Tikronika Ta Vumbirhi

20 Endzhaku ka sweswo Vamowabu+ ni Vaamoni+ ni van’wana va Vaamonimi* va ta leswaku va ta lwa na Yehoxafati. 2 Kutani Yehoxafati a kuma xiviko lexi nge: “Ku ni masocha yo tala lama nga tela ku ta ku hlasela, ma huma endhawini leyi nga ekusuhi ni lwandle,* eEdomu,+ ma le Hasasoni-tamara, ku nga Eni-gedi.”+ 3 Hiloko Yehoxafati a sungula ku chava, a endla xiboho xo lava Yehovha.+ Kutani a byela tiko hinkwaro ra Yuda leswaku ri titsona swakudya. 4 Vanhu va Yuda va hlengeletana leswaku va ta vutisa Yehovha;+ a va huma emitini hinkwayo ya Yuda ku ta vutisa Yehovha.

5 Kutani Yehoxafati a suka a yima emahlweni ka vanhu va Yuda na Yerusalema endlwini ya Yehovha emahlweni ka xivava* lexintshwa, 6 a ku:

“Yehovha Xikwembu xa vakokwa wa hina, xana a wu Xikwembu ematilweni;+ xana a wu lawuli mifumo hinkwayo ya matiko?+ U ni matimba ni ntamu, a nga kona loyi a nga ku tiyelaka.+ 7 Wena Xikwembu xa hina, xana a hi wena u nga hlongola vanhu lava a va tshama etikweni leri emahlweni ka vanhu va wena va Israyele kutani u ri nyika vatukulu va munghana wa wena Abrahama ri va ndzhaka ya hilaha ku nga heriki?+ 8 Va tshame eka rona, va ku akela yindlu leyi vangamisaka vito ra wena,+ va ku, 9 ‘Loko ho weriwa hi khombo ro karhi, ku nga ha va hi banga, ku avanyisiwa hi ndlela yo biha, ntungu kumbe ndlala, hi ta yima emahlweni ka yindlu leyi ni le mahlweni ka wena (hikuva vito ra wena ri le ndlwini leyi),+ kutani hi ku kombela leswaku u hi phula emaxangwini, onge u nga hi twa u hi ponisa.’+ 10 Hi lava vavanuna va Amoni, Mowabu ni ndhawu ya tintshava ya Seyiri,+ lava u ariseke Vaisrayele ku va hlasela loko va huma etikweni ra Egipta. Va endle tano a va va lovisanga.+ 11 Sweswi va hi khensa hi ku hi hlongola etikweni ra wena leri u hi nyikeke rona leswaku ri va ndzhaka ya hina.+ 12 Xikwembu xa hina, xana a wu nge va avanyisi?+ Hikuva a hi na matimba emahlweni ka ntshungu lowu lowukulu, lowu teke ku ta lwa na hina; naswona a ha ha tivi ta hina,+ kambe hina hi tshembe wena.”*+

13 Hi nkarhi wolowo, vanhu hinkwavo va Yuda a va yime emahlweni ka Yehovha, va ri ni vasati va vona ku katsa ni vana va vona lavatsongo ni lavakulu.

14 Kutani exikarhi ka ntshungu wolowo, moya wa Yehovha wu nghena eka Yahaziyele n’wana wa Zakariya, n’wana wa Benaya, n’wana wa Yeyiyele, n’wana wa Mataniya loyi a a ri Mulevhi wa vana va Asafa. 15 A ku: “Yingisani, n’wina tiko ra Yuda hinkwaro na n’wina vaaki va Yerusalema na wena Hosi Yehoxafati! Yehovha u ri, ‘Mi nga chavi kumbe ku chuha hikwalaho ka ntshungu lowu lowukulu, hikuva nyimpi leyi a hi ya n’wina kambe i ya Xikwembu.+ 16 Fambani mi ya lwa na vona mundzuku. Va ta famba hi ndlela ya le Sisi naswona mi ta va kuma emakumu ka nkova emahlweni ka mananga ya Yeruwele. 17 A mi nge boheki ku lwa. Yimani mi nga tsekatseki,+ mi vona ndlela leyi Yehovha a nga ta mi lwela* ha yona.+ Wena Yuda na Yerusalema, mi nga chavi kumbe ku chuha.+ Fambani mi ya lwa na vona mundzuku, Yehovha u ta va na n’wina.’”+

18 Hiloko Yehoxafati a khinsama xikandza xa yena xi languta ehansi, tiko hinkwaro ra Yuda ni vanhu va le Yerusalema va khinsama emahlweni ka Yehovha va gandzela Yehovha. 19 Kutani Valevhi lava nga vatukulu va Vakohata+ ni Vakora va suka va yima va dzunisa Yehovha Xikwembu xa Israyele hi rito leri tlakukeke.+

20 Kutani va pfuka nimpundzu swinene va ya emananga ya Tekowa.+ Loko va ri karhi va huma, Yehoxafati a suka a yima a ku: “Ndzi yingiseni, n’wina vanhu va Yuda na Yerusalema! Vanani ni ripfumelo eka Yehovha Xikwembu xa n’wina leswaku mi ta tiya. Tshembani vaprofeta+ vakwe kutani mi ta hlula.”

21 Endzhaku ka loko a vulavurisane ni vanhu, u hlawule vanhu lava nga ta yimbelelela+ Yehovha va dzunisa va ambale swiambalo swo kwetsima va rhangele masocha va ri karhi va ku: “Khensani Yehovha, hikuva rirhandzu rakwe lerikulu a ri heli.”+

22 Loko va sungula ku yimbelela va tsakile, Yehovha a va hlasela va nga swi langutelanga vavanuna va Amoni, Mowabu ni va le ndhawini ya tintshava ya Seyiri lava a va tele ku ta hlasela Yuda, hiloko va sungula ku dlayana.+ 23 Kutani Vaamoni ni Vamowabu va jikela vavanuna lava humaka endhawini ya tintshava ya Seyiri+ va va dlaya ni ku va lovisa; loko va hete ku dlaya vaaki va Seyiri, na vona va dlayanile.+

24 Kambe loko Vayuda va fika exihondzweni lexi nga le mananga,+ va languta laha ntshungu a wu ri kona, va vone mitsumbu ya vona yi lo n’walala;+ a ku nga ponanga munhu. 25 Kutani Yehoxafati ni vanhu vakwe va fika va phanga swilo swa vona, va kume swilo swo tala, swiambalo ni swilo swo saseka, va teke swilo swo tala lerova va tsandzeka ni ku swi rhwala.+ Swi va tekele masiku manharhu ku swi teketela hikuva a swi tele ngopfu. 26 Hi siku ra vumune va hlengeletane eNkoveni wa Beraka, va dzunisa Yehovha kwalaho. Hi yona mhaka leyi va nga thya ndhawu yoleyo va ku i Nkova wa Beraka,*+ ku ta fikela namuntlha.

27 Kutani vanhu hinkwavo va Yuda ni va Yerusalema va tlhelela eYerusalema va rhangeriwe hi Yehoxafati va tsakile, hikuva Yehovha u endle leswaku va tsaka hi ku hlula valala va vona.+ 28 Va fike eYerusalema va ri ni switende, tiharipa+ ni timhalamhala,+ kutani va ya endlwini ya Yehovha.+ 29 Hiloko matiko ma sungula ku chava Xikwembu loko ma twa leswaku Yehovha u hlule valala va Vaisrayele.+ 30 Hikwalaho mfumo wa Yehoxafati a wu kavanyetiwanga hi nchumu, Xikwembu xakwe xi ye emahlweni xi n’wi sirhelela eka valala va yena hinkwavo.+

31 Yehoxafati u ye emahlweni a fuma eYuda. A a ri ni malembe ya 35 loko a va hosi naswona u fume eYerusalema malembe ya 25. Vito ra mana wakwe a ku ri Azuba n’wana wa Xilihi.+ 32 U ye emahlweni a famba endleleni ya tata wakwe Asa.+ A nga hambukanga eka yona, u endle leswi lulameke emahlweni ka Yehovha.+ 33 Hambiswiritano, tindhawu leti tlakukeke a ti susiwanga+ naswona vanhu a va nga si tiyimisela ku gandzela Xikwembu xa vakokwa wa vona.+

34 Loko ku ri matimu ya Yehoxafati hinkwawo, ku sukela eku sunguleni ku ya fikela emakumu, ma tsariwe eka marito ya Yehu+ n’wana wa Hanane+ lama katsiweke eBukwini ya Tihosi ta Israyele. 35 Endzhaku ka leswi, Hosi Yehoxafati wa Yuda a endla ntwanano na Hosi Ahaziya wa Israyele, loyi a endleke swo biha.+ 36 Kutani a tirhisana na yena ku aka swikepe leswi nga ta ya eTaraxixi,+ va swi endle eEsiyoni-gebere.+ 37 Kambe, Eliyezere n’wana wa Dodavhahu wa le Marexa a profeta mayelana na Yehoxafati a ku: “Leswi u endleke ntwanano na Ahaziya, Yehovha u ta onha mitirho ya wena.”+ Hiloko swikepe swi tshoveka,+ a swa ha yanga eTaraxixi.