Tihosi To Sungula

16 Rito ra Yehovha ri fika eka Yehu+ n’wana wa Hanane+ ri avanyisa Baxa, ri ku: 2 “Ndzi ku endle munhu hi ku ku veka u va murhangeri wa vanhu va mina, ku nga Vaisrayele,+ kambe u fambe endleleni ya Yerobuwamu u endla leswaku vanhu va mina, ku nga Vaisrayele va dyoha lerova va ndzi hlundzukisa.+ 3 Kutani ndzi ta kukula Baxa ni ndyangu wakwe hinkwawo, ndyangu wakwe wu ta fana ni ndyangu wa Yerobuwamu+ n’wana wa Nebati. 4 Un’wana ni un’wana loyi a faka emutini a ri wa ndyangu wa Baxa, u ta dyiwa hi timbyana; loyi a nga ta fela enhoveni, u ta dyiwa hi swinyenyana.”

5 Loko ku ri matimu ya Baxa hinkwawo ni mitirho yakwe ni hinkwaswo leswi a swi endleke, xana a swi tsariwanga ebukwini ya matimu ya tihosi ta Israyele? 6 Kutani Baxa a fa, a lahliwa ni vakokwa wakwe eTirisa;+ Elaha n’wana wakwe a va hosi. 7 Nakambe rito ra Yehovha ri fika hi ku tirhisa muprofeta Yehu n’wana wa Hanane ku avanyisa Baxa ni ndyangu wakwe, hikwalaho ka vubihi lebyi a byi endleke a dyohela Yehovha, a n’wi hlundzukisa hi mitirho yakwe, ku fana ni ndyangu wa Yerobuwamu ni hikwalaho ka leswi a n’wi* dlayeke.+

8 Hi lembe ra vu-26 ra ku fuma ka Hosi Asa wa Yuda, Elaha n’wana wa Baxa a va hosi ya Israyele eTirisa, kutani a fuma malembe mambirhi. 9 Nandza wakwe Zimri ndhuna ya hafu ya masocha lama fambaka hi makalichi, u bohe xikungu xo n’wi dlaya eTirisa, loko a ha ri eku nweni naswona a dakwile endlwini ya Ariza mulanguteri wa ndyangu wa hosi eTirisa. 10 Hiloko Zimri a nghena a fika a n’wi dlaya+ hi lembe ra vu-27 ra ku fuma ka Hosi Asa wa Yuda, kutani Zimri a va hosi. 11 Loko a va hosi, hi ku hatlisa loko a tshama exiluvelweni xa yena, u dlaye ndyangu hinkwawo wa Baxa. A nga siyanga ni wanuna* ni un’we hambi ku ri maxaka yakwe kumbe vanghana vakwe. 12 Hi ndlela yoleyo Zimri a lovisa ndyangu hinkwawo wa Baxa hi ku landza rito ra Yehovha leri teke hi muprofeta Yehu loko a avanyisa Baxa.+ 13 Leswi a swi vangiwa hikwalaho ka swidyoho hinkwaswo leswi Baxa ni n’wana wakwe Elaha va swi endleke ni swidyoho leswi va dyohiseke Israyele ha swona, hi ku hlundzukisa Yehovha Xikwembu xa Israyele hi swikwembu swa vona leswi nga pfuniki nchumu.+ 14 Loko ku ri matimu ya Elaha hinkwawo ni hinkwaswo leswi a swi endleke, xana a swi tsariwanga ebukwini ya matimu ya tihosi ta Israyele?

15 Hi lembe ra vu-27 ra Hosi Asa wa Yuda, Zimri u ve hosi ku ringana masiku ya nkombo eTirisa, hi nkarhi lowu masocha a ma dzime matende ku lwa na Gibetoni+ muti wa Vafilista. 16 Hi ku famba ka nkarhi masocha lawa a ma dzime matende ma twe hungu leri nge: “Zimri u bohe xikungu naswona u dlaye hosi.” Hiloko tiko hinkwaro ra Israyele ri veka Omri+ ndhuna ya vuthu a va hosi ya Israyele hi siku rero enxaxeni. 17 Omri ni tiko hinkwaro ra Israyele va suka eGibetoni va ya rhendzela muti wa Tirisa. 18 Loko Zimri a vona leswaku muti wu tekiwile, a balekela exihondzweni xa yindlu ya hosi,* a fika a hisa yindlu ya hosi a ri endzeni ka yona a fa.+ 19 Leswi swi vangiwe hi swidyoho leswi a swi endleke, hi ku endla swo biha emahlweni ka Yehovha hi ku famba endleleni ya Yerobuwamu ni hi swidyoho leswi a dyohiseke Israyele ha swona.+ 20 Loko ku ri matimu ya Zimri hinkwawo ni xikungu lexi a xi boheke, xana a swi tsariwanga ebukwini ya matimu ya tihosi ta Israyele?

21 A ku ri hi nkarhi wolowo loko Vaisrayele va avana va va mitlawa yimbirhi. Ntlawa wun’we wu ve valandzeri va Tibini n’wana wa Ginati wu lava ku n’wi endla hosi, kasi ntlawa lowun’wana wu landzele Omri. 22 Kambe valandzeri va Omri va hlule valandzeri va Tibini n’wana wa Ginati. Hiloko Tibini a fa, Omri a va hosi.

23 Hi lembe ra vu-31 ra ku fuma ka Hosi Asa wa le Yuda, Omri u ve hosi eIsrayele naswona u fume malembe ya 12. U fume malembe ya tsevu eTirisa. 24 U xave ntshava ya Samariya eka Xemeri hi titalenta* timbirhi ta silivhere, kutani a aka muti ehenhla ka ntshava yoleyo. A wu thya vito ra Samariya*+ hi ku landza vito ra Xemeri n’wini wa ntshava. 25 Omri a ya emahlweni a endla swo biha emahlweni ka Yehovha naswona a a ri munhu wo biha ngopfu ku tlula hinkwavo lava fumeke a nga si fuma.+ 26 U fambe etindleleni hinkwato ta Yerobuwamu n’wana wa Nebati ni le swidyohweni leswi a dyohiseke Israyele ha swona hi ku hlundzukisa Yehovha Xikwembu xa Israyele hi swifaniso swa vona leswi nga pfuniki nchumu.+ 27 Loko ku ri matimu ya Omri hinkwawo, mitirho yakwe ni tinyimpi leti a ti hluleke, xana a swi tsariwanga ebukwini ya matimu ya tihosi ta Israyele? 28 Kutani Omri a etlela ni vakokwa wakwe a lahliwa eSamariya; Akabu+ n’wana wakwe a va hosi.

29 Akabu n’wana wa Omri, u ve hosi eIsrayele hi lembe ra vu-38 ra Hosi Asa wa Yuda, Akabu n’wana wa Omri u fume eIsrayele malembe ya 22 a ri eSamariya.+ 30 Akabu n’wana wa Omri a a bihe ngopfu emahlweni ka Yehovha ku tlula tihosi hinkwato leti fumeke a nga si fuma.+ 31 Onge hiloko ku ri nchumu lowutsongo eka yena ku famba eswidyohweni swa Yerobuwamu+ n’wana wa Nebati, u tlhele a teka Yezabele+ n’wana wa Etibali hosi ya Vasidoni+ a va nsati wakwe, kutani a sungula ku tirhela Bali+ ni ku n’wi khinsamela. 32 Ku tlula kwalaho, a akela Bali altari endlwini* ya Bali+ leyi a yi akeke eSamariya. 33 Akabu u tlhele a endla mhandzi ya Axera.*+ Akabu u endle swilo swo tala leswi a swi hlundzukisa Yehovha Xikwembu xa Israyele ku tlula tihosi hinkwato ta Israyele leti fumeke a nga si fuma.

34 Emasikwini yakwe, Hiyeli wa le Bethele u pfuxe muti wa Yeriko. U feriwe hi mativula yakwe Abirama loko a sungula ku aka, a tlhela a feriwa hi rikotse rakwe Segubu loko a hoxa tinyangwa ta wona, hi ku ya hileswi Yehovha a swi vuleke hi ku tirhisa Yoxuwa n’wana wa Nuni.+