Varhoma

11 Kutani ndza vutisa, xana Xikwembu xi fularhele vanhu va xona?+ Nikatsongo! Hikuva na mina ndzi Muisrayele, n’wana* wa Abrahama, wa ndyangu wa Benjamini. 2 Xikwembu a xi va fularhelanga vanhu va xona, lava xi va hlawuleke ku sungula.+ Xana a mi swi tivi leswi tsalwa ri swi vulaka hi Eliya, loko a rila eka Xikwembu hikwalaho ka Vaisrayele? 3 U te: “Yehovha,* va dlaye vaprofeta va wena, va cele tialtari ta wena kutani ku sale mina ntsena naswona sweswi va lava ku ndzi dlaya.”+ 4 Kambe Xikwembu xi n’wi hlamule njhani? Xi te: “Ndza ha ri ni vavanuna va 7 000 lava nga n’wi khinsamelangiki Bali.”+ 5 Kutani, swa ha ri tano ni le nkarhini wa sweswi, ku ni masalela+ lama hlawuriweke hikwalaho ka musa lowukulu. 6 Loko ku hlawuriwa loku ku ri hikwalaho ka musa lowukulu wa Xikwembu,+ swi vula leswaku a swi yi hi mitirho,+ loko a swi ya hi mitirho, musa wa xona lowukulu a wu nga ha ta va musa lowukulu.

7 Kutani hi ta ku yini? Nchumu lowu Vaisrayele a va wu lava hi mbilu hinkwayo a va wu kumanga, kambe wu kumiwe hi lava hlawuriweke.+ Lavan’wana mianakanyo ya vona yi tlanyarile,+ 8 hilaha ku tsariweke hakona: “Xikwembu xi va nyike moya wa vurhongo lebyikulu,+ xi va nyike matihlo lama nga voniki ni tindleve leti nga twiki, ku ta fikela namuntlha.”+ 9 Nakambe, Davhida u ri: “Tafula ra vona a ri ve ntlhamu, xirimbana ni xikhunguvanyiso leswaku va ta wa va xupuriwa. 10 Matihlo ya vona a ma ve ni munyama leswaku va nga voni, a va tshame va korhamile hikwalaho ka ndzhwalo wo tika.”+

11 Ndza vutisa, xana va khudlunyekile kutani va wa va nga ha pfuki? Nikatsongo! Kambe leswi va nga dyoha, vanhu vamatiko va ponisiwa kutani sweswo swi va endla va va ni mavondzo.+ 12 Kutani loko ku dyoha ka vona ku fuwisa misava naswona ku hunguteka ka vona ku fuwisa vanhu vamatiko,+ swi le rivaleni leswaku ku ta va ni mikateko yo tala loko nhlayo ya vona yi helerile!

13 Sweswi ndzi vulavula na n’wina vanhu vamatiko. Tanihi leswi ndzi nga muapostola eka vamatiko,+ ndzi teka ntirho wa mina wu ri wa nkoka swinene+ 14 leswaku kumbexana hi ndlela yo karhi ndzi endla vanhu va ka hina va va ni mavondzo leswaku van’wana va vona va ta ponisiwa. 15 Loko ku cukumetiwa+ ka vona ku pfune misava leswaku yi vuyelelana ni Xikwembu, kutani ku amukeriwa ka vona swi ta fana ni loko va pfuxiwe eku feni. 16 Ku tlula kwalaho, loko xiphemu xa mbila lexi tekiwaka xi ri mihandzu leyi wupfaka ku sungula xi kwetsima, mbila hinkwayo ya kwetsima; naswona loko rimitsu ri kwetsima ni marhavi ma kwetsima.

17 Hambiswiritano, loko marhavi man’wana ma phatluriwile emurhini, kutani wena u tlhomiwa ni marhavi lama saleke hambileswi u nga rhavi ra mutlhwari wa nhova, na wena u kuma mikateko ya rimitsu ra mutlhwari, 18 u nga ehleketi leswaku wa antswa eka marhavi laman’wana. Loko u tivona u antswa,+ tsundzuka leswaku a wu rhwalanga rimitsu kambe hi rona ri nga rhwala wena. 19 Kutani u ta ku: “Marhavi ma phatluriwile leswaku ku ta tlhomiwa mina.”+ 20 I ntiyiso! Ma phatluriwile hikwalaho ko pfumala ripfumelo,+ kambe wena u yimile hikwalaho ka ripfumelo.+ U nga titlakusi kambe tivonele. 21 Hikuva loko Xikwembu xi nga ma tsetselelanga marhavi ya ntumbuluko, na wena a xi nge ku tsetseleli. 22 Hikwalaho, anakanya hi musa wa Xikwembu+ ni ku xupula ka xona. Xikwembu xi xupula lava weke+ kambe xi va ni musa eka wena, ntsena loko u ya emahlweni u endla leswinene leswaku xi ya emahlweni xi ku komba musa, loko u nga endli tano na wena u ta tsemiwa. 23 Loko Vayuda va sungula ku va ni ripfumelo, va ta tlhela va tlhomiwa emurhini,+ hikuva Xikwembu xa swi kota ku va tlherisela. 24 Hikuva loko u tsemiwe emurhini wa mutlhwari wa nhova kutani u tlhomiwa hi ndlela leyi nga riki ya ntumbuluko emurhini wa mutlhwari wa le ntangeni, swi le rivaleni leswaku swi nga koteka ku va marhavi ya mutlhwari ya ntumbuluko ma vuyiseriwa emurhini wa wona!

25 Vamakwerhu, ndzi lava leswaku mi tiva xihundla lexi xo kwetsima+ leswaku mi nga tivoni mi tlharihile: Timbilu ta Vaisrayele van’wana ti tlanyarile, leswi swi ta va tano ku fikela loko vanhu hinkwavo vamatiko lava hlawuriweke va nghenile, 26 kutani hi ndlela leyi tiko hinkwaro ra Israyele+ ri ta ponisiwa. Hilaha swi tsariweke hakona: “Muponisi u ta huma eSiyoni,+ u ta endla leswaku Yakobo a tshika mikhuva yakwe yo homboloka. 27 Kutani lowu i ntwanano lowu ndzi nga ta wu endla na vona+ loko ndzi va rivalela swidyoho swa vona.”+ 28 I ntiyiso, i valala va Xikwembu hikuva va ale mahungu lamanene naswona n’wina ma vuyeriwa hikwalaho ka sweswo; kambe Xikwembu xi va hlawurile hikuva xa va rhandza hikwalaho ka vakokwa wa vona.+ 29 Hikuva Xikwembu a xi nge tisoli hikwalaho ka tinyiko ta xona kumbe lava xi nga va vitana. 30 Hikuva khale a mi nga xi yingisi Xikwembu,+ kambe sweswi mi kombiwe tintswalo+ hikwalaho ka leswi va nga yingisangiki,+ 31 sweswi hi vona va nga ha yingisiki naswona Xikwembu xi mi kombe tintswalo kambe na vona va nga ha kombiwa tintswalo ku fana na n’wina. 32 Hikuva hinkwavo ka vona a va yingisanga+ naswona Xikwembu xi va tshike va ri eka xiyimo xexo leswaku xi ta va komba tintswalo hinkwavo ka vona.+

33 Mawaku ku enta ka rifuwo, vutlhari ni vutivi bya Xikwembu! Vuavanyisi bya xona a byi lavisiseki ni tindlela ta xona a ti landzerisiseki! 34 Hikuva “i mani loyi a tivaka mianakanyo ya Yehovha,* kumbe i mani loyi a veke mutsundzuxi wakwe?”+ 35 Kumbe, “i mani loyi a rhangeke a n’wi nyika swo karhi, leswaku a ta tlheriseriwa swona?”+ 36 Hikuva swilo hinkwaswo swi huma eka yena, swi endliwe hi yena naswona i swa yena. A a dzunisiwe hilaha ku nga heriki. Amen.