Samuwele Wo Sungula

23 Siku rin’wana ku fike xiviko eka Davhida xi ku: “Vafilista va le ku hlaseleni ka muti wa Keyila,+ va phanga swivuya.” 2 Hiloko Davhida a vutisa Yehovha+ a ku: “Xana ndzi fanele ndzi famba ndzi ya hlasela Vafilista lava?” Yehovha a hlamula Davhida a ku: “Famba u ya hlasela Vafilista u ponisa Keyila.” 3 Kambe vavanuna lava a va ri na Davhida va ku: “Vona! Hi chava ha ha ri kwala Yuda;+ swi ta va njhani loko hi ya eKeyila hi ya lwa ni Vafilista!”+ 4 Davhida a tlhela a vutisa Yehovha.+ Kutani Yehovha a n’wi hlamula a ku: “Suka u yima; rhelela u ya eKeyila hikuva ndzi ta nyiketa Vafilista evokweni ra wena.”+ 5 Xisweswo Davhida a famba ni vanhu vakwe eKeyila, a ya lwa ni Vafilista; a teka swifuwo swa vona, a tlhela a dlaya vo tala, Davhida a ponisa vaaki va muti wa Keyila.+

6 Loko Abiyatara+ n’wana wa Ahimeleke a balekela eka Davhida eKeyila, u fambe ni efodi. 7 Sawulo a kuma xiviko lexi nge: “Davhida u te eKeyila.” Kutani Sawulo a ku: “Xikwembu xi nyikete Davhida eka mina,*+ hikuva u tipfalerile hi ku ta emutini lowu nga ni tigede leti gogiwaka.” 8 Sawulo a lerisa vanhu hinkwavo ku ya enyimpini, leswaku va rhelela va ya eKeyila va ya sivelela Davhida ni vanhu vakwe. 9 Loko Davhida a twe leswaku Sawulo a a ri eku n’wi boheleni ka xikungu, a byela muprista Abiyatara a ku: “Tisa efodi haleni.”+ 10 Kutani Davhida a ku: “Hosi Yehovha Xikwembu xa Israyele, nandza wa wena u twe leswaku Sawulo u lava ku ta eKeyila a ta lovisa muti lowu hikwalaho ka mina.+ 11 Xana varhangeri* va muti wa Keyila va ta ndzi nyiketa eka yena? Xana Sawulo u ta rhelela, hilaha nandza wa wena a swi tweke hakona? Hosi Yehovha Xikwembu xa Israyele, ndzi kombela u tivisa nandza wa wena.” Yehovha a ku: “U ta rhelela.” 12 Davhida a vutisa a ku: “Xana varhangeri va muti wa Keyila va ta ndzi nyiketa evokweni ra Sawulo, mina ni vanhu va mina?” Yehovha a ku: “Va ta mi nyiketa.”

13 Xikan’wekan’we Davhida a suka a yima ni vanhu vakwe, a va ri kwalomu ka 600,+ va suka eKeyila va tsendzeleka. Loko Sawulo a vikeriwa leswaku Davhida u balekile eKeyila, a nga n’wi hlongorisanga. 14 Davhida a tshama emananga, etindhawini leti swi tikaka ku ti fikelela, endhawini ya tintshava ya mananga ya Sifi.+ Sawulo a tshamela ku n’wi lava,+ kambe Yehovha a nga n’wi nyiketanga evokweni rakwe. 15 Davhida a a swi tiva leswaku Sawulo a a hume tsima ku hlotana ni vutomi byakwe hi nkarhi lowu Davhida a a ri emananga ya Sifi eHorexe.

16 Yonathani n’wana wa Sawulo a suka a ya eka Davhida eHorexe, a fika a n’wi pfuna leswaku a kuma matimba* eka Yehovha.+ 17 U fike a ku: “U nga chavi, hikuva Sawulo tata wa mina a nge ku kumi; wena u ta va hosi eIsrayele,+ mina ndzi ta va xandla xa wena; tata wa mina Sawulo na yena wa swi tiva sweswo.”+ 18 Kutani lavambirhi va endla ntwanano+ emahlweni ka Yehovha, Davhida a sala eHorexe, Yonathani a muka.

19 Endzhakunyana ka nkarhi vavanuna va le Sifi va ya eka Sawulo eGibiya,+ va fika va ku: “Xana Davhida a nga tumbelanga ekusuhi na hina+ endhawini leyi swi tikaka ku yi fikelela eHorexe,+ exitsungeni xa Hakila+ hi le dzongeni* wa Yeximoni?+ 20 Nkarhi wun’wana ni wun’wana loko u tsakela ku ta wena hosi, tana, hina hi ta n’wi nyiketa evokweni ra hosi.”+ 21 Sawulo a ku: “Onge Yehovha a nga mi katekisa, hikuva mi ndzi twele vusiwana. 22 Ndzi kombela mi famba mi ya kumisisa kahle leswaku u le kwihi ni leswaku i mani loyi a nga n’wi vona, hikuva ndzi byeriwe leswaku a hi ku tlhariha ka yena. 23 Lavisisani mi tlhela mi kumisisa tindhawu hinkwato leti a tumbelaka eka tona, mi vuya ni vumbhoni. Kutani ndzi ta famba na n’wina, loko a ri etikweni, ndzi ta n’wi hlota exikarhi ka magidigidi hinkwawo lama nga kona eYuda.”

24 Hiloko va suka va ya eSifi+ va rhangela Sawulo, kasi Davhida ni vanhu vakwe a va ri emananga ya Mawoni+ eAraba,+ hi tlhelo ra le dzongeni ra Yeximoni. 25 Kutani Sawulo ni vanhu vakwe va ta va ta n’wi lava.+ Loko Davhida a swi twa, xikan’wekan’we a ya eribyeni+ a tshama emananga ya Mawoni. Loko Sawulo a swi twa, a ya lavana na Davhida emananga ya Mawoni. 26 Loko Sawulo a fika etlhelo ka ntshava, Davhida ni vanhu vakwe a va ri eka tlhelo lerin’wana ra ntshava yoleyo. Davhida a a ringeta ku balekela+ Sawulo hi ku hatlisa kambe Sawulo ni vanhu vakwe a va ya va tshinela swinene eka Davhida ni vanhu vakwe leswaku va va khoma.+ 27 Kambe ku fika murhumiwa a byela Sawulo a ku: “Hatlisa u vuya hikuva Vafilista va le ku hlaseleni ka tiko!” 28 Xikan’wekan’we Sawulo a tshika ku hlongorisa Davhida,+ a ya lwa ni Vafilista. Hi yona mhaka ndhawu yoleyo yi thyiwe Ribye ra ku Hambanisa.

29 Kutani Davhida a tlhandluka a suka kwalaho a ya tshama etindhawini leti swi tikaka ku ti tshinelela eEni-gedi.+