Timotiya Wa Vumbirhi

3 Kambe tiva leswaku emasikwini yo hetelela+ ku ta fika mikarhi yo nonon’hwa leyi swi tikaka ku hanya eka yona. 2 Hikuva vanhu va ta va lava tirhandzaka, varhandzi va mali, lava tikurisaka, lava titlakusaka, vasandzi, lava nga yingisiki vatswari, lava nga khensiki, lava nga tshembekiki, 3 lava nga riki na rirhandzu,* lava nga tiyimiselangiki ku pfumelelana ni van’wana, valumbeti, lava nga tikhomiki, lava nga ni tihanyi, lava nga rhandziki vunene, 4 vaxengi, lava omeke tinhloko, lava tikukumuxaka, lava rhandzaka ku tiphina ku ri ni ku rhandza Xikwembu, 5 va vonaka onge va gandzela Xikwembu kambe mahanyelo ya vona ma va landzula;+ fambela ekule ni vanhu vo tano. 6 Exikarhi ka vanhu lava ku humelela vavanuna lava ngungumelaka va nghena emindyangwini kutani va kanganyisa vavasati lava tsaneke, lava tikeriwaka hi swidyoho ni ku yingayingisiwa hi ku navela ko hambanahambana, va va endla mahlonga ya vona, 7 va tshama va ri eku dyondzeni kambe a va swi koti ku tiva ntiyiso.

8 Va ya emahlweni va kaneta ntiyiso hilaha Yani na Yambri va kaneteke Muxe hakona. Mianakanyo ya vanhu lava yi onhakile swinene naswona Xikwembu a xi va amukeli hikuva a va fambi hi ripfumelo. 9 Kambe, a va nge yi kule, hikuva vuphukuphuku bya vona byi ta vonaka eka vanhu hinkwavo, hilaha swi veke hakona eka vavanuna lavaya vambirhi.+ 10 Kambe wena u landzelerisise dyondzo ya mina, ndlela leyi ndzi hanyaka ha yona,+ xikongomelo xa mina, ripfumelo ra mina, ku lehisa ka mina mbilu, rirhandzu ra mina, ku tiyisela ka mina, 11 ku xanisiwa ni maxangu yo fana ni lawa ma ndzi humeleleke eAntiyoka,+ eIkoniya+ ni le Listra.+ Ndzi tiyiselele ku xanisiwa naswona Hosi yi ndzi ponisile eka swona hinkwaswo.+ 12 Kahlekahle hinkwavo lava navelaka ku hanya hi ku tinyiketela eka Xikwembu hi ku fambisana na Kreste Yesu na vona va ta xanisiwa.+ 13 Kambe vanhu vo homboloka ni vaxisi va ta ya emahlweni va nyanya ku biha, va hambukisa van’wana na vona va hambukisiwa.+

14 Hambiswiritano, yana emahlweni u hanya hi swilo leswi u swi dyondzeke, leswi u susumetelekeke ku swi tshemba leswaku i ntiyiso+ hikuva u tiva vanhu lava u swi dyondzeke eka vona 15 ni leswaku ku sukela loko wa ha ri ricece+ u tive matsalwa yo kwetsima,+ lawa ma kotaka ku ku tlharihisa leswaku u ta pona hi ku va ni ripfumelo eka Kreste Yesu.+ 16 Matsalwa hinkwawo ma huhuteriwe* hi Xikwembu+ naswona ma pfuna ku dyondzisa,+ ku tshinya, ku lulamisa swilo, ku laya hi ku pfumelelana ni leswo lulama,+ 17 leswaku nandza wa Xikwembu a va ni vuswikoti, a lunghekela ntirho wun’wana ni wun’wana lowunene.