Tikronika Ta Vumbirhi

5 Hiloko Solomoni a heta ntirho hinkwawo lowu a a fanele a wu endla endlwini ya Yehovha.+ Kutani Solomoni a nghenisa swilo leswi nyikeriweke+ hi Davhida tata wakwe, a veka silivhere, nsuku ni swibya hinkwaswo, a swi veka laha ku hlayisiwaka swilo swa nkoka endlwini ya Xikwembu xa ntiyiso.+ 2 Hi nkarhi wolowo Solomoni a hlengeleta vakulukumba va Israyele, varhangeri hinkwavo va tinyimba, tindhuna ta mindyangu ya Israyele. Va ya eYerusalema ku ya humesa areka ya ntwanano wa Yehovha eMutini wa Davhida,+ ku nga Siyoni.+ 3 Vavanuna hinkwavo va Israyele va hlengeletana emahlweni ka hosi enkhubyeni* lowu khomiwaka hi n’hweti ya vunkombo.+

4 Vakulukumba hinkwavo va Israyele va ta, kutani Valevhi va rhwala Areka.+ 5 Va rhwala Areka, tende ra nhlengeletano+ ni swibya hinkwaswo swo kwetsima leswi a swi ri etendeni. Vaprista ni Valevhi* va swi rhwala. 6 Hosi Solomoni ni Vaisrayele hinkwavo lava vitaniweke leswaku va hlangana na yena, a va ri emahlweni ka Areka. Ku endliwa magandzelo hi tinyimpfu ni tihomu to tala+ swinene lerova a swi nga hlayeki. 7 Hiloko vaprista va nghenisa areka ya ntwanano wa Yehovha endhawini ya yona, eKamareni Ro Kwetsima Ngopfu, ehansi ka timpapa ta makerubu.+ 8 Xisweswo makerubu a ma phurumule timpapa ta wona laha a ku ri ni Areka lerova ma funengeta Areka ni swikhomo+ swa yona swi nga vonaki ku suka ehenhla. 9 Swikhomo swa yona a swi lehile lerova makumu ya swona a ma vonaka loko u ri eKamareni Ro Kwetsima emahlweni ka Kamara Ro Kwetsima Ngopfu, kambe a ma nga vonaki loko u ri ehandle. Swa ha ri kwalaho ninamuntlha. 10 Endzeni ka Areka a ko va ni maribye mambirhi ya swiphepherhele, lawa Muxe a ma vekeke endzeni ka yona eHorebe,+ loko Yehovha a endla ntwanano+ ni Vaisrayele loko va huma etikweni ra Egipta.+

11 Loko vaprista va huma endhawini yo kwetsima (hikuva vaprista hinkwavo lava a va ri kona a va tibasisile+ ku nga khathariseki ntlawa lowu a va wela eka wona),+ 12 vayimbeleri+ hinkwavo va Valevhi lava a va ri va Asafa,+ va Hemani,+ va Yedutani+ ni va vana va vona ni va vamakwavo a va ambale swiambalo swa lapi ra xiyimo xa le henhla, va khome swiphambati, switende ni tiharipa; a va yime etlhelo ra le vuxeni bya altari va ri ni vaprista va 120 lava a va chaya timhalamhala.+ 13 Loko lava a va chaya timhalamhala ni vayimbeleri va sungula ku dzunisa Yehovha ni ku n’wi khensa ni loko ku ri karhi ku twakala mpfumawulo wa timhalamhala, swiphambati ni swichayachayana swa vuyimbeleri va ri karhi va dzunisa Yehovha, “hikuva hi lonene; rirhandzu rakwe lerikulu a ri heli,”+ hiloko papa ri tata yindlu, yindlu ya Yehovha.+ 14 Vaprista a va nga swi koti ku ya emahlweni va endla ntirho wa vona hikwalaho ka papa leri, hikuva ku vangama ka Yehovha a ku tate yindlu ya Xikwembu xa ntiyiso.+