Filemoni

1 Hi mina Pawulo, mubohiwa+ hikwalaho ka Kreste Yesu ndzi na Timotiya+ makwerhu, eka Filemoni mutirhikulorhi loyi a rhandzekaka, 2 na Afiya makwerhu wa xisati, na Arkipo+ sochakulorhi ni vandlha leri hlanganaka endlwini ya wena:+

3 Onge mi nga va ni musa lowukulu ni ku rhula leswi humaka eka Xikwembu Tata wa hina ni le ka Hosi Yesu Kreste.

4 Ndzi khensa Xikwembu xa mina mikarhi hinkwayo loko ndzi vulavula hi wena eswikhongelweni swa mina,+ 5 hikuva ndzi twa hi ta ripfumelo ra wena ni ndlela leyi u rhandzaka Hosi Yesu ni vakwetsimi hinkwavo ha yona. 6 Ndzi khongelela leswaku ripfumelo leri wena ni vapfumerikuloni mi nga na rona onge ri nga endla u xiya mikateko hinkwayo leyi hi nga na yona ha Kreste. 7 Ndzi tsake ngopfu ni ku chaveleleka loko ndzi twa hi ta rirhandzu ra wena, hikuva timbilu ta vakwetsimi ti tiyile hikwalaho ka wena makwerhu.

8 Hikwalaho, hambileswi ndzi nga ni ntshunxeko lowukulu wo vulavula ha Kreste, wo ku lerisa leswaku u endla leswi faneleke, 9 kambe ndza ku kombela leswaku u swi endla hi rirhandzu, hikuva mina Pawulo se ndzi dyuharile naswona sweswi ndzi le khotsweni hikwalaho ka Kreste Yesu. 10 Ndzi kombelela n’wana wa mina Onesima,+ loyi ndzi veke tata wakwe+ loko ndzi ri ekhotsweni. 11 A a nga ku pfuni nchumu khale, kambe sweswi u pfuna mina na wena. 12 Ndzi n’wi tlherisela eka wena, yena loyi ndzi n’wi rhandzaka swinene.

13 A ndzi ta tsakela ku tshama na yena laha leswaku a ta ndzi tirhela hilaha a wu ta tsakela ku ndzi tirhela hakona leswi ndzi khomiweke hikwalaho ka mahungu lamanene.+ 14 Kambe a ndzi lavi ku endla nchumu u nga ndzi pfumelelanga, leswaku tintswalo ta wena u nga ti kombisi hi ku sindzisiwa, kambe hi ku swi rhandza.+ 15 Kumbexana leswi hi swona swi n’wi endleke a suka eka wena swa nkarhinyana,* leswaku a ta tlhela a va na wena hi masiku, 16 a nga ha ri hlonga+ kambe u tlula hlonga, i makwerhu loyi a rhandzekaka,+ ngopfungopfu eka mina, kambe eka wena u ta rhandzeka ku tlula sweswo hikuva u ta va hlonga tlhelo makwerhu eHosini. 17 Hikwalaho, loko u ndzi teka ndzi ri munghana wa wena, n’wi amukele hi musa hi ndlela leyi a wu ta ndzi amukela ha yona. 18 Ku tlula kwalaho, loko a ku hoxerile kumbe a ku kolota nchumu wo karhi, ndzi ta ku hakela. 19 Mina Pawulo ndzi tsala hi voko ra mina: Ndzi ta ku hakela, kambe na wena wa swi tiva leswaku u ndzi kolota ngopfu. 20 Makwerhu, onge u nga ndzi pfuna hikwalaho ka Hosi; tiyisa mbilu ya mina hikwalaho ka Kreste.

21 Ndza tshemba leswaku u ta yingisa, kutani ndzi ku tsalela hi ku tiva leswaku u ta endla swo tlula leswi ndzi swi vulaka. 22 Kambe ndzi lulamisele ni ndhawu leyi ndzi nga ta tshama eka yona, hikuva ndzi tshemba leswaku hikwalaho ka swikhongelo swa n’wina ndzi ta tlheriseriwa eka n’wina.*+

23 Epafrasi+ loyi hi khomiweke swin’we hikwalaho ka Kreste Yesu wa mi rungula, 24 na Marka, Aristako,+ Demasi+ na Luka,+ vatirhikulorhi va mi rungula.

25 Musa lowukulu wa Hosi Yesu Kreste a wu ve ni moya lowu mi wu kombisaka.