Tihosi Ta Vumbirhi
3 Yehorama+ n’wana wa Akabu, u ve hosi ya Israyele eSamariya hi lembe ra vu-18 ra ku fuma ka Hosi Yehoxafati wa Yuda naswona u fume malembe ya 12. 2 A a tshamela ku endla swo biha emahlweni ka Yehovha, kambe a nga endlanga ku fana ni tata wakwe kumbe mana wakwe, hikuva u suse phuphu ya Bali leyi endliweke hi tata wakwe.+ 3 Kambe u endle swidyoho leswi fanaka ni leswi Yerobuwamu n’wana wa Nebati a dyohiseke Israyele ha swona.+ A nga swi tshikanga.
4 Mexa hosi ya Mowabu a a fuwe tinyimpfu naswona a hamba a hakela hosi ya Israyele xibalo hi swinyimpfana swa 100 000 ni makhuna ya 100 000 lama nga tsemetiwangiki voya. 5 Kuteloko Akabu a file,+ hosi ya Mowabu yi sungula ku pfukela hosi ya Israyele.+ 6 Kutani Hosi Yehorama a huma eSamariya hi siku rero a hlengeleta tiko hinkwaro ra Israyele. 7 A tlhela a rhumela rito eka Hosi Yehoxafati wa Yuda a ku: “Hosi ya Mowabu yi ndzi pfukerile. Xana u ta famba na mina hi ya hlasela tiko ra Mowabu?” Hiloko a ku: “Ndzi ta famba na wena.+ Mina na wena hi van’we. Vanhu va mina ka ha ri vanhu va wena. Tihanci ta mina ka ha ri tihanci ta wena.”+ 8 Hiloko a n’wi vutisa a ku: “Xana hi fanele hi famba hi ndlela yihi?” A hlamula a ku: “Hi ndlela leyi yaka emananga ya Edomu.”
9 Hiloko hosi ya Israyele, ya Yuda ni ya Edomu ti suka ti famba.+ Endzhaku ko famba masiku ya nkombo, ti heleriwe hi mati ya masocha ni ya swifuwo leswi a ti famba na swona. 10 Kutani hosi ya Israyele yi ku: “Leswi i khombo hakunene! Hikuva Yehovha u hlengelete tihosi leti tinharhu leswaku ti ta hluriwa hi hosi ya Mowabu!” 11 Loko Yehoxafati a twa sweswo a ku: “Xana a ku na muprofeta wa Yehovha laha, loyi a nga hi vutiselaka eka Yehovha?”+ Kutani un’wana wa malandza ya hosi ya Israyele a hlamula a ku: “Ku na Elixa+ n’wana wa Xafati, loyi a a ri nandza wa Eliya.”*+ 12 Yehoxafati a ku: “Rito ra Yehovha ri na yena.” Hiloko hosi ya Israyele na Yehoxafati ni hosi ya Edomu va ya eka Elixa.
13 Elixa a byela hosi ya Israyele a ku: “Hikwalaho ka yini u ta eka mina?+ Yana eka vaprofeta va tata wa wena ni vaprofeta va mana wa wena.”+ Kambe hosi ya Israyele yi ku: “E-e, hikuva i Yehovha loyi a hlengeleteke tihosi leti tinharhu leswaku ti ta hluriwa hi hosi ya Mowabu.” 14 Hiloko Elixa a ku: “Ndza hlambanya hi Yehovha Xikwembu lexi hanyaka, Xikwembu xa mavuthu lexi ndzi xi tirhelaka, loko a ku nga ri hi mhaka ya Hosi Yehoxafati+ wa Yuda loyi ndzi n’wi xiximaka, a ndzi nga ta ku languta kumbe ku ku yingisa.+ 15 Ndzi laveleni muchayi wa haripa.”*+ Kuteloko muchayi a sungula ku chaya haripa hiloko moya wa Yehovha wu va eka yena.+ 16 Kutani a ku, “Yehovha u ri: ‘Celani makhele yo tala enkoveni lowu, 17 hikuva Yehovha u ri: “Mi nge wu voni moya naswona a mi nge yi voni mpfula; kambe nkova wu ta tala hi mati,+ kutani n’wina ni mintlhambi ni swifuwo swa n’wina mi ta nwa eka wona.”’ 18 Kambe sweswo a hi nchumu eka Yehovha,+ hikuva u ta mi pfuna leswaku mi hlula Vamowabu.+ 19 Mi fanele mi hlasela miti hinkwayo leyi biyeriweke+ ni miti hinkwayo leyinene, mi fanele mi tsema mirhi hinkwayo leyinene, mi fanele mi pfala swihlovo hinkwaswo mi tlhela mi onha masimu hinkwawo lamanene hi ku hoxa maribye eka wona.”+
20 Kutani nimixo hi nkarhi wa ku nyikeriwa ka gandzelo ra mavele,+ hi xitshuketa mati ma sungula ku khuluka ma huma hi le Edomu, tiko ri tala hi mati.
21 Vamowabu hinkwavo va swi twa leswaku tihosi teto ti tile ku ta lwa na vona, hiloko va hlengeleta vavanuna hinkwavo lava kotaka ku lwa, va yima endzilakaneni. 22 Loko va pfuka nimpundzu, ku voninga ka dyambu a ku vonaka ehenhla ka mati naswona eka Vamowabu, mati lawa a ma vonaka onge i ngati. 23 Kutani Vamowabu va ku: “Leyi i ngati! Leswi swi vula leswaku tihosi ti dlayanile hi banga. A hi yeni hi ya phanga leswi nga sala!”+ 24 Loko va fika enxaxeni wa Israyele, Vaisrayele va humile ivi va sungula ku hlasela Vamowabu va va dlaya, hiloko va baleka.+ Vaisrayele va hlongorise Vamowabu va ri karhi va va hlasela ni ku va dlaya. 25 Kutani va hirimuxa miti, wanuna un’wana ni un’wana a hoxa ribye rakwe emasin’wini hinkwawo lamanene, masimu ma tala hi maribye; va seletela swihlovo hinkwaswo swa mati,+ va tsema ni mirhi hinkwayo leyinene.+ Ku hetelele ku sale khumbi leri akiweke hi maribye ntsena ra muti wa Kiri-hareseti,+ kambe lava hoxaka maribye hi swipelupelu va wu rhendzela, va wu lovisa.
26 Loko hosi ya Mowabu yi vona leswaku yi hluriwile, yi teka vavanuna va 700 lava a va hlome hi mabanga leswaku va ringeta ku manyukuta va ya hlasela hosi ya Edomu;+ kambe va tsandzekile. 27 Hiloko yi teka n’wana wa yona wa mativula loyi a a ta va hosi endzhaku ka yona, yi endla gandzelo ro hisiwa+ ha yena ehenhla ka khumbi. Kutani Vaisrayele va nyangatseka ngopfu, va tshika ku lwa na yona, va tlhelela etikweni ra vona.