Xana Vulwembu Bya Puma Byi Ni Musunguri Wa Byona?
◼ Byi vevuka ngopfu ku tlula na harani, kambe byi tiye ku tlula ni nsimbi. Se ku hele makume ya malembe vativi va sayense va ri karhi va kambisisa vulwembu lebyi endliwaka hi mapuma. Vulwembu lebyi tiyeke swinene eka mixaka leya nkombo leyi mapuma lawa ma byi endlaka byi koke rinoko ra vanhu vo tala. Byi tiye ngopfu ku tlula lebyi endliwaka hi xivungu lexi endlaka silika, lebyi hi ntolovelo byi tirhisiwaka ku endla swiambalo.
Anakanya: Harani leyi vitaniwaka Kevlar loko yi endliwa ya swekiwa yi tlhela yi cheriwa asidi ya sulfur. Ku hambana ni sweswo, puma ri endlela vulwembu bya rona ekhwirini naswona ri byi olovisa hi mati. Ku engetela kwalaho, vulwembu lebyi tiyeke ngopfu bya puma byi tsindziyele ku tlula harani ya Kevlar. Loko wo byi vumba byi anama ku ringana ni rivala ra mintlangu, byi nga phasa xihaha-mpfhuka lexikulu xi yima!
A swi hlamarisi leswi valavisisi va tsakisiwaka swinene hi ku tsindziyela ka vulwembu lebyi tiyeke swinene. Aimee Cunningham u tsarile eka magazini lowu vuriwaka Science News a ku: “Vativi va sayense va lava ku endla nchumu wo tsindziyela wu tlhela wu tiya ku fana ni vulwembu lebyi tiyeke swinene, lowu nga tirhisiwaka ku endla swiambalo swo sivela makulu ni tintambu leti tirhisiwaka ku tiyisa mabuloho.”
Kambe ku endla vulwembu lebyo tiya a hi matlangwana hikuva vulwembu bya mapuma lebyo tiya ma byi endlela emakhwirini ya wona naswona ndlela leyi byi endlekaka ha yona endzeni ka wona a yi si twisisiwa hi ku helela. Magazini wun’wana wa Chemical & Engineering News wu tshahe marito ya Cheryl Y. Hayashi la dyondzeleke ntivo-vutomi, wu ku: “Swi khomisa tingana ku xiya leswaku vanhu vo tala lavo tlhariha va le ku ringeteni ka ku kopela leswi mapuma ma swi endlaka hi ntumbuluko.”
Wena u swi vonisa ku yini? Xana puma ni vulwembu bya rona lebyo tiya onge nsimbi swi lo tiendlekela, kumbe swi endliwe hi Muvumbi la tlhariheke ngopfu?
[Xifaniso eka tluka 24]
Xifaniso lexi kurisiweke xa puma loko ri ri karhi ri humesa vulwembu
[N’wini wa Xifaniso]
Copyright Dennis Kunkel Microscopy, Inc.