Yakobo
4 Xana tinyimpi ni timholovo leswi nga kona exikarhi ka n’wina swi huma kwihi? Xana a swi humi eka ku navela ka n’wina ka nyama loku vangaka nyimpi endzeni ka n’wina?*+ 2 Ma navela kambe a mi na nchumu. Mi tshamela ku dlaya ni ku navela kambe a mi kumi nchumu. Mi tshamela ku lwa ni ku vanga tinyimpi.+ A mi na nchumu hikuva a mi kombeli. 3 Loko mi kombela a mi kumi nchumu hikuva mi kombela hi xikongomelo lexi hoxeke, leswaku mi ta enerisa ku navela ka n’wina ka nyama.
4 N’wina lava nga tshembekiki, xana a mi swi tivi leswaku loko mi va vanghana va misava, mi valala va Xikwembu? Hikwalaho, un’wana ni un’wana loyi a lavaka ku va munghana wa misava u tiendla nala wa Xikwembu.+ 5 Kumbe, xana mi ehleketa leswaku tsalwa leri a ri vuli nchumu loko ri ku: “Moya wa mavondzo lowu nga endzeni ka hina wu tshamela ku navela swilo hinkwaswo?”+ 6 Hambiswiritano, musa lowu xi hi kombaka wona i wukulu. Hikuva tsalwa ri ri: “Xikwembu xi venga lava nga ni manyunyu+ kambe lava titsongahataka xi va komba musa lowukulu.”+
7 Hikwalaho, titsongahateni eka Xikwembu;+ kambe mi kaneta Diyavulosi+ kutani u ta baleka a suka eka n’wina.+ 8 Tshinelani eka Xikwembu, kutani xi ta tshinela eka n’wina.+ Basisani mavoko ya n’wina, n’wina vadyohi,+ mi basisa ni timbilu ta n’wina,+ n’wina lava kanakanaka. 9 Vavisekani etimbilwini, mi kolola mi rila.+ Xihleko xa n’wina a xi hundzuriwe ku kolola ni ntsako wa n’wina a wu hundzuke gome. 10 Titsongahateni eka Yehovha,*+ kutani u ta mi tlakusa.+
11 Vamakwerhu, tshikani ku hlevana.+ Loyi a hlevaka makwavo kumbe a n’wi avanyisa u sola nawu naswona u avanyisa nawu. Kutani loko u avanyisa nawu, a wu mulandzeri wa nawu kambe u muavanyisi. 12 Ku ni munhu un’we la nga Munyiki wa Nawu ni Muavanyisi,+ loyi a kotaka ku ponisa ni ku lovisa.+ Kambe wena, u mani lerova u nga avanyisa makwenu?+
13 Yingisani n’wina mi nge: “Namuntlha kumbe mundzuku hi ta ya emutini wo karhi hi ya heta lembe kona, hi ta fika hi xavisa hi kuma mali,”+ 14 kasi a mi swi tivi leswaku vutomi bya n’wina byi ta va njhani mundzuku.+ Hikuva mi fana ni hunguva leyi vaka kona swa xinkarhana ivi yi nyamalala.+ 15 Ematshan’weni ya sweswo, mi fanele mi ku: “Loko Yehovha* a swi rhandza,+ hi ta hanya, hi endla leswi kumbe leswiya.” 16 Kambe sweswi ma tinyungubyisa hi manyunyu ya n’wina. Manyunyu yo tano hinkwawo ma hombolokile. 17 Hikwalaho, loko munhu a tiva ndlela yo endla leswi lulameke kambe a nga swi endli, u endla xidyoho.+