Xana Ku Kula Swi Fambisana Ni Ntsako?
NKARHI i 6:30 nimixo naswona xirhami xi vuyisa ni n’wana evukatini eSoweto, laha Afrika Dzonga. Evelyn u fanele a pfuka.a Endlwini yakwe leyi pfumalaka hitara, wa fa hi xirhami.
U swoswa matsolo yakwe lama pandzaka hikwalaho ka vuvabyi bya marhambu a tshame emakumu ka mubedo wakwe. Kutani a tshamanyana a tiyingisela. Hakatsongo-tsongo ku vava loku nga emilengeni ya yena ka hunguteka. Evelyn wa tiseketela, kutani a yima. Wa gomela hikwalaho ka switlhavi. Evelyn wa khwita a kongoma ekamareni ro hlambela eka rona a tikhome tinyonga ku fana ni ‘njiya leyi tikokaka.’—Eklesiasta 12:5.b
‘Ndzi yi lwile!’ Evelyn u swi teka tanihi ku humelela. U kote ku ri vona rixa, naswona u tlhele a kota ni ku famba-famba hambileswi miri wa yena wu vavaka.
Hambiswiritano, ku ni nchumu wun’wana lowu n’wi karhataka. Evelyn u ri: “Ndza karhateka loko ndzi ehleketa leswaku byongo bya mina a byi nge he ‘tirhi kahle.’” Minkarhi yo tala u rivala laha a vekeke kona makhiya, kambe byongo byakwe bya ha tirha kahle. Evelyn u ri: “Ndzi khongelela leswaku ndzi nga lahlekeriwi hi dzano ku fana ni vanhu van’wana lava kuleke.”
Loko a ha ritsongo, Evelyn a nga kalanga a ehleketa hi leswi humelelaka loko vanhu va dyuhala. Ku nga ri kungani se a a swi xiya leswaku malembe ma fambile naswona miri wakwe a wu tshamela ku n’wi tsundzuxa leswaku u ni malembe ya 74 hi vukhale.
Van’wana lava hanyeke kahle ku tlula Evelyn lava nga riki ni swifo leswikulu naswona va nga riki ni ntshikilelo va teka malembe ya ku dyuhala tanihi malembe lama tisaka ntsako. Ku fana ni kokwa wa hina Abrahama, va nga ha ‘dyuhala swinene, va kula naswona va eneriseka.’ (Genesa 25:8) Van’wana va tokota “masiku ni malembe ya khombo” naswona va nga ha ku: “A ndzi byi tsakeli vutomi.” (Eklesiasta 12:1, Today’s English Version) Eka nkambisiso wun’wana vanhu vo tala va teke ku huma mudende hi ndlela leyi nga riki yinene lerova magazini wa Newsweek wu ringanyeta leswaku malembe lama tisaka ntsako ma vuriwa “Malembe ya Munyama.”
Xana u ku languta njhani ku dyuhala? Hi yihi mintlhontlho yin’wana leyi vadyuhari va langutanaka na yona? Xana swo boha leswaku munhu la kuleke a lahlekeriwa hi dzano? I yini lexi nga endliwaka leswaku munhu a va ni ku rhula ka mianakanyo emalembeni ya yena ya vudyuhari?
[Tinhlamuselo ta le hansi]
a Mavito man’wana ma cinciwile eka ntlhandlamano lowu.
b Ndzimana leyi nga ebukwini ya Bibele ya Eklesiasta i khale yi tekiwa tanihi mavekelo ya vutlhokovetseri lama hlamuselaka swiphiqo leswi munhu a hlangavetanaka na swona loko a dyuhala.