Swivuriso

11 Swikalo swa vukanganyisi swa nyenyetsa eka Yehovha,

Kambe mpimo lowunene wa n’wi tsakisa.+

 2 Lava tikukumuxaka va ta khomiwa hi tingana,+

Kambe va tlharihile lava titsongahataka.+

 3 Ku tshembeka ka lavo lulama hi kona ku va kongomisaka,+

Kambe vukanganyisi bya lava kanganyisaka van’wana byi ta va lovisa.+

 4 Rifuwo* a ri nge pfuni nchumu hi siku ra ku hlundzuka ka Xikwembu,+

Kambe ku lulama hi kona ku nga ponisaka munhu eku feni.+

 5 Ku lulama ka loyi a nga riki na xisolo ku endla ndlela yakwe yi lulama,

Kambe lowo homboloka u ta wa hikwalaho ka ku homboloka kakwe.+

 6 Ku tshembeka ka lavo lulama ku ta va ponisa,+

Kambe lava kanganyisaka va ta phasiwa hi ku navela ka vona.+

 7 Loko munhu wo homboloka a fa, ntshembo wakwe wa hela;

Hambi ku ri ku langutela loku nga le matimbeni yakwe na kona ka hela.+

 8 Lowo lulama wa ponisiwa emaxangwini,

Naswona lowo homboloka u tshama endhawini yakwe.+

 9 Mugwinehi* u lovisa munhukulobye hi nomu wakwe,

Kambe lavo lulama va ponisiwa hikwalaho ka vutivi.+

10 Vunene bya lavo lulama byi endla leswaku muti wu tsaka,

Naswona loko lavo homboloka va fa vanhu va huwelela hi ku tsaka.+

11 Muti wa tlakusiwa hikwalaho ka lavo lulama,+

Kambe nomu wa lavo homboloka wa wu hirimuxa.+

12 Loyi a nga xihunguki u n’wi langutela ehansi nakulobye,

Kambe munhu loyi a nga ni ku twisisa u tshama a miyerile.+

13 Munhu wo hleva u paluxa xihundla,+

Kambe loyi a tshembekaka u hlayisa mhaka leyi nga xihundla.

14 Laha ku nga riki na nkongomiso wa vutlhari, vanhu va xaniseka,

Kambe laha ku nga ni vatsundzuxi vo tala swilo swi famba kahle.+

15 Loyi a endlaka xitiyisekiso xo lomba mufambi mali a swi nge n’wi fambeli kahle,+

Kambe loyi a papalataka* ku endla xitshembiso lexikulu hi ku qhavulana u ta sirheleleka.

16 Wansati loyi a nga ni mahanyelo lamanene wa xiximeka,+

Kambe vavanuna lava nga ni tihanyi va teka rifuwo.

17 Loyi a nga ni musa* wa tsaka,+

Kambe loyi a nga ni tihanyi u tivangela khombo.*+

18 Lowo homboloka u kuma muholo wa vukanganyisi,+

Kambe loyi a byalaka leswi lulameke, u ta kuma hakelo leyinene.+

19 Loyi a endlaka swilo leswi lulameke u ta kuma vutomi,+

Kambe loyi a endlaka swilo swo biha u ta fa.

20 Lava hombolokeke embilwini va n’wi nyenyetsa Yehovha,+

Kambe lava nga riki na xisolo va n’wi tsakisa.+

21 Tiyiseka hi leswi: A nga kona munhu wo biha loyi a nga ta ka a nga xupuriwi,+

Kambe vana va lavo lulama va ta baleka.

22 Wansati wo saseka kambe a fularhela leswinene

U fana ni xingwavila xa nsuku enhompfini ya nguluve.

23 Ku navela ka lavo lulama ku yisa eku lulameni,+

Kambe ntshembo wa lavo homboloka wu yisa eku hlundzukeni.

24 Munhu wa hanana* kambe a sala ni swo tala;+

Kasi un’wana wa tsonana kambe a sala a ri xisiwana.+

25 Loyi a hananaka u ta humelela,*+

Ni loyi a nyikaka van’wana mati va nwa na yena u ta nyikiwa mati a nwa.+

26 Loyi a alaka ni mavele vanhu va ta n’wi rhukana,

Kambe loyi a ma xavisaka va ta n’wi katekisa.

27 Loyi a tikarhatelaka ku endla swilo leswinene u ta kombiwa tintswalo,+

Kambe loyi a lavisisaka swilo swo biha, sweswo hi swona leswi nga ta n’wi wela.+

28 Loyi a tshembaka rifuwo rakwe u ta wa,+

Kambe lavo lulama va ta hluka ku fana ni matluka.+

29 Loyi a tisaka khombo endyangwini wakwe u ta kuma moya,+

Naswona xiphukuphuku xi ta va nandza wa munhu wo tlhariha.

30 Mitirho ya munhu wo lulama i murhi wa vutomi,+

Loyi a kumaka vutomi u tlharihile.+

31 Loko lowo lulama a kuma hakelo yakwe emisaveni,

Lowo homboloka ni mudyohi va ta kuma hakelo ya vona hilaha ku engetelekeke!+