Mitirho

26 Agripa+ a ku eka Pawulo: “U pfumeleriwile ku tihlamulela.” Hiloko Pawulo a yimisa voko a sungula ku tihlamulela a ku:

2 “Mayelana ni swilo hinkwaswo leswi Vayuda va ndzi hehlaka ha swona,+ Hosi Agripa, ndza tsaka leswi namuntlha ndzi yimeke emahlweni ka wena leswaku ndzi ta tihlamulela, 3 ngopfungopfu leswi u yi tivaka kahle mindhavuko hinkwayo ya Vayuda ni ku kokelana loku va nga na kona. Hikwalaho, ndzi kombela u ndzi lehisela mbilu u ndzi yingisela.

4 “Entiyisweni, vutomi lebyi a ndzi byi hanya ku sukela evuntshweni bya mina exikarhi ka vanhu va ka hina ni le Yerusalema byi tiviwa kahle hi Vayuda hinkwavo+ 5 lava a va ndzi toloverile, loko va swi lava va nga nyikela vumbhoni leswaku a ndzi ri Mufarisi,+ naswona vukhongeri bya hina a byi ri ni milawu yo tika ku tlula ya Vayuda lavan’wana.+ 6 Kambe sweswi ndzi le ku tengisiweni hikwalaho ka ntshembo wa mina eka xitshembiso lexi Xikwembu xi xi tshembiseke vakokwa wa hina;+ 7 lexi i xitshembiso lexi tinyimba ta hina ta 12 ti languteleke leswaku xi hetiseka hi ku endlela Xikwembu ntirho wo kwetsima vusiku ni nhlikanhi hi ku tinyiketela. Wena Hosi, Vayuda+ va ndzi mangalela hikwalaho ka ntshembo lowu.

8 “Hikwalaho ka yini mi nga tshembi leswaku Xikwembu xa swi kota ku pfuxa lava feke? 9 Na mina eku sunguleni a ndzi khorwiseka leswaku ndzi fanele ndzi lwisana swinene ni vito ra Yesu wa Munazareta. 10 Sweswo ndzi swi endlile eYerusalema, ndzi pfalele vakwetsimi vo tala emakhotsweni,+ hikuva a ndzi kuma mpfumelelo wo endla tano eka vaprista lavakulu;+ naswona loko swi lava leswaku va dlayiwa, na mina a ndzi yima hi rero. 11 Ndzi ringete ku va tshikisa ripfumelo ra vona hi ku va xupula emasinagogeni hinkwawo, a ndzi va karihele ngopfu lerova ndzi va landza ni le mitini leyi nga ekusuhi.

12 “Siku rin’wana loko ndza ha endla sweswo naswona ndzi ri endleleni yo ya eDamaska, hi mpfumelelo ni xileriso xo huma eka vaprista lavakulu, 13 ninhlikanhi endleleni, wena Hosi ndzi vone ku vonakala loku tlulaka ku vangama ka dyambu ku huma etilweni ku rhendzela mina ni lava a ndzi famba na vona.+ 14 Loko hinkwerhu hi wele ehansi, ndzi twe rito ri vulavula na mina hi Xiheveru ri ku: ‘Sawulo, Sawulo, u ndzi xanisela yini? Wo tivavisa loko u lwa na mina.’* 15 Kambe ndzi te: ‘Hi wena mani Hosi?’ Kutani Hosi yi ku: ‘Hi mina Yesu loyi u n’wi xanisaka. 16 Kambe pfuka u yima. Hi yona mhaka ndzi humeleleke eka wena leswaku ndzi ku hlawula u va nandza wa mina u tlhela u va mbhoni ya swilo leswi u swi voneke ni leswi ndzi nga ta ku komba swona mayelana na mina.+ 17 Naswona ndzi ta ku ponisa eka vanhu lava ni le ka matiko lawa ndzi nga ta ku rhuma eka wona+ 18 leswaku u ya va pfula matihlo,+ u va susa emunyameni+ va ya eku vonakaleni,+ u va susa ehansi ka vulawuri bya Sathana+ va va ehansi ka vulawuri bya Xikwembu, leswaku va ta rivaleriwa swidyoho+ va tlhela va kuma ndzhaka exikarhi ka lava kwetsimisiweke hi ripfumelo ra vona eka mina.’

19 “Hikwalaho, Hosi Agripa, ndzi yingise leswi ndzi byeriweke swona swi huma etilweni 20 kutani ndzi rhange ndzi chumayela vanhu va le Damaska,+ ivi ndzi ya eka va le Yerusalema,+ ni le tikweni hinkwaro ra Yudiya ku katsa ni le ka vanhu vamatiko, ndzi va byela leswaku va fanele ku hundzuka va ya eka Xikwembu hi ku endla mitirho leyi kombisaka leswaku va hundzukile.+ 21 Sweswo hi swona swi endleke Vayuda va ndzi khoma etempeleni, va ringeta ku ndzi dlaya.+ 22 Hambiswiritano, leswi Xikwembu xi ndzi pfuneke, ndza ha ya emahlweni ku ta fikela namuntlha ndzi chumayela lavakulu ni lavatsongo ndzi va byela ntsena leswi Vaprofeta na Muxe va vuleke leswaku swi ta endleka+— 23 leswaku Kreste a a ta xaniseka,+ nileswaku leswi a a ri wo sungula ku pfuxiwa eka lava feke+ a a ta chumayela ni ku voningela vanhu lava ni le ka matiko.”+

24 Loko Pawulo a ha vula mhaka leyi leswaku a tihlamulela, Festo a huwelela a ku: “Wa penga, wena Pawulo! Ku dyondza ngopfu swa ku pengisa!” 25 Kambe Pawulo a ku: “A ndzi pengi, Muchaviseki Festo, kambe ndzi vulavula ntiyiso naswona leswi ndzi swi vulaka swa twisiseka. 26 Kahlekahle, hosi leyi ndzi vulavulaka na yona sweswi hi ku tshunxeka, yi swi tiva kahle swilo leswi; ndza tiyiseka leswaku swilo leswi hinkwaswo ya swi tiva hikuva a xi kona na xin’we eka swona lexi endliweke exihundleni.+ 27 Xana wena, Hosi Agripa, wa va tshemba Vaprofeta? Ndza swi tiva leswaku wa va tshemba.” 28 Kambe Agripa a ku eka Pawulo: “U nga ndzi hundzula Mukreste hi xinkarhana.” 29 Hiloko Pawulo a ku: “Ndza khongela eka Xikwembu leswaku ku nga khathariseki leswaku hi xinkarhana kumbe hi nkarhi wo leha ku nga vi wena ntsena kambe ni hinkwavo lava ndzi yingiseke namuntlha va fana na mina kambe va nga bohiwanga hi timpecana leti.”

30 Kutani hosi yi suka yi yima ku landzela ndhunankulu na Bernike ni vavanuna lava a va tshame na vona. 31 Kambe loko va ri karhi va famba, va sungula ku vulavurisana va ku: “Munhu loyi a nga endlanga nchumu lexi faneriwaka hi rifu kumbe ku pfaleriwa.”+ 32 Hiloko Agripa a byela Festo a ku: “Munhu loyi a a ta va a tshunxiwile loko a a nga kombelanga ku avanyisiwa hi Khezari.”+