndzi ta vuyisa mahlonga ya vona,’+ ku vula Yehovha.”