Vakorinto Wa Vumbirhi
5 Hikuva ha swi tiva leswaku loko yindlu ya hina ya laha misaveni, ku nga tende leri, ro hahluka,+ hi ta kuma muako lowu humaka eka Xikwembu, ku nga yindlu leyi nga endliwangiki hi mavoko,+ leyi nga ta tshama hilaha ku nga heriki ematilweni. 2 Hikuva endlwini leyi ha konya, hi swi navela hi mbilu hinkwayo ku ambala yindlu ya hina, leyi humaka etilweni+ 3 leswaku loko hi yi ambala, hi nga kumiwi hi nga ambalanga. 4 Kahlekahle, hina lava hi nga etendeni leri ha konya, hi tshikileriwile, hikuva a hi lavi ku ri hluvula kambe hi lava ku ambala lerin’wana,+ leswaku leswi faka swi mitiwa hi vutomi.+ 5 Kutani loyi a hi lunghiseleleke sweswo i Xikwembu,+ lexi hi nyikeke moya wu va xitiyisekiso xa leswa ha taka.+
6 Hikwalaho mikarhi hinkwayo hi ni xivindzi naswona ha swi tiva leswaku loko ha ha ri ni kaya ra hina ku nga miri lowu, hi le kule ni Hosi,+ 7 hikuva hi famba hi ripfumelo ku nga ri hi ku vona. 8 Kambe hi ni xivindzi naswona hi tsakela ku hambana ni miri lowu ni ku endla kaya ra hina swin’we ni Hosi.+ 9 Hikwalaho, hambi hi swin’we ni Hosi ekaya kumbe hi le kule na yona, hi swi endla xikongomelo xa hina ku va lava amukelekaka eka yona. 10 Hikuva hinkwerhu hi fanele hi yima emahlweni ka xiluvelo xa vuavanyisi xa Kreste, leswaku un’wana ni un’wana a ta hakeriwa hi ku ya hi swilo leswi a swi endleke loko a ha ri ni miri wakwe wa nyama, swi nga ha va swi ri leswinene kumbe swo biha.*+
11 Hikwalaho, leswi hi swi tivaka leswaku swi vula yini ku chava Hosi, hi tshamela ku khorwisa vanhu kambe Xikwembu xi hi tiva kahle. Hambiswiritano, ndzi tshemba leswaku ni mapfalo ya n’wina ma hi tiva kahle. 12 A hi tlheli hi tibumabumela eka n’wina kambe hi mi nyika xivangelo xa ku tibuma hi hina, leswaku mi ta swi kota ku hlamula lava tibumaka hi leswi va nga xiswona ehandle+ ku nga ri hileswi nga embilwini. 13 Hikuva loko a hi penga,+ a hi ta va hi swi endlela Xikwembu; loko hi ehleketa kahle, hi swi endlela n’wina. 14 Hikuva rirhandzu leri Kreste a nga na rona ra hi lawula, hikuva leswi hi swona leswi hi swi twisiseke, leswaku munhu un’we u fele vanhu hinkwavo;+ xisweswo hinkwavo va file. 15 Naswona u fele hinkwavo leswaku lava hanyaka va nga ha tihanyeli,+ kambe va hanyela loyi a va feleke a tlhela a pfuxiwa.
16 Hikwalaho ku sukela sweswi a hi languti vanhu hi ku ya hi leswi va langutekisaka xiswona.+ Hambileswi van’wana va hina a hi languta Kreste hi ku ya hi leswi a ri xiswona, kambe sweswi a ha ha n’wi tivi tano.+ 17 Hikwalaho, loko munhu a ri ni vun’we na Kreste, i xivumbiwa lexintshwa;+ swilo swa khale swi hundzile; ku ni swilo leswintshwa. 18 Kambe swilo hinkwaswo swi huma eka Xikwembu, lexi endleke leswaku hi vuyelelana na xona ha Kreste+ xi tlhela xi hi nyika ntirho wo pfuna van’wana leswaku va vuyelelana na xona,+ 19 hileswaku, Xikwembu ha Kreste xi endle leswaku misava yi vuyelelana na xona,+ a xi yi hlayeli swidyoho swa yona,+ naswona xi hi nyike ntirho wo byela van’wana leswaku va nga vuyelelana na xona.+
20 Hikwalaho, hi vayimeri+ lava khomelaka Kreste,+ onge hiloko Xikwembu xi endla xikombelo ha hina. Leswi hi nga vakhomeri va Kreste ha kombela hi ri: “Vuyelelanani ni Xikwembu.” 21 Loyi a a nga ri na xidyoho+ u endliwe xidyoho* hikwalaho ka hina, leswaku ha yena hi ta va lava lulameke eka Xikwembu.+