Munghana Wa Hina Lonkulu U Le Xivandleni Xa Mimoya

BIBELE yi hi nyika nhlamuselo leyi twisisekaka mayelana ni lava tshamaka exivandleni xa moya. Yehovha Xikwembu hi lonkulu etilweni. Yesu Kreste u landzela Yehovha hi matimba ni hi vulawuri. Tintsumi leti tshembekaka eka Xikwembu ti tirhela Xikwembu ni vanhu va xona emisaveni. Sathana ni madimona yakwe va kaneta Xikwembu, naswona va kanganyisa vanhu. Lava feke va etlele, va rindzele ku pfuxiwa hi Xikwembu.

Madimona Ma Lava Hi Ma Gandzela

Tanihi leswi vafi va nga hanyiki, ku hava lexi hi nga vuyeriwaka ha xona hi ku va gandzela. Ku endlela vafi magandzelo i ku kurisa vunwa bya Sathana ni madimona.

Xana tintsumi ta Xikwembu ti lava leswaku hi ti gandzela? Nikatsongo! Tintsumi leto tshembeka ti tlakusa Xikwembu ni ku khutaza vanhu ku endlisa sweswo. Kambirhi, muapostola Yohane u ringete ku gandzela tintsumi, kambe ti n’wi tshinyile ti ku: “U nga tshuki u endla sweswo, . . . Gandzela Xikwembu!”—Nhlavutelo 19:10; 22:8, 9.

Sathana ni madimona yakwe, ku hambana ni tintsumi leto tshembeka, va lava ku gandzeriwa ni ku tlakusiwa. Leswi swi vonake loko Sathana a ringe Yesu, loko Yesu a ha ri munhu emisaveni. Bibele ya hlamusela: “Diyavulosi a engeta a . . . yisa [Yesu] entshaveni leyo leha ngopfu, a n’wi komba mimfumo hinkwayo ya misava ni ku dzuneka ka yona, kutani a ku ka yena: ‘Swilo leswi hinkwaswo ndzi ta ku nyika swona loko u ndzi nkhinsamela, u ndzi gandzela.’”—Matewu 4:8, 9.

Yesu a hlamula a ku: “Suka Sathana, hikuva ku tsariwile leswi: ‘U ta gandzela Hosi, Xikwembu xa wena u tirhela xona ntsena.’” (Matewu 4:10) Yesu a a wu tiva Nawu wa Yehovha, kutani u ale ku wu tlula.—Deteronoma 6:13.

Hambileswi Sathana a tsandzekeke ku endla leswaku Yesu a n’wi gandzela, u swi kotile eka van’wana vanhu. I ntiyiso, a va talanga vanhu lava gandzelaka Sathana ha vomu. Hambiswiritano, hi vukanganyisi, vuxisi, mavunwa, ni hi ku chavisa vanhu, Sathana ni madimona yakwe va hambukise vo tala ngopfu evugandzerini bya ntiyiso bya Yehovha lerova muapostola Yohane a tsale a ku: “Misava hinkwayo yi le hansi ka matimba ya Lowo biha.” (1 Yohane 5:19) Lava va gandzelaka hi tindlela leti lwisanaka ni Rito ra Xikwembu va fundzha Sathana, ku nga ri Yehovha. Bibele ya tsundzuxa: “Loko vamatiko va gandzela, va gandzela mademona, a va gandzeli Xikwembu.”—1 Vakorinto 10:20.

Ku Fanele Ku Gandzeriwa Yehovha

Vugandzeri bya hina byi fanele byi kongomisiwa eka Xikwembu ntsena. Yehovha u byele Muxe a ku: “U nga ṭhuki u tiendlela šifaniso le’ši v̌atliweke, ni loko ši ri šifaniso šihi ni šihi ša ŝilo le’ŝi nge henhla etilweni, ni loko ši ri ša ŝilo le’ŝi nge hansi e misav̌eni, ni loko ši ri ša ŝilo le’ŝi nge matini, e hansi ka misav̌a; u nga ṭhuki u ŝi nkhisamela, ni loko ku ri ku ŝi tirela; hikuv̌a hi mina Yehova, Šikwembu ša wena.”—Eksoda 20:3-5.

Hambileswi Yehovha a tlakukeke ku tlurisa, wa tshineleleka. Mudyondzisiwa Yakobo u tsale a ku: “Tshinelani kusuhi ni Xikwembu kutani xi ta tshinela kusuhi na n’wina.” (Yakobo 4:8) Muapostola Pawulo u te: “Xikwembu, a xi le kule ni un’wana ni un’wana wa hina.” (Mintirho 17:27) Naswona muapostola Yohane u tsale a ku: “Kutani ku tshemba loku hi nga na kona emahlweni ka [Yehovha], hileswaku loko hi kombela xilo xihi na xihi hilaha hi rhandzaka hakona, [wa] hi twa. Kutani loko hi tiva leswaku [wa] hi twa eka hinkwaswo leswi hi swi kombelaka, ha tiva leswaku hi kumile leswi hi swi kombeleke eka [yena].”—1 Yohane 5:14, 15.

Xiya leswaku Yohane u tsale leswaku Yehovha u ta hi endlela leswi hi swi lavaka loko hi kombela “hilaha [a] rhandzaka hakona.” Leswaku hi tiva leswaku i yini leswi Xikwembu xi swi rhandzaka, hi fanele hi dyondza leswi Bibele yi swi dyondzisaka. Timbhoni ta Yehovha ti nga tsakela ku ku pfuna ku twisisa Bibele.

Loko u ri karhi u dyondza leswi engetelekeke hi Yehovha, u ta va ni vutivi lebyi engetelekeke hi lava va hanyaka exivandleni xa moya. Vutivi lebyi byi ntshunxa eka vukholwa-hava, tidyondzo ni mikhuva leyi Sathana a yi tirhisaka ku chavisa vanhu ni ku va endla mahlonga. Hi vutivi lebyi kongomeke bya Xikwembu, u ta dyondza ku xi tshemba leswaku xi ku pfuna ku papalata kumbe ku hlula swiphiqo swa siku na siku swa vutomi. U nga va munghana wa Xikwembu. Kutani eka wena Xikwembu xi ta va “v̌utšhav̌elo . . . ni matimba . . . , [ni] ku pfuna lo’ku kumiwaka kusuhi e mapfalweni.”—Pisalema 46:1.

Mavuthu Yo Homboloka Ma Ta Herisiwa

U nga kanakani leswaku mavuthu ya moya yo lulama ma ta hlula mavuthu ya moya layo homboloka. Exivandleni xa moya, ana se ku ve ni nyimpi leyi lwiweke leyi basiseke matilo, ku susiwa Sathana ni vanghana vakwe vo homboloka. Buku ya Nhlavutelo yi ri: “Kutani ku pfuka nyimpi etilweni, ya Mikaele [Yesu Kreste la pfuxiweke] ni tintsumi ta yena loko va lwa ni dragona; na yona dragona yi lwa yi ri ni tintsumi ta yona. Kambe dragona yi hluriwa, yi nga ha pfumeleriwi ku tshama etilweni, yona ni tintsumi ta yona. Hiloko dragona leyikulu leyi yi cukumetiwa yi ya wela hansi, yona nyoka ya khale leyi vuriwaka Diyavulosi kumbe Sathana, Mukanganyisi wa misava hinkwayo; yi cukumetiwa yi ya wela ehansi emisaveni, tintsumi ta yona na tona ti cukumetiwa kun’we na yona.”—Nhlavutelo 12:7-9.

Xana vuyelo bya nyimpi yoleyo byi ve byihi? Xiviko xi ya emahlweni: “Hikokwalaho, tsakani n’wina matilo, na n’wina lava akeke eka wona; kambe mi ni khombo, n’wina misava ni lwandle, hikuva Diyavulosi ú xikele ka n’wina; ú karihile ngopfu hi ku tiva leswaku nkarhi wa yena wu komile.” (Nhlavutelo 12:12) Lava nga etilweni a va fanele ku tsaka, hikuva Sathana ni madimona yakwe a va nga ha ta va karhata kwale. Hambiswiritano, ku cukumetiwa ka yena a suka etilweni, swi tise khombo lerikulu, ku karhateka lokukulu, eka lava nga emisaveni. Sweswi hi hanya enkarhini wa khombo.—2 Timotiya 3:1-5.

Vumundzuku Lebyi Nga Riki Na Vubihi

Kambe, Bibele yi tlhela yi nyikela ntshembo. Yi hi tiyisekisa leswaku Diyavulosi u saleriwe hi ‘nkarhi wo koma’ a nga si herisiwa. Loko sweswo swi humelela, Yehovha u ta tisa mikateko leyinene eka hinkwavo emisaveni lava lavaka ku va vanghana va yena. Xiya switshembiso swa yena swi nga ri swingani swa nkarhi lowu taka:

“Ku ta v̌a ni nḍalo ya koro la misaveni ni le tihlohlorini ta tinṭhav̌a.”—Pisalema 72:16.

“V̌ahlawuriwa v̌a mina v̌a ta ṭakela ntiro wa mav̌oko ya vona. V̌a nga ha tikarateli ŝa hav̌a.”—Esaya 65:22, 23.

“A ku nga v̌i na munhu l’a akeke [kona] l’a nga ta ku: Nḍa v̌abya!”—Esaya 33:24.

“Hi laha mahlo ya v̌o-fe-mahlo ma nga ta hanyanya, ni tindlev̌e le’ti siv̌ekeke ti nga ta pfuleka; ŝilema ŝi ta tlula kukota tinhlangu, kutani ririmi ra mbev̌ev̌e ri ta yimbelela hi ku ṭaka.”—Esaya 35:5, 6.

“[Xikwembu] xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”—Nhlavutelo 21:4.

“La’v̌o lulama v̌a ta fuma misav̌a, v̌a ta ṭhama ka yona hi masiku.”—Pisalema 37:29.

I Yehovha ntsena, Xikwembu xa ntiyiso, la nga hetisisaka switshembiso leswinene swonghasi. Ku hava lexi nga n’wi sivelaka ku hetisisa xikongomelo xakwe. “A ku na xilo na xin’we lexi hlulaka Xikwembu.”—Luka 1:37.

[Xifaniso lexi nga eka tluka 1]

Loko u kala u va munghana wa Xikwembu xi ta ku pfuna ku langutana ni swiphiqo swa vutomi