Vaheveru

7 Hikuva Melkisedeke hosi ya le Salema tlhelo muprista wa Xikwembu Lexi Nge Henhlahenhla, u hlangane na Abrahama loko a vuya eku hluleni ka tihosi ivi a n’wi katekisa,+ 2 kutani Abrahama a n’wi nyika* vukhume bya swilo hinkwaswo leswi a swi kumeke. Xo sungula, vito rakwe ri hundzuluxeriwe ri va “Hosi Ya Ku Lulama” naswona a tlhela a va hosi ya Salema, leswi vulaka “Hosi Ya Ku Rhula.” 3 Leswi a a nga ri na vatswari, a nga ri na matimu ya xivongo, a ku tsariwanga leswaku u velekiwe rini kumbe u fe rini. U fana ni N’wana wa Xikwembu naswona i muprista hilaha ku nga heriki.+

4 Vonani ndlela leyi munhu loyi a a ri nkulu ha yona, loyi Abrahama nhloko ya ndyangu* a n’wi nyikeke vukhume bya swilo leswinene leswi phangiweke.+ 5 I ntiyiso, hi ku ya hi Nawu vana va Levhi+ lava nga vaprista va lerisiwe ku kuma vukhume eka vanhu,+ hileswaku eka vamakwavo, hambileswi a va ri vatukulu* va Abrahama. 6 Kambe munhu loyi, loyi a nga lavisisangiki matimu ya xivongo xakwe eka vona u teke vukhume eka Abrahama kutani a katekisa loyi Xikwembu xi endleke xitshembiso eka yena.+ 7 I ntiyiso leswaku munhu loyi a katekisaka i nkulu eka loyi a katekisiwaka. 8 Valevhi va amukele vukhume kambe a va ri vanhu lava faka, kambe wanuna lowun’wana loyi a kumeke vukhume, Matsalwa ma vula leswaku wa hanya.+ 9 Naswona ku nga vuriwa leswaku hambi ku ri Levhi loyi a amukeleke vukhume, u hakele vukhume hi ku tirhisa Abrahama, 10 hikuva a a ha ri endzeni* ka kokwa wakwe a nga si velekiwa loko Melkisedeke a hlangana na yena.+

11 Kutani loko ku ri hileswaku vaprista va Valevhi+ a va ta swi kota ku endla leswaku vanhu va hetiseka, (hikuva vuprista a byi ri xiyenge xa Nawu lowu nyikiweke vanhu), xana a swa ha ta lava leswaku ku humelela muprista un’wana wo fana na Melkisedeke+ ku nga ri wo fana na Aroni? 12 Hikuva leswi ntirho wa vuprista wu cinciwaka, swa fanela leswaku ku cinciwa ni Nawu.+ 13 Hikuva wanuna loyi ku vuriwaka swilo leswi ha yena a a ri wa rixaka rin’wana, leri eka rona ku nga riki na munhu loyi a tshameke a tirha ealtarini.+ 14 Hikuva swi le rivaleni leswaku Hosi ya hina yi hume eka Yuda,+ kambe Muxe a nga vulanga leswaku vaprista va ta huma eka nyimba yoleyo.

15 Nakambe leswi swi va erivaleni swinene loko ku humelela muprista+ un’wana loyi a fanaka na Melkisedeke,+ 16 i muprista ku nga ri hikwalaho ka rixaka leri a humaka eka rona hi ku ya hi Nawu, kambe hikwalaho ka leswi a nga ni matimba lama n’wi nyikaka vutomi lebyi nga taka byi nga lovisiwi.+ 17 Hikuva eka tsalwa rin’wana ku vuriwa leswi ha yena: “U muprista hilaha ku nga heriki ku fana na Melkisedeke.”+

18 Kutani swileriso swa khale swi herisiwile hikuva swi tsanile naswona a swa ha tirhi.+ 19 A xi kona lexi Nawu wu endleke leswaku xi hetiseka,+ kambe ntshembo wo antswa+ lowu Xikwembu xi hi nyikaka wona wu endle leswaku swilo swi hetiseka naswona hi kota ku tshinela eka Xikwembu ha wona.+ 20 Nakambe, muprista loyi a nga humelelanga ku nga si endliwa xihlambanyo 21 (hikuva hakunene ku ni vanhu lava veke vaprista handle ka xihlambanyo kambe loyi u ve muprista hikwalaho ka xihlambanyo lexi endliweke mayelana na yena hi Loyi a vuleke leswi: “Yehovha* u hlambanyile naswona a nge cinci,* ‘U muprista hilaha ku nga heriki’”),+ 22 Yesu u ve xitiyisekiso xa ntwanano wo antswa.+ 23 Ku tlula kwalaho, vo tala va boheke ku va vaprista hi ku tlhandlamana+ hikuva rifu ri va sivele ku tshama va ri vaprista, 24 kambe leswi a hanyaka hilaha ku nga heriki,+ a nga tlhandlamiwi hi munhu eka ntirho wakwe wa vuprista. 25 Kutani wa swi kota ni ku va ponisa hi ku helela lava tshinelaka eka Xikwembu hi vito ra yena, hikuva wa hanya hi masiku leswaku a va kombelela.+

26 Hikuva swa fanela ku va ni muprista lonkulu wo tano loyi a tshembekaka, loyi a nga riki na nandzu, loyi a nga nyamangiki,+ loyi a hambaneke ni vadyohi naswona a tlakukeke ku tlula matilo.+ 27 Ku hambana ni vaprista volavo lavakulu, a swi bohi leswaku a nyikela magandzelo siku ni siku,+ a rhanga hi ya swidyoho swakwe kutani ku landzela ya swidyoho swa vanhu,+ hikuva leswi u swi endle kan’we swi helela kwalaho loko a tinyikela.+ 28 Hikuva Nawu wu hlawula vanhu lava nga vadyohi leswaku va va vaprista lavakulu,+ kambe rito ra xihlambanyo+ leri endliweke endzhaku ka Nawu ri veka N’wana, loyi a hetisekeke+ hilaha ku nga heriki.