Samuwele Wo Sungula
13 Sawulo a a ri ni malembe ya . . .* loko a sungula ku fuma,+ u fume malembe mambirhi eIsrayele. 2 Sawulo a hlawula vavanuna va 3 000 eIsrayele; 2 000 wa vona a va ri na Sawulo eMikimaxi ni le ndhawini ya tintshava eBethele, kasi 1 000 wa vona a va ri na Yonathani+ eGibiya+ wa Benjamini. Vanhu lavan’wana hinkwavo a va tshika va famba, un’wana ni un’wana a ya etendeni rakwe. 3 Hiloko Yonathani a dlaya masocha ya Vafilista+ lawa a ma ri eGeba,+ Vafilista va swi twa. Sawulo a rhumela rito leswaku ku biwa nanga+ etikweni hinkwaro, a ku: “Vaheveru a va swi twe!” 4 Tiko hinkwaro ra Israyele ri twa mahungu lama nge: “Sawulo u dlaye masocha ya Vafilista, sweswi Vaisrayele va vengiwa hi Vafilista.” Hiloko vanhu va lerisiwa ku landzela Sawulo eGiligala.+
5 Vafilista na vona va hlengeletana leswaku va lwa ni Vaisrayele, va ri ni makalichi ya nyimpi ya 30 000 ni vagadi va tihanci va 6 000 ni masocha lama taleke ku fana ni sava ra lwandle;+ kutani va tlhandluka va dzima mixaxa eMikimaxi ku ya evuxeni bya Beta-avheni.+ 6 Hiloko vavanuna va Israyele va vona leswaku ri va xele kambirhi, hikuva a va siveleriwile; vanhu va baleka va ya tumbela emabakweni,+ emigodini, emaribyeni ni le swihlobyeni. 7 Vaheveru van’wana va kale va pela ni nambu wa Yordani va ya etikweni ra Gadi na Giliyadi.+ Kambe Sawulo a a ha ri eGiligala naswona vanhu hinkwavo lava a va n’wi landzela a vo rhurhumela kunene hi ku chava. 8 U ye emahlweni a rindza masiku ya nkombo lama vekiweke hi Samuwele, kambe Samuwele a nga tanga eGiligala naswona vanhu a va sungula ku hangalaka va siya Sawulo. 9 Eku heteleleni Sawulo a ku: “Ndzi tiseleni swifuwo swa gandzelo ro hisiwa ni swa magandzelo yo kombela ku rhula.” Hiloko a endla gandzelo ro hisiwa.+
10 Kambe hi ku hatlisa loko a heta ku endla gandzelo ro hisiwa, Samuwele a fika. Kutani Sawulo a huma a n’wi hlanganisa ni ku n’wi katekisa. 11 Hiloko Samuwele a ku: “Xana u endle yini?” Sawulo a ku: “Ndzi vone leswaku vanhu va hangalaka va ndzi siya+ na wena a wu fikanga hi nkarhi lowu vekiweke naswona Vafilista na vona a va ri karhi va hlengeletana eMikimaxi.+ 12 Hiloko ndzi tibyela ndzi ku, ‘Sweswi Vafilista va ta ta va ta lwa na mina eGiligala naswona a ndzi si kombela mpfuno eka Yehovha.’ Hikwalaho ndzi titwe ndzi boheka ku endla gandzelo ro hisiwa.”
13 Samuwele a ku eka Sawulo: “Leswi u swi endleke i vuphukuphuku. A wu xi yingisanga xileriso lexi Yehovha Xikwembu xa wena a ku nyikeke xona.+ Loko a wu xi yingisile, Yehovha a a ta va a endle vuhosi bya wena byi va kona hilaha ku nga heriki eIsrayele. 14 Kambe sweswi vuhosi bya wena a byi nge tlhaveriwi hi dyambu.+ Yehovha u ta kuma wanuna la amukelekaka embilwini yakwe,+ kutani Yehovha u ta n’wi lerisa ku fuma vanhu vakwe,+ hikuva wena a wu swi yingisanga leswi Yehovha a ku leriseke swona.”+
15 Endzhaku ka sweswo Samuwele a suka eGiligala a ya eGibiya wa Benjamini, kutani Sawulo a hlaya vanhu lava a va sele; a a sale ni vavanuna va kwalomu ka 600.+ 16 Sawulo na Yonathani n’wana wakwe ni vanhu lava a va sele na vona a va tshama eGeba+ wa Benjamini, kasi Vafilista a va dzime mixaxa eMikimaxi.+ 17 Mitlawa yinharhu ya masocha lama phangaka a yi huma enxaxeni wa Vafilista. Ntlawa wun’wana a wu famba hi ndlela leyi yaka eOfira, etikweni ra Xuwala; 18 ntlawa wun’wana a wu famba hi ndlela leyi yaka eBeta-horoni;+ kasi ntlawa wa vunharhu a wu famba hi ndlela leyi yaka endzilakaneni lowu langutaneke ni nkova wa Seboyimi, hi tlhelo ra mananga.
19 Hi nkarhi wolowo a ku nga ri na munhu loyi a a kota ku endla swilo hi nsimbhi etikweni hinkwaro ra Israyele, hikuva Vafilista a va ku: “Leswaku Vaheveru va nga swi koti ku endla banga kumbe tlhari.” 20 Vaisrayele hinkwavo a va boheka ku ya eka Vafilista loko va lava ku lota swikomu, tipiki, swihloka kumbe tisikiri.* 21 Mali ya ku lota a ku ri pimi* loko va lota swikomu, tipiki, foroko ya meno manharhu, swihloka ni ku lunghiseriwa tinhonga* to khayima swifuwo. 22 Naswona hi siku ra nyimpi a nga kona loyi a a ri ni banga kumbe tlhari eka vanhu hinkwavo lava a va ri na Sawulo na Yonathani;+ a ko va Sawulo ni n’wana wakwe Yonathani ntsena lava a va ri ni matlhari.
23 Hi nkarhi wolowo masocha ya Vafilista ma hume ma ya enkoveni wa Mikimaxi.+