Vakorinto Wa Vumbirhi
1 Hi mina Pawulo, muapostola wa Kreste Yesu hi ku rhandza ka Xikwembu, ndzi na Timotiya+ makwerhu, eka vandlha ra Xikwembu ra le Korinto, ku katsa ni vakwetsimi hinkwavo lava nga etikweni hinkwaro ra Akaya:+
2 Onge mi nga va ni musa lowukulu ni ku rhula leswi humaka eka Xikwembu, Tata wa hina ni le ka Hosi Yesu Kreste.
3 A ku dzunisiwe Xikwembu tlhelo Tata wa Hosi ya hina Yesu Kreste,+ Tatana la nga ni tintswalo letikulu+ tlhelo Xikwembu xa nchavelelo hinkwawo,+ 4 lexi hi chavelelaka* emiringweni* ya hina hinkwayo,+ leswaku hi ta kota ku chavelela van’wana+ lava nga emiringweni* ya mixakaxaka hi nchavelelo lowu hi wu kumaka eka Xikwembu.+ 5 Hikuva tanihi leswi ku xanisiwa ka hina hikwalaho ka Kreste ku taleke,+ kutani nchavelelo lowu hi wu kumaka hikwalaho ka Kreste na wona wu tele. 6 Loko hi ringiwa,* swi endla leswaku mi chaveleriwa ni ku ponisiwa; naswona loko hi chaveleriwa, swi endla leswaku mi kuma nchavelelo, lowu mi pfunaka leswaku mi tiyisela ku xaniseka loku na hina hi langutanaka na kona. 7 Ha mi tshemba, hambileswi mi xanisekaka ku fana na hina, mi ta chaveleriwa ku fana na hina.+
8 Hikuva hi lava leswaku mi swi tiva vamakwerhu leswaku hi xanisiwile exifundzheni xa Asiya.+ Hi tshikileriwe ngopfu ku tlula matimba ya hina lerova a hi nga ha tshembi leswaku hi ta hanya.+ 9 Entiyisweni, a hi titwa onge hi gweviwe rifu. Kambe sweswo swi hi pfunile leswaku hi nga titshembi, hi tshemba Xikwembu+ lexi pfuxaka lava feke. 10 Xi hi ponisile eka khombo lerikulu ra rifu naswona xi ta hi ponisa, ha tshemba leswaku xi ta ya emahlweni xi hi ponisa.+ 11 Na n’wina mi nga hi pfuna hi ku hi kombelela eka Xikwembu,+ hikuva loko vanhu vo tala va hi khongelela, Xikwembu xi ta va twa ivi xi hi pfuna kutani hikwalaho ka sweswo vo tala va ta khensa.+
12 Nchumu lowu hi tibumaka ha wona hi lowu, ripfalo ra hina ri nyikela vumbhoni bya leswaku hi tikhome hi ndlela yo kwetsima emisaveni hi tlhela hi hanya hi ku tshembeka loku humaka eka Xikwembu loko hi ri ni vanhu, ngopfungopfu loko hi ri na n’wina a hi tshembanga vutlhari bya misava leyi+ kambe hi tshembe musa lowukulu wa Xikwembu. 13 A hi mi tsaleli swin’wana loko ku nga ri leswi mi nga swi hlayaka* mi tlhela mi swi twisisa, naswona ndzi tshemba leswaku mi ta swi twisisa kahle* swilo leswi, 14 hilaha van’wana va n’wina se va swi twisisaka hakona, ina, van’wana va n’wina va swi twisisa leswaku hi endla leswaku mi tibuma; hi ta tlhela hi tibuma ha n’wina hi siku ra Hosi ya hina Yesu.
15 Leswi a ndzi tiyiseka hi mhaka leyi, a ndzi tiyimisele ku ta eka n’wina ra vumbirhi leswaku mi ta tlhela mi tsaka;* 16 hikuva a ndzi tiyimisele ku mi endzela loko ndzi ya eMakedoniya, ndzi tlhela ndzi hundza hi le ka n’wina loko ndzi vuya eMakedoniya leswaku mi ta ndzi heleketa loko ndzi ya eYudiya.+ 17 Xisweswo, xana loko ndzi tiyimisela ku endla tano a ndzo tlanga? Kumbe, xana ndzi kunguhata swilo hi ku ya hi mavonelo ya vanhu, leswaku ndzi ku “Ina, ina” ivi ndzi ku “E-e, e-e”? 18 Kambe a ku tshembiwe Xikwembu leswaku leswi hi mi byelaka swona swi nga vi “ina” swi tlhela swi va “e-e.” 19 Hikuva N’wana wa Xikwembu, Yesu Kreste, loyi mina na Silvhano* na Timotiya+ hi chumayeleke ha yena exikarhi ka n’wina, a nga vanga “ina” eku sunguleni ivi endzhaku a va “e-e,” kambe u tshama a ri “ina.” 20 Hambileswi switshembiso swa Xikwembu swi nga tala ngopfu, swi ve “ina” hikwalaho ka yena.+ Hikwalaho, hi tlhela hi ku “Amen” ha yena eka Xikwembu+ leswaku hi xi dzunisa. 21 Kambe i Xikwembu lexi tiyisekisaka leswaku n’wina na hina hi va Kreste naswona hi xona xi hi hlawuleke.+ 22 Xi tlhele xi veka mfungho wa xona eka hina+ naswona xi hi nyike xitiyisekiso xa leswi nga ta ta, ku nga moya,+ etimbilwini ta hina.
23 Xikwembu i mbhoni ya mina leswaku a ndzi tanga eKorinto hikuva a ndzi nga lavi ku mi engetelela gome. 24 A ndzi vuli leswaku hi lawula ripfumelo ra n’wina,+ kambe hi vatirhikuloni leswaku mi tsaka, hikuva mi yime mi tiya hikwalaho ka ripfumelo ra n’wina.