Samuwele Wo Sungula

19 Siku rin’wana Sawulo a byela Yonathani n’wana wakwe ni malandza yakwe hinkwawo leswaku u lava ku dlaya Davhida.+ 2 Leswi Yonathani n’wana wa Sawulo a a n’wi rhandza swinene Davhida,+ Yonathani a byela Davhida a ku: “Tata wa mina Sawulo u lava ku ku dlaya. Ndzi kombela u tivonela nimixo, u baleka u ya tumbela. 3 Ndzi ta huma ndzi ya yima ekusuhi na tatana enhoveni laha u nga ta va u ri kona. Ndzi ta vulavula hi wena eka tatana naswona loko ndzo xiya swo karhi, ndzi ta ta ndzi ta ku byela.”+

4 Hiloko Yonathani a vulavula kahle hi Davhida+ eka tata wakwe Sawulo. U te eka yena: “Hosi yi nga tshuki yi dyohela nandza wa yona Davhida hikuva a nga ku dyohelanga nchumu naswona leswi a ku endleleke swona swi ku pfunile. 5 U veke vutomi byakwe ekhombyeni leswaku a dlaya Mufilista+ lerova Yehovha a ponisa tiko hinkwaro ra Israyele hi ndlela yo hlamarisa. U swi vonile naswona a wu tsakile. Hikwalaho ka yini u fanele u dyohela ngati leyi nga riki na nandzu hi ku dlaya Davhida ku nga ri na xivangelo?”+ 6 Sawulo a yingisa Yonathani, kutani a hlambanya a ku: “Ndza hlambanya hi Yehovha Xikwembu lexi hanyaka leswaku a nge dlayiwi.” 7 Endzhaku ka sweswo Yonathani a vitana Davhida a n’wi byela swilo leswi hinkwaswo. Kutani Yonathani a tlherisela Davhida eka Sawulo, a ya emahlweni a n’wi tirhela ku fana ni le ku sunguleni.+

8 Hi ku famba ka nkarhi nyimpi yi tlhela yi tlhekeka, kutani Davhida a huma a ya lwa ni Vafilista, a dlaya vo tala kutani va baleka emahlweni ka yena.

9 Moya wo biha lowu humaka eka Yehovha wu va eka Sawulo+ loko a ha tshame endlwini yakwe, a khome tlhari loko Davhida a ri karhi a tlanga vuyimbeleri hi haripa.+ 10 Sawulo a ringeta ku tlhava Davhida hi tlhari a n’wi patsa ni khumbi, kambe Davhida a vhika, kutani Sawulo a tlhava khumbi hi tlhari. Davhida a baleka vusiku byebyo. 11 Endzhaku ka sweswo, Sawulo a rhuma vanhu leswaku va ya rindza yindlu ya Davhida leswaku va ta n’wi dlaya nimixo,+ kambe Mikala nsati wa Davhida a ku eka yena: “Loko wo ka u nga baleki vusiku lebyi, mundzuku u ta va u file.” 12 Xikan’wekan’we Mikala a humesa Davhida hi fasitere leswaku a baleka. 13 Kutani Mikala a teka xifaniso xa terafimi* a xi lata laha Davhida a etlelaka kona, a tlhela a veka ni lapi leri endliweke hi voya bya mbuti etinhlokweni, kutani a funengeta xifaniso hi nguvu.

14 Hiloko Sawulo a rhuma vanhu leswaku va landza Davhida, kambe Mikala a ku: “Wa vabya.” 15 Sawulo a tlhela a rhuma vanhu leswaku va ya vona Davhida, a ku eka vona: “N’wi tiseni eka mina hi sangu rakwe leswaku a dlayiwa.”+ 16 Loko lava rhumiweke va nghena, va kuma leswaku laha a a etlele kona a ku ri ni xifaniso xa terafimi* kasi etinhlokweni a ku ri ni lapi leri endliweke hi voya bya mbuti. 17 Sawulo a vutisa Mikala a ku: “Hikwalaho ka yini u ndzi kanganyisile hi ndlela leyi, u tshika nala wa mina+ a baleka?” Mikala a hlamula Sawulo a ku: “U ndzi byele a ku, ‘Ndzi tshiki ndzi famba handle ka swona ndzi ta ku dlaya.’”

18 Hi nkarhi wolowo Davhida a a tsutsumile a baleka, a ya fika eka Samuwele eRhama.+ U fike a n’wi byela hinkwaswo leswi Sawulo a n’wi endleke swona. Hiloko yena na Samuwele va famba, va ya tshama eNayoti.+ 19 Hi ku famba ka nkarhi, Sawulo a vikeriwa va ku: “Davhida u le Nayoti eRhama.” 20 Xikan’wekan’we Sawulo a rhuma malandza yakwe leswaku ma ya khoma Davhida. Loko malandza ma vona vakhalabye lava a va ri vaprofeta va ri karhi va profeta va rhangeriwe hi Samuwele, moya wa Xikwembu wu va ehenhla ka malandza ya Sawulo, kutani na wona ma sungula ku profeta.*

21 Loko Sawulo va n’wi byela leswi endlekeke, u rhume malandza man’wana kutani na wona ma sungula ku profeta.* Sawulo a tlhela a rhuma ntlawa wa vunharhu, na wona wu sungula ku profeta.* 22 Eku heteleleni na yena a ya eRhama. Loko a fika exihlobyeni lexikulu lexi nga eSeku, a vutisa a ku: “Samuwele na Davhida va kwihi?” Va n’wi hlamula va ku: “Va lahaya Nayoti+ eRhama.” 23 Loko Sawulo a suka kwalaho a ri endleleni yo ya eNayoti eRhama, moya wa Xikwembu wu va ehenhla ka yena, kutani a famba a ri karhi a profeta* kukondza a ya fika eNayoti eRhama. 24 U tlhele a hluvula swiambalo swakwe kutani na yena a profeta emahlweni ka Samuwele, a etlela kwalaho a nga ambalanga nchumu* siku rero hinkwaro ni vusiku bya kona. Hi yona mhaka leyi ku nga ni xivuriso lexi nge: “Xana Sawulo na yena i muprofeta?”+