Tikronika Ta Vumbirhi

26 Endzhaku ka sweswo, vanhu hinkwavo va Yuda va teka Uziya+ loyi a a ri ni malembe ya 16, va n’wi endla hosi, a siva Amaziya+ tata wakwe. 2 A pfuxa muti wa Elata+ a wu tlherisela eYuda endzhaku ka loko hosi* yi lahliwe ni vakokwa wa yona.+ 3 Uziya+ a a ri ni malembe ya 16 loko a va hosi naswona u fume malembe ya 52 eYerusalema. Vito ra mana wakwe a ku ri Yekoliya wa le Yerusalema.+ 4 U ye emahlweni a endla leswinene emahlweni ka Yehovha, hilaha Amaziya tata wakwe a endleke hakona.+ 5 A ya emahlweni a lava Xikwembu hi nkarhi wa Zakariya, loyi a n’wi dyondziseke ku chava Xikwembu xa ntiyiso. Hi nkarhi lowu a a lava Yehovha, Xikwembu xa ntiyiso xi n’wi katekisile.+

6 Hiloko a huma a ya lwa ni Vafilista,+ a boxa khumbi ra Gati,+ khumbi ra Yabine+ ni khumbi ra Axidodo.+ Endzhaku ka sweswo a aka miti etikweni ra Axidodo ni le xikarhi ka Vafilista. 7 Xikwembu xa ntiyiso xi ya emahlweni xi n’wi pfuna ku lwa ni Vafilista, Maarabu+ lawa a ma tshama eGurubali ni Vamewunimi. 8 Vaamoni+ va sungula ku humesela Uziya xibalo. U dume ku ya fika ni le Egipta, hikuva a a ri hosi leyi nga ni matimba swinene. 9 Ku tlula kwalaho, Uziya u ake swihondzo+ eYerusalema hi le Gedeni ya le Khonweni,+ eGedeni ya le Nkoveni+ ni Khumbi ro Tshega Muako, a swi tiyisa. 10 U tlhele a aka swihondzo+ emananga, a cela ni swihlovo swo tala (hikuva a a ri ni swifuwo swo tala ngopfu); u endle tano ni le Xefela ni le tikweni leri nga rivala. A a ri ni varimi ni varimi va masimu ya madiriva etintshaveni ni le Karimeli, hikuva a a rhandza swa vurimi.

11 Ku tlula kwalaho, Uziya a a ri ni masocha lama hlomeleke nyimpi. A ma ya enyimpini ma hleriwe ku ya hi mitlawa yo karhi. A ma hlayiwile ni ku tsarisiwa+ hi matsalana+ Yeyiyele na ndhuna Maseya loyi a a tirha ehansi ka Hananiya un’wana wa tihosana ta hosi. 12 Nhlayo hinkwayo ya tindhuna ta mindyangu leti a ti rhangela tinhenha leti ta matimba a ku ri 2 600. 13 Vuthu ra nyimpi leri a ri lawuriwa hi tindhuna leti a ri ri ni masocha ya 307 500 lama lunghekeleke nyimpi, vuthu ra matimba leri a ri seketela hosi ku lwa ni valala va yona.+ 14 Uziya u nyike masocha lawa hinkwawo switlhangu, matlhari,+ magondolo,* swiambalo leswi endliweke hi swinsimbana,+ mavurha ni swipelupelu.+ 15 Ku tlula kwalaho, u endle michini ya nyimpi eYerusalema, leyi endliweke hi tintlhari; yi vekiwe ehenhla ka swihondzo+ ni le tikhonweni ta makhumbi naswona a yi copa miseve ni maribye lamakulu. Hiloko a duma swinene, hikuva u pfuniwe hi ndlela yo hlamarisa kukondza a va ni matimba.

16 Kambe loko se a ri ni matimba, a sungula ku titlakusa kutani a tivangela khombo, a nga tshembekanga eka Yehovha Xikwembu xakwe, u nghene etempeleni ya Yehovha a ya hisa mirhi yo nun’hwela ealtarini.+ 17 Xikan’wekan’we muprista Azariya ni vaprista van’wana va Yehovha va 80 lava nga ni xivindzi va n’wi sala endzhaku. 18 Va fika eka Hosi Uziya va ku: “A hi ntirho wa wena Uziya, ku hisela Yehovha+ murhi wo nun’hwela! I vaprista ntsena lava faneleke va endla tano hikuva i vatukulu va Aroni,+ hi vona lava hlawuriweke. Huma etempeleni hikuva a wu tshembekanga emhakeni leyi naswona Yehovha Xikwembu a nge ku vangamisi hikwalaho ka leswi.”

19 Kambe Uziya loyi a khome xibya xo hisela murhi wo nun’hwela a hlundzuka;+ naswona loko a ha karihele vaprista ku huma nhlokonho+ emombyeni wakwe emahlweni ka vaprista endlwini ya Yehovha etlhelo ka altari ya murhi wo nun’hwela. 20 Loko muprista lonkulu Azariya ni vaprista hinkwavo va n’wi languta va swi vona leswaku u biwe hi nhlokonho emombyeni! Hiloko va hatla va n’wi humesela ehandle, na yena a namba a huma hi ku hatlisa hikuva Yehovha a a n’wi bile.

21 Hosi Uziya u tshame a ri ni nhlokonho kukondza a fa naswona a a tshama endlwini yin’wana a ri ni nhlokonho,+ hikuva a a nga pfumeleriwi ku nghena endlwini ya Yehovha. Kutani Yohatama n’wana wakwe a langutela yindlu ya hosi, a avanyisa vanhu va tiko.+

22 Matimu hinkwawo ya Uziya, ku sukela eku sunguleni ku ya fikela emakumu, ma tsariwe hi muprofeta Esaya+ n’wana wa Amotsi. 23 Hiloko Uziya a fa kutani va n’wi lahla ekusuhi ni masirha ya vakokwa wakwe, kambe ensin’wini ya swilahlo swa tihosi hikuva va te: “U ni nhlokonho.” Kutani Yohatama+ n’wana wakwe a va hosi.