Samuwele Wa Vumbirhi

11 Eku sunguleni ka lembe,* hi nkarhi lowu tihosi a ti ya enyimpini, Davhida a rhuma Yowabu ni malandza yakwe* ku katsa ni vuthu hinkwaro ra Israyele leswaku va ya lovisa Vaamoni, va fike va rhendzela muti wa Rhaba,+ kambe Davhida a a sale eYerusalema.+

2 Siku rin’wana nimadyambu* Davhida a pfuka a fambafamba ehenhla ka lwangu ra yindlu ya vuhosi. Loko a ri kwalaho u vone wansati a ri karhi a hlamba, naswona wansati yoloye a a sasekile swinene. 3 Davhida a rhuma munhu leswaku a ya vutisisa hi wansati loyi, loko a vuya u te: “Xana loyi a hi Bati-xeba+ n’wana wa Eliyamu,+ nsati wa Uriya+ wa Muheti?”+ 4 Kutani Davhida a rhuma vanhu va ya n’wi vitana.+ Loko a fika u etlele na yena.+ (Hi nkarhi wolowo Bati-xeba a ha ri eku tibasiseni eku nyameni ka yena.*)+ Endzhaku ka sweswo a tlhelela endlwini yakwe.

5 Wansati loyi a tika, kutani a rhumela rito eka Davhida a ku: “Ndzi tikile.” 6 Endzhaku ka sweswo Davhida a rhumela rito eka Yowabu, a ku: “Rhumela Uriya wa Muheti eka mina.” Kutani Yowabu a rhumela Uriya eka Davhida. 7 Loko Uriya a fika, Davhida a n’wi vutisa loko Yowabu a ha pfukile ni loko masocha ma ha pfukile, ni leswaku nyimpi a yi famba njhani. 8 Kutani Davhida a byela Uriya a ku: “Famba endlwini ya wena u ya wisa.”* Loko Uriya a sukile endlwini ya hosi, hosi yi sale yi n’wi rhumela nyiko. 9 Hambiswiritano, Uriya u etlele enyangweni ya yindlu ya hosi ni malandza laman’wana hinkwawo ya hosi yakwe, a nga yanga endlwini yakwe. 10 Kutani Davhida a byeriwa leswi: “Uriya a nga yanga endlwini yakwe.” Hiloko Davhida a ku eka Uriya: “Wa ha ku vuya hi le riendzweni. Hikwalaho ka yini u nga yanga endlwini ya wena?” 11 Uriya a hlamula Davhida a ku: “Areka+ ni vuthu ra Israyele ni ra Yuda va tshama ematendeni naswona hosi yanga Yowabu ni malandza ya hosi yanga va dzime mixaxa enhoveni. Hikwalaho ka yini mina ndzi fanele ndzi ya endlwini ya mina ndzi ya dya ni ku nwa ndzi tlhela ndzi etlela ni nsati wa mina?+ Ndza hlambanya emahlweni ka wena a ndzi nge pfuki ndzi swi endlile sweswo!”

12 Hiloko Davhida a ku eka Uriya: “Tshama laha ninamuntlha, u ta famba mundzuku.” Hikwalaho Uriya a tshama eYerusalema siku rero ni leri landzelaka. 13 Davhida a n’wi rhamba leswaku a ta dya ni ku nwa na yena, kutani a n’wi dakwisa. Kambe nimadyambu a ya etlela esangwini rakwe ni malandza ya hosi yakwe, a nga yanga endlwini yakwe. 14 Nimixo Davhida a tsalela Yowabu papila a ri nyika Uriya leswaku a famba na rona. 15 Epapileni a a tsale a ku: “Veka Uriya emahlweni laha nyimpi yi hisaka kona. Kutani mi tlhentlhela endzhaku mi n’wi siya a ri yexe leswaku a ta tlhaviwa a fa.”+

16 Yowabu a a veke muti tihlo, kutani a teka Uriya a n’wi veka laha a a swi tiva leswaku ku ni tinhenha ta masocha. 17 Loko masocha ya muti ma huma ma ya lwa na Yowabu, malandza man’wana ya Davhida ma dlayiwile, na Uriya lowa Muheti u dlayiwile.+ 18 Kutani Yowabu a rhuma munhu ku ya tivisa Davhida hinkwaswo leswi humeleleke enyimpini. 19 A n’wi lerisa a ku: “Loko u hetile ku byela hosi hinkwaswo leswi humeleleke enyimpini, 20 hosi yi nga ha kariha yi ku eka wena, ‘Hikwalaho ka yini mi lwe na vona mi ri ekusuhi ni muti? Xana a mi nga swi tivi leswaku va nga mi copa va ri ehenhla ka khumbi ra muti? 21 I mani loyi a dlayeke Abimeleke+ n’wana wa Yerubexeti?+ Xana a ku nga ri wansati loyi a n’wi hoxeke hi ribye ro sila a ri ehenhla ka khumbi ra muti kutani a fa eTebese? Hikwalaho ka yini mi tshinele ekusuhi ni khumbi ra muti?’ U ta ku, ‘Uriya nandza wa wena wa Muheti na yena u file.’”

22 Hiloko murhumiwa a famba a ya byela Davhida hinkwaswo leswi Yowabu a n’wi rhumeke swona. 23 U fike a ku: “Masocha ya vona a ma ri ni matimba ku hi tlula, ma humile ma ta lwa na hina erivaleni; kambe hi ma hlongorise ku ya fika egedeni ya muti. 24 Vacopi va miseve a va copa malandza ya wena va ri ehenhla ka khumbi ra muti naswona va dlaye malandza man’wana ya hosi; na Uriya nandza wa wena wa Muheti u file.”+ 25 Hiloko Davhida a ku eka murhumiwa: “U ta byela Yowabu u ku: ‘Mhaka leyi yi nga ku karhati, hikuva tlhari a ri hlawuli, namuntlha ri tlhava loyi, mundzuku ri tlhava luya. Yana emahlweni u lwa ni muti wolowo u wu hlula.’+ U n’wi khutaza.”

26 Loko nsati wa Uriya a twa leswaku nuna wakwe Uriya u file, a sungula ku n’wi rila. 27 Hi ku hatlisa loko nkarhi wo rila wu hela, Davhida a rhumela vanhu leswaku va n’wi landza va n’wi tisa endlwini yakwe, kutani a va nsati wakwe+ naswona u n’wi velekele n’wana wa jaha. Kambe leswi Davhida a swi endleke a swi n’wi tsakisanga nikatsongo* Yehovha.+