Ezekiyele

6 “‘Kambe loko murindzi a vona banga ri ta kutani a nga yi bi nanga,+ vanhu va nga lemukisiwi, banga ri ta ri dlaya un’wana wa vona, munhu yoloye u ta fa hikwalaho ka xihoxo xa yena, kambe ngati yakwe ndzi ta yi lava eka murindzi.’*+

7 “Wena n’wana wa munhu, ndzi ku hlawule leswaku u va murindzi wa Vaisrayele; naswona loko ndzi ku byela swo karhi u fanele u ndzi lemukisela vona.+ 8 Loko ndzi byela lowo homboloka ndzi ku, ‘Wena lowo homboloka u ta fa,’+ kambe wena u nga n’wi lemukisi leswaku a cinca ndlela yakwe yo biha, u ta fa a hombolokile hikwalaho ka xihoxo xakwe,+ kambe ngati yakwe ndzi ta yi lava eka wena. 9 Kambe loko u lemukisa lowo homboloka leswaku a hundzuka kutani a ala, u ta fa hikwalaho ka xihoxo xa yena+ kambe wena u ta va u ponise vutomi bya wena.+

10 “Wena n’wana wa munhu, byela vanhu va Israyele u ku, ‘Mi te: “Ku xandzuka ka hina ni swidyoho swa hina swa hi tikela swinene, a ha ha koti nchumu;+ hi ta swi kotisa ku yini ku ya emahlweni hi hanya?”’+ 11 Va byele u ku, ‘“Leswi ndzi hanyaka,” ku vula Yehovha Hosi Leyi Tlakukeke, “a ndzi tsaki loko lowo homboloka a fa,+ kambe ndzi lava leswaku a hundzuka+ a ya emahlweni a hanya.+ Hundzukani, hundzukani etindleleni ta n’wina to biha,+ hikwalaho ka yini mi fanele mi fa, n’wina Vaisrayele?”’+

12 “Wena n’wana wa munhu, byela vana va vanhu varikwenu u ku, ‘Ku lulama ka munhu wo lulama a ku nge n’wi ponisi loko a xandzuka;+ loko munhu wo homboloka a hundzuka a nge lovisiwi hikwalaho ka leswi a a hombolokile;+ ni munhu wo lulama a nge yi mahlweni a hanya hikwalaho ka ku lulama ka yena hi siku leri a nga ta dyoha ha rona.+ 13 Loko ndzi byela lowo lulama ndzi ku: “U ta ya emahlweni u hanya,” kutani a anakanya leswaku swilo swo lulama leswi a swi endleke enkarhini lowu hundzeke swi ta n’wi ponisa, kutani a endla leswo biha,+ swiendlo swakwe swo lulama a swi nge tsundzukiwi, kambe u ta fa hikwalaho ka swilo swo biha leswi a swi endlaka.+

14 “‘Loko ndzi byela lowo homboloka ndzi ku: “U ta fa,” kutani a hundzuka exidyohweni xakwe a endla leswinene,+ 15 lowo homboloka a tlherisa xilo lexi a nyikiweke xona xi va xitiyisekiso+ a tlhela a hakela swilo leswi a swi tekeleke vanhu,+ a hanya hi milawu leyi nyikaka vutomi hi ku ka a nga endli leswo biha, u ta ya emahlweni a hanya.+ A nge fi. 16 Swidyoho leswi a swi endleke a swi nge he tsundzukiwi.+ U ta ya emahlweni a hanya hikwalaho ka leswi a endlaka leswo lulama.’+

17 “Kambe vanhu va ka n’wina va te, ‘Ndlela ya Yehovha a yi lulamanga,’ kasi i ndlela ya vona leyi nga lulamangiki.

18 “Loko lowo lulama a tshika ku endla leswinene a endla leswo biha, u fanele a fela swona.+ 19 Kambe loko munhu wo homboloka a tshika swo biha, a endla leswinene, u ta ya emahlweni a hanya hikwalaho ko endla leswinene.+

20 “Kambe mi te, ‘Ndlela ya Yehovha a yi lulamanga.’+ Ndzi ta avanyisa un’wana ni un’wana wa n’wina hi ku ya hi tindlela ta yena, n’wina Vaisrayele.”

21 Hi ku famba ka nkarhi hi lembe ra vu-12, hi n’hweti ya vukhume, hi siku ra vuntlhanu ra n’hweti hi ri evuhlongeni, wanuna loyi a balekeke eYerusalema u te eka mina+ a ku: “Muti wu hlaseriwile!”+

22 Hi xatolo xa kona nimadyambu ku nga si ta wanuna loyi a balekeke, moya* wa Yehovha wu te eka mina, kutani a ndzi pfula nomu ku nga si ta wanuna loyi a nga ta eka mina nimixo. Hiloko nomu wa mina wu pfuleka kutani ndzi kota ku vulavula.+

23 Kutani Yehovha a vulavula na mina a ku: 24 “N’wana wa munhu, vaaki va marhumbi lawa+ va vula leswi hi tiko ra Israyele, ‘Abrahama a a ri yexe kambe u teke tiko.+ Hina hi tele; entiyisweni hi nyikiwe tiko ri va ra hina.’

25 “Hikwalaho va byele u ku, ‘Yehovha Hosi Leyi Tlakukeke u ri: “Mi dya swakudya leswi nga ni ngati,+ mi tshemba swifaniso swa n’wina leswi nyenyetsaka* naswona mi tshamela ku halata ngati.+ Hikwalaho ka yini mi fanele mi teka tiko? 26 Mi tshembe banga ra n’wina,+ mi endla swilo leswi nyenyetsaka naswona un’wana ni un’wana wa n’wina u etlele ni nsati wa wanuna un’wana.+ Kutani hikwalaho ka yini mi fanele mi teka tiko?”’+

27 “U fanele u va byela u ku, ‘Yehovha Hosi Leyi Tlakukeke u ri: “Leswi ndzi hanyaka, lava tshamaka etindhawini leti nga marhumbi va ta dlayiwa hi banga; lava nga enhoveni ndzi ta va tshika va dyiwa hi swiharhi; lava nga etindhawini leti sirhelelekeke ni le mabakweni va ta dlayiwa hi vuvabyi.+ 28 Ndzi ta endla tiko ri va rhumbi ro chavisa,+ ku tinyungubyisa ka rona lokukulu ku ta herisiwa, tintshava ta Israyele ti ta va rhumbi,+ ku nga hundzi munhu eka tona. 29 Va ta swi tiva leswaku hi mina Yehovha loko ndzi endla tiko ri va rhumbi ro chavisa+ hikwalaho ka swilo hinkwaswo swo nyenyetsa leswi va swi endlaka.”’+

30 “Loko ku ri wena n’wana wa munhu, vanhu varikwenu va vulavula hi wena va yime emakhumbini ni le tinyangweni ta tiyindlu.+ Va byelana va ku, ‘Tanani hi ta twa rito leri humaka eka Yehovha.’ 31 Va ta nghena va tele eka wena va fika va tshama emahlweni ka wena tanihi vanhu va mina; va ta ma twa marito ya wena kambe a va nge swi endli leswi va swi tweke.+ Va ku ndhundhuzela hi milomu ya vona kambe timbilu ta vona ti ni makwanga ti lava mpindzulo wa vukanganyisi. 32 Eka vona u fana ni munhu wa rito ro saseka loyi a chayaka xitende, loyi a yimbelelaka risimu leri vulavulaka hi rirhandzu. Va ta ma twa marito ya wena kambe a nga kona loyi a nga ta swi endla leswi a swi tweke. 33 Kutani loko marito wolawo ma hetiseka, hikuva ma ta hetiseka, va ta swi tiva leswaku a ku ri ni muprofeta exikarhi ka vona.”+