Samuwele Wa Vumbirhi
17 Hiloko Ahitofele a ku eka Absalomu: “Ndzi kombela ku hlawula vavanuna va 12 000 leswaku ndzi ta hlongorisa Davhida vusiku bya namuntlha. 2 Ndzi ta n’wi kuma a ha karhele naswona a nga ri na matimba,+ ndzi ta n’wi chavisa; kutani vanhu lava a nga na vona va ta baleka, ivi ndzi dlaya hosi ntsena.+ 3 Xisweswo ndzi ta vuyisa vanhu lavan’wana hinkwavo eka wena. Leswaku vanhu hinkwavo va vuya eka wena swi titshege hi leswi nga ta endleka eka wanuna loyi u lavanaka na yena. Endzhaku ka sweswo vanhu hinkwavo va ta va ni ku rhula.” 4 Mhaka leyi yi tsakise Absalomu ni vakulukumba hinkwavo va Israyele.
5 Hambiswiritano, Absalomu a ku: “Ndzi kombela mi ndzi vitanela Huxayi+ wa Muariki, hi ta twa leswaku yena u ri yini.” 6 Kutani Huxayi a ta eka Absalomu. Absalomu a ku eka yena: “Ahitofele u hi nyike xitsundzuxo lexi. Xana hi fanele hi xi tirhisa xitsundzuxo xa yena? Loko u nga pfumelelani na xona hi byele leswi hi faneleke hi swi endla.” 7 Loko a twa sweswo Huxayi a ku eka Absalomu: “Xitsundzuxo xa Ahitofele a hi xinene emhakeni leyi!”+
8 Huxayi a ya emahlweni a ku: “U swi tiva kahle leswaku tata wa wena ni masocha yakwe va ni matimba+ naswona va leva ku fana ni bere leyi lahlekeriweke hi vana enhoveni.+ Ku tlula kwalaho, tata wa wena i nhenha,+ a nge etleli laha vanhu lavan’wana va etlelaka kona. 9 Sweswi hi vulavulaka u tumberile eka rin’wana ra mabakwa kumbe etindhawini tin’wana;+ loko o hi hlasela ku sungula, lava nga ta swi twa va ta ku, ‘Vaseketeri va Absalomu va hluriwile!’ 10 Hambi wanuna loyi a nga ni xivindzi ku fana ni nghala+ u ta chava, hikuva tiko hinkwaro ra Israyele ra swi tiva leswaku tata wa wena u ni matimba+ ni leswaku masocha lawa a nga na wona i tinhenha. 11 Xitsundzuxo xa mina hi lexi: Vaisrayele hinkwavo a va hlengeletiwe eka wena ku suka eDani ku ya eBera-xeba,+ va tala ku fana ni sava ra lwandle,+ kutani u fanele u va rhangela ku ya enyimpini. 12 Hi ta n’wi hlasela kun’wana ni kun’wana laha hi nga ta n’wi kuma kona, hi ta n’wi hlasela hi vuthu lerikulu ku fana ni mberha leyi welaka emisaveni; a nga kona ni un’we eka vona loyi a nga ta pona, hambi ku ri yena kumbe masocha yakwe. 13 Loko o balekela emutini a ya tumbela kona, tiko hinkwaro ra Israyele ri ta ya na tintambhu emutini wolowo, kutani hi ta wu kokela enkoveni ku fikela loko ku nga ha ri na xiribyana.”
14 Hiloko Absalomu ni vavanuna hinkwavo va Israyele va ku: “Xitsundzuxo xa Huxayi wa Muariki i xinene+ ku tlula xa Ahitofele!” Mhaka hi leswaku Yehovha a a tiyimisele ku pfilunganya xitsundzuxo xa Ahitofele,+ hambileswi a xi twala, ku endlela leswaku Yehovha a ta xupula Absalomu.+
15 Endzhaku ka sweswo, Huxayi a byela muprista Sadoki na muprista Abiyatara,+ a ku: “Leswi hi leswi Ahitofele a tsundzuxeke Absalomu ni vakulukumba va Israyele kambe mina ndzi va tsundzuxe leswi. 16 Sweswi hatlisani mi rhumela rito eka Davhida mi n’wi tsundzuxa mi ku: ‘U nga tshami etindhawini leti ku tsemakanyiwaka eka tona emananga vusiku lebyi kambe tsemakanya nambu, loko swi nga ri tano, hosi ni vanhu hinkwavo lava nga na yona va ta dlayiwa.’”*+
17 Yonathani+ na Ahimazi+ a va tshama eEni-rogele,+ kutani nandza wa xisati a ya a ya va byela hinkwaswo, ivi va ya byela Hosi Davhida hikuva a va nga lavi ku voniwa va nghena emutini. 18 Hambiswiritano, jaha rin’wana ri va vonile kutani ri ya byela Absalomu. Hiloko va baleka hi ku hatlisa, va ya fika endlwini ya wanuna un’wana eBahurimi+ loyi a a ri ni xihlovo exivaveni* xakwe. Va fike va tumbela endzeni ka xona, 19 kutani nsati wa nuna yoloye a teka xo funengeta a pfala nomu wa xihlovo, ivi a aneka mavele lama kandziweke ehenhla ka xona; a ku na loyi a yi tiva mhaka leyi. 20 Malandza ya Absalomu ma fika endlwini ya wansati loyi kutani ma ku: “Xana Ahimazi na Yonathani va kwihi?” Wansati a ku: “Va hundzele enambyeni.”+ Hiloko ma va hlota kambe a ma va kumanga, kutani ma tlhelela eYerusalema.
21 Endzhaku ka loko malandza ma fambile, va huma exihlobyeni kutani va ya eka Hosi Davhida. Va fika va ku eka yena: “Suka u yima u hatla u pela nambu, hikuva Ahitofele u nyikele xitsundzuxo lexi ku lwisana na wena.”+ 22 Hiloko Davhida ni vanhu lava a a ri na vona va hatla va pela nambu wa Yordani. Loko ri ya xa, hinkwavo ka vona se a va wu perile.
23 Loko Ahitofele a vona leswaku xitsundzuxo xakwe a xi tekeriwanga enhlokweni, a gada mbhongolo a ya endlwini yakwe emutini wa rikwavo.+ Endzhaku ka loko a nyike vandyangu wakwe swiletelo,+ a tisunga.+ U fe hi ndlela yoleyo a lahliwa exilahlweni xa vakokwa wakwe.
24 Hi nkarhi lowu fanaka, Davhida a ya eMahanayimi,+ Absalomu yena a pela nambu wa Yordani ni vavanuna hinkwavo va Israyele. 25 Absalomu a veka Amasa+ leswaku a va ndhuna ya masocha ku siva Yowabu;+ Amasa a a ri n’wana wa Itira wa Muisrayele na Abigayele+ n’wana wa Nahaxi, makwavo wa xisati wa Seruya, mana wa Yowabu. 26 Vaisrayele na Absalomu va fika va dzima matende etikweni ra Giliyadi.+
27 Hi ku hatlisa loko Davhida a fika eMahanayimi, Xobi n’wana wa Nahaxi wa le Rhaba+ etikweni ra Vaamoni, Makiri+ n’wana wa Amiyele wa le Lo-debara na Barizilayi+ Mugiliyadi loyi a humaka eRogelimi 28 va n’wi tisela masangu, swibavhana, swibya swa vumba, koroni, maxalana, mapa, mbhacha, tinyawa, swinyawana, 29 vulombe, botere, tinyimpfu ni chizi. Va tise swilo leswi hinkwaswo eka Davhida ni vanhu lava a va ri na yena leswaku va ta dya,+ hikuva va te: “Vanhu va khomiwe hi ndlala ni torha emananga naswona va karhele.”+