Ezekiyele

38 Yehovha a tlhela a vulavula na mina a ku: 2 “N’wana wa munhu, languta Gogo wa tiko ra Magogo,+ ndhunankulu* ya Mixeke na Tubala,+ u profeta ku lwa na yena.+ 3 U fanele u ku, ‘Yehovha Hosi Leyi Tlakukeke u ri: “Ndzi lwa na wena Gogo, ndhunankulu* ya Mixeke na Tubala. 4 Ndzi ta ku hundzuluxa, ndzi tlhoma swinjovo etinhlayeni ta wena,+ ndzi ku humesa ni vuthu ra wena hinkwaro ra nyimpi,+ tihanci ni vagadi va tihanci, hinkwavo va ambale swiambalo swo saseka ngopfu, vuthu lerikulu swinene leri khomeke switlhangu leswikulu ni leswitsongo, hinkwavo ka vona va ri karhi va vangamisa mabanga ya vona; 5 va ri na Peresiya, Etiyopiya na Putu,+ hinkwavo ka vona va khome switlhangu leswitsongo naswona va ambale magondolo* ya nyimpi; 6 Gomere ni masocha yakwe hinkwawo, vatukulu va Togarima+ lava humaka etindhawini ta le kule swinene ta le n’walungwini ni masocha ya vona hinkwawo, vanhu vo tala va na wena.+

7 “‘“Lunghekani, mi tilunghiselela, wena ni mavuthu ya wena lama hlengeletaneke na wena, kutani wena u ta va ndhuna* ya wona.

8 “‘“U ta vitaniwa endzhaku ka masiku yo tala. Emalembeni yo hetelela u ta hlasela tiko ra vanhu lava vuyisiweke ni lava kutsuriweke eka banga, lava hlengeletiweke va huma eka vanhu vo tala va ya etintshaveni ta Israyele, leti heteke nkarhi wo leha ti nga ri na vaaki. Vaaki va tiko leri va vuyeteriwe eka vanhu naswona hinkwavo ka vona va tshama va sirhelelekile.+ 9 U ta ya eka vona ku fana ni xidzedze, u ta funengeta tiko ku fana ni mapapa, wena ni masocha ya wena hinkwawo ni vanhu vo tala lava nga na wena.”’

10 “Yehovha Hosi Leyi Tlakukeke u ri: ‘Hi siku rero u ta anakanya swo karhi embilwini ya wena naswona u ta kunguhata ku endla swilo swo biha. 11 U ta ku: “Ndzi ta hlasela tiko ra lava tshamaka eswimitanini leswi nga sirhelelekangiki.+ Ndzi ta lwa ni lava tshamaka etindhawini leti sirhelelekeke, lava nga kavanyetiwiki, hinkwavo ka vona va tshama eswimitanini leswi nga riki na makhumbi yo swi sirhelela, swilo swo goga ha swona kumbe tigede.” 12 Xikongomelo xa kona ku ta va ku phanga swilo swo tala, ku hlasela tindhawu leti a ti ri marhumbi kambe sweswi ti nga ni vaaki+ ni vanhu lava nga tlhela va hlengeletiwa va huma ematikweni,+ lava hlengeletaka rifuwo ni nhundzu,+ lava tshamaka exikarhi ka misava.

13 “‘Xeba+ na Dedani+ ni vaxavisi va Taraxixi+ ni tinhenha* hinkwato ta yena va ta ku eka wena: “Xana u hlasela leswaku u phanga swilo swo tala? Xana u hlengelete mavuthu ya wena leswaku ma teka silivhere ni nsuku, ma teka rifuwo ni nhundzu ni ku phanga swilo swo tala ngopfu?”’

14 “Kutani profeta n’wana wa munhu, u byela Gogo u ku, ‘Yehovha Hosi Leyi Tlakukeke u ri: “Hi siku rero u ta swi tiva leswaku vanhu va mina ku nga Vaisrayele va tshama va sirhelelekile.+ 15 U ta ta u huma endhawini ya wena, ku suka etindhawini ta le kule swinene ta le n’walungwini,+ wena ni vanhu vo tala lava nga na wena, hinkwavo va gade tihanci, va ri masocha yo tala.+ 16 Ku fana ni mapapa lama funengetaka tiko, u ta ta u ta lwa ni vanhu va mina ku nga Vaisrayele. Emasikwini ya makumu ndzi ta ku tisa leswaku u ta lwa ni tiko ra mina,+ leswaku matiko ma ta ndzi tiva loko ndzi tirhisa wena leswaku ndzi tikwetsimisa emahlweni ka wona, Wena Gogo.”’+

17 “Yehovha Hosi Leyi Tlakukeke u ri: ‘Xana a hi wena loyi ndzi vulavuleke ha yena khale swinene hi ku tirhisa malandza ya mina lama nga vaprofeta va Israyele, lava profeteke malembe yo tala leswaku hi wena u nga ta lwa na vona?’

18 “‘Hi siku rero, ku nga siku leri Gogo a nga ta hlasela tiko ra Israyele ha rona,’ ku vula Yehovha Hosi Leyi Tlakukeke, ‘ndzi ta kariha swinene.+ 19 Ndzi ta vulavula ndzi hlundzukile swinene; hi siku rero ku ta va ni ku tsekatseka lokukulu ka misava etikweni ra Israyele. 20 Tihlampfi, swinyenyana, swiharhi, swilo hinkwaswo leswi kokovaka ni vanhu hinkwavo va ta rhurhumela hikwalaho ka mina, tintshava hinkwato ti ta hirimuxiwa,+ ndhawu yin’wana ni yin’wana leyi nga ni riwa yi ta wa ni khumbi rin’wana ni rin’wana ri ta wa.’

21 “‘Ndzi ta n’wi rhumela banga leswaku ri n’wi hlasela etintshaveni ta mina hinkwato,’ ku vula Yehovha Hosi Leyi Tlakukeke. ‘Banga ra munhu un’wana ni un’wana ri ta lwa ni makwavo.+ 22 Ndzi ta n’wi avanyisa. Ndzi ta rhumela ntungu eka yena+ ni masocha yakwe. Vanhu va ta fa; ndzi ta nisa mpfula ya matimba ni xihangu+ ni ndzilo+ ni xivavula+ ehenhla ka yena ni masocha yakwe ni le ka vanhu vo tala lava a nga na vona.+ 23 Ndzi ta titlakusa ndzi tikwetsimisa, ndzi titivisa emahlweni ka matiko yo tala; ma ta swi tiva leswaku hi mina Yehovha.’