Tikronika To Sungula

22 Hiloko Davhida a ku: “Leyi i yindlu ya Yehovha Xikwembu xa ntiyiso naswona leyi i altari leyi Vaisrayele va endlaka magandzelo yo hisiwa eka yona.”+

2 Davhida a lerisa leswaku ku hlengeletiwa valuveri+ lava a va ri etikweni ra Israyele, kutani a va nyika ntirho wo vatla maribye lawa a ma ta tirhiseriwa ku aka yindlu ya Xikwembu xa ntiyiso.+ 3 Davhida a tlhela a hlengeleta nsimbhi yo tala leswaku a ta endla swipikiri swa tinyangwa ni swa swimanyiso, a tlhela a hlengeleta ni koporo yo tala swinene lerova a yi nga pimeki,+ 4 ni timhandzi ta mikedari+ leti a ti nga hlayeki, hikuva Vasidoni+ ni Vatiri+ va yise timhandzi to tala ta mikedari eka Davhida. 5 Hiloko Davhida a ku: “Solomoni n’wananga wa ha ri ntsongo naswona a nga na ntokoto,+ yindlu leyi nga ta akeriwa Yehovha yi fanele yi va yikulu swinene+ yi tlhela yi saseka+ leswaku yi ta tiveka ematikweni hinkwawo.+ Hikwalaho, ndzi ta n’wi hlengeletela leswi a nga ta swi tirhisa.” Kutani Davhida a hlengeleta swilo swo tala swo aka ha swona a nga si fa.

6 Ku tlula kwalaho, a vitana n’wana wakwe Solomoni kutani a n’wi lerisa leswaku a akela Yehovha Xikwembu xa Israyele yindlu. 7 Davhida a byela n’wana wakwe Solomoni a ku: “A ndzi swi lava hi mbilu hinkwayo ku aka yindlu leyi a yi ta vangamisa vito ra Yehovha Xikwembu xa mina.+ 8 Kambe Yehovha u ndzi byele a ku, ‘U dlaye vanhu vo tala naswona u lwe tinyimpi letikulu. A wu nge yi aki yindlu leyi nga ta vangamisa vito ra mina+ hikuva u dlaye vanhu vo tala emisaveni. 9 U ta va ni n’wana+ loyi a nga ta va munhu wo rhula naswona ndzi ta n’wi sirhelela eka valala vakwe hinkwavo lava n’wi rhendzeleke,+ vito rakwe ku ta va Solomoni*+ naswona hi nkarhi wa ku fuma ka yena, ndzi ta endla leswaku ku va ni ku rhula ni ntshamiseko eIsrayele.+ 10 Hi yena loyi a nga ta aka yindlu leyi nga ta vangamisa vito ra mina.+ U ta va n’wana wa mina naswona mina ndzi va tata wakwe.+ Ndzi ta tiyisa vuhosi byakwe eIsrayele hilaha ku nga heriki.’+

11 “N’wananga, onge Yehovha a nga va na wena naswona onge swi nga ku fambela kahle, u aka yindlu ya Yehovha Xikwembu xa wena, hilaha a vuleke hakona mayelana na wena.+ 12 Onge Yehovha a nga ku nyika vutlhari ni ku twisisa+ loko a ku nyika mfumo eIsrayele leswaku u ta yingisa nawu wa Yehovha Xikwembu xa wena.+ 13 Swi ta ku fambela kahle loko wo yingisa milawu+ ni swiboho leswi Yehovha a swi leriseke Muxe leswaku a swi byela Vaisrayele.+ Vana ni xivindzi u tiya. U nga chavi kumbe u chuha.+ 14 Ndzi tirhe hi matimba leswaku ndzi hlengeleta swo aka yindlu ya Yehovha, ndzi hlengelete titalenta* ta nsuku ta 100 000, titalenta ta silivhere ta 1 000 000, koporo ni nsimbhi+ yo tala lerova a swi pimeki, ndzi tlhele ndzi hlengeleta timhandzi ni maribye,+ kambe swona u ta swi engetela. 15 U ni vatirhi vo tala, vatsemi va maribye, vavatli va maribye,+ lava tirhaka hi timhandzi ni lava nga ni vuswikoti eka mitirho yo hambanahambana.+ 16 Nsuku, silivhere, koporo ni nsimbhi swi tele swinene.+ Suka u yima u sungula ntirho, onge Yehovha a nga va na wena.”+

17 Hiloko Davhida a lerisa tihosana hinkwato ta Israyele leswaku ti pfuna n’wana wakwe Solomoni a ku: 18 “Xana Yehovha Xikwembu xa n’wina a nga mi seketeli, xana a nga mi wisisanga eka valala va n’wina? Hikuva u ndzi pfunile leswaku ndzi hlula tiko naswona tiko ri lawuriwa hi Yehovha ni vanhu vakwe. 19 Tiyimiseleni ku gandzela Yehovha Xikwembu xa n’wina hi mbilu hinkwayo ni hi vutomi hinkwabyo,+ sungulani hi ku akela Yehovha Xikwembu xa ntiyiso ndhawu yo kwetsima,+ leswaku mi ta veka areka ya ntwanano wa Yehovha ni swibya swo kwetsima swa Xikwembu xa ntiyiso+ endlwini leyi akeriweke ku vangamisa vito ra Yehovha.”+