Yohane

15 “Hi mina mudiriva wa ntiyiso naswona Tatana i murimi. 2 Rhavi rin’wana ni rin’wana leri nga eka mina leri nga tswaliki mihandzu wa ri susa naswona leri tswalaka mihandzu wa ri basisa, leswaku ri ta tswala mihandzu yo tala.+ 3 Se mi basile hikwalaho ka rito leri ndzi mi byeleke rona.+ 4 Tshamani mi ri ni vun’we na mina, na mina ndzi ta tshama ndzi ri ni vun’we na n’wina. Leswi rhavi ri nga ta ka ri nga swi koti ku tswala mihandzu loko ri nga ri emurhini wa madiriva, na n’wina a mi nge yi tswali mihandzu handle ka loko mi tshama mi ri ni vun’we na mina.+ 5 Hi mina mudiriva; n’wina mi marhavi. Loyi a tshamaka a ri ni vun’we na mina, na mina ndzi ri ni vun’we na yena, u tswala mihandzu yo tala;+ hikuva handle ka mina a mi nge endli nchumu. 6 Loko munhu a nga tshami a ri ni vun’we na mina, u ta fana ni rhavi leri cukumeteriwaka ehandle ivi ri oma. Kutani vanhu va hlengeleta marhavi wolawo va ma hoxa endzilweni, ma hisiwa. 7 Loko mi tshama mi ri ni vun’we na mina ni loko marito ya mina ma tshama eka n’wina, kombelani xin’wana ni xin’wana lexi mi xi lavaka kutani mi ta endleriwa xona.+ 8 Leswi mi yaka emahlweni mi tswala mihandzu yo tala ni ku kombisa leswaku mi vadyondzisiwa va mina, Tatana wa dzunisiwa hikwalaho ka sweswo.+ 9 Ndzi mi rhandzile hilaha Tatana a ndzi rhandzeke hakona;+ tikhomeni hi ndlela leyi nga ta endla leswaku ndzi tshama ndzi ri karhi ndzi mi rhandza. 10 Loko mi yingisa swileriso swa mina, ndzi ta tshama ndzi ri karhi ndzi mi rhandza, na mina ndzi yingisa swileriso swa Tatana hi yona mhaka a ndzi rhandza.

11 “Swilo leswi ndzi mi byele swona, leswaku mi ta tsaka swinene ku fana na mina.+ 12 Ndzi mi lerisa leswaku mi rhandzana hilaha ndzi mi rhandzeke hakona.+ 13 A nga kona loyi a nga ni rirhandzu ro tlula leri, lerova a kala a fela vanghana vakwe.+ 14 Mi vanghana va mina loko mi endla leswi ndzi mi lerisaka swona.+ 15 A ndza ha mi vitani malandza, hikuva nandza a nga swi tivi leswi n’wini wa yena a swi endlaka. Kambe ndzi mi vitana vanghana va mina, hikuva ndzi mi byele swilo hinkwaswo leswi Tatana a ndzi byeleke swona. 16 A hi n’wina mi ndzi hlawuleke, kambe hi mina ndzi mi hlawuleke naswona ndzi mi veke leswaku mi ya emahlweni ni ku tswala mihandzu leyi tshamaka yi ri kona, leswaku lexi mi xi kombelaka eka Tatana hi vito ra mina a mi nyika xona.+

17 “Ndzi mi byela swilo leswi, leswaku mi rhandzana.+ 18 Loko misava yi mi venga, tivani leswaku yi rhange yi venga mina yi nga si mi venga.+ 19 Loko a mi ri xiphemu xa misava, misava a yi ta mi rhandza. Kutani leswi mi nga riki xiphemu xa misava,+ kambe ndzi mi hlawuleke emisaveni, hikwalaho ka sweswo, misava ya mi venga.+ 20 Tsundzukani leswi ndzi mi byeleke swona ndzi ku: Nandza a nga n’wi tluli n’wini wakwe. Loko va ndzi xanisile, na n’wina va ta mi xanisa;+ loko va ndzi yingisile, na n’wina va ta mi yingisa. 21 Kambe va ta mi endla swilo leswi hinkwaswo hikwalaho ka vito ra mina, hikuva a va n’wi tivi Loyi a ndzi rhumeke.+ 22 Loko a ndzi nga tanga ndzi ta vulavula na vona, a va nga ta va na xidyoho.+ Kambe sweswi a va nge tiyimeleli eka xidyoho xa vona.+ 23 Loyi a ndzi vengaka u venga na Tatana.+ 24 Loko a va nga vonanga masingita lawa ndzi ma endleke lawa ku nga riki na munhu loyi a tshameke a ma endla, a va nga ta va na xidyoho;+ kambe sweswi va ndzi vonile va tlhela va ndzi venga, va venga na Tatana. 25 Kambe leswi swi endlekile leswaku ku hetiseka marito lama tsariweke eNawini wa vona, lama nge: ‘Va ndzi vengile ku nga ri na xivangelo.’+ 26 Loko ku fika mupfuni loyi ndzi nga ta mi rhumela yena a huma eka Tatana, ku nga moya lowo kwetsima lowu paluxaka ntiyiso+ lowu humaka eka Tatana, wu ta nyikela vumbhoni ha mina;+ 27 kutani na n’wina mi ta va timbhoni,+ hikuva a mi ri na mina ku sukela eku sunguleni.