Varhoma
6 Xana hi ta ku yini? Xana hi fanele hi ya emahlweni hi dyoha leswaku musa lowukulu wa Xikwembu wu ta tala? 2 Nikatsongo! Leswi hi feke exidyohweni,+ xana swi fanerile leswaku hi hanya exidyohweni?+ 3 Kumbe, xana a mi swi tivi leswaku hinkwerhu ka hina lava hi khuvuriweke eka Kreste Yesu+ hi khuvuriwe eka rifu rakwe?+ 4 Hi lahliwe na yena hileswi hi khuvuriweke eka rifu rakwe,+ leswaku leswi Kreste a pfuxiweke eka lava feke hi ku vangama ka Tatana, na hina hi fanele hi hanya vutomi lebyintshwa.+ 5 Loko hi hlanganisiwe na yena hi rifu leri fanaka ni ra yena,+ hakunene hi ta tlhela hi hlanganisiwa na yena hi ku pfuxiwa loku fanaka ni ka yena.+ 6 Hikuva ha swi tiva leswaku vumunhu bya hina bya khale byi beleriwe na yena emhandzini+ leswaku miri wa hina lowu nga ni xidyoho wu nga ha hi lawuli,+ leswaku hi nga ha yi emahlweni hi va mahlonga ya xidyoho.+ 7 Hikuva loyi a feke u tshunxiwile* eka xidyoho xakwe.
8 Ku tlula kwalaho, loko hi fe na Kreste ha tshemba leswaku hi ta tlhela hi hanya na yena. 9 Hikuva ha swi tiva leswaku leswi Kreste se a pfuxiweke eku feni,+ a nge he fi;+ rifu a ra ha ri na matimba eka yena. 10 Hikuva hi rifu rakwe, a fela xidyoho* kan’we swi helela kwalaho,+ kambe vutomi lebyi a byi hanyaka, u hanyela Xikwembu. 11 Hilaha ku fanaka, na n’wina titekeni mi ri lava feke exidyohweni, kambe mi ri lava hanyelaka Xikwembu ha Kreste Yesu.+
12 Hikwalaho, mi nga pfumeleli xidyoho xi lawula mimiri+ ya n’wina leyi faka lerova mi yingisa ku navela ka yona. 13 Mi nga nyikeli mimiri* ya n’wina exidyohweni hi ku endla leswo biha,* kambe tinyikeleni eka Xikwembu tanihi vanhu lava hanyaka ku nga ri lava feke, nakambe nyikelani mimiri* ya n’wina eka Xikwembu leswaku mi endla leswo lulama.*+ 14 Hikuva xidyoho a xi fanelanga xi mi lawula, tanihi leswi mi nga riki ehansi ka nawu+ kambe mi nga ehansi ka musa lowukulu.+
15 Xana leswi swi vula yini? Xana hi fanele hi dyoha hileswi hi nga ehansi ka musa lowukulu wa Xikwembu ku nga ri ehansi ka nawu?+ Nikatsongo! 16 Xana a mi swi tivi leswaku loko mi tinyikela eka un’wana tanihi mahlonga lama yingisaka, mi mahlonga ya loyi mi n’wi yingisaka,+ ku nga ha va ya xidyoho+ lexi yisaka eku feni+ kumbe ya ku yingisa loku yisaka eku lulameni? 17 Kambe a ku khensiwe Xikwembu hikuva hambileswi a mi ri mahlonga ya xidyoho, mi yingise dyondzo leyi mi nyikiweke yona hi mbilu hinkwayo. 18 Hikwalaho, leswi mi tshunxiweke exidyohweni,+ mi ve mahlonga ya ku lulama.+ 19 Ndzi tirhisa marito lawa vanhu va ma toloveleke hikwalaho ka leswi mi tsaneke; hilaha mi nyikeleke mimiri ya n’wina yi va mahlonga ya leswi thyakeke ni leswo homboloka leswaku mi endla leswo homboloka, sweswi nyikelani mimiri ya n’wina yi va mahlonga ya leswo lulama leswaku mi ta endla leswo kwetsima.+ 20 Hikuva loko ma ha ri mahlonga ya xidyoho, ku lulama a ku nga mi lawuli.
21 Kutani, i yini leswi mi vuyeriweke ha swona hikwalaho ka swiendlo swa n’wina swa nkarhi lowu hundzeke? I swilo leswi sweswi swi mi khomisaka tingana. Hikuva makumu ya swilo sweswo i rifu.+ 22 Kambe, leswi sweswi mi tshunxiweke exidyohweni kutani mi va mahlonga ya Xikwembu, vuyelo bya swiendlo swa n’wina bya kwetsima+ naswona makumu ya kona i vutomi lebyi nga heriki.+ 23 Hikuva hakelo ya xidyoho i rifu,+ kambe nyiko leyi hi nyikiwaka hi Xikwembu i vutomi lebyi nga heriki+ ha Kreste Yesu Hosi ya hina.+