11 Ku gingiriteka

Vanhu lava gingiritekaka a va wu chavi ntirho. Va tsakela ku tirha hi matimba leswaku va kuma leswi va swi lavaka ni ku pfuna van’wana hambiloko van’wana va nga wu xiyi ntirho lowu va wu endlaka.

Loko hi ri karhi hi hanya ku ni swilo swo tala leswi hi faneleke hi swi endla. Hambileswi vanhu vo tala namuntlha va nga swi tsakeliki ku tirha hi matimba, ku gingiriteka swi ta ku vuyerisa swinene.—Eklesiasta 3:13.

“Ndzi dyondze leswaku loko u tirha hi matimba, wa tinyungubyisa u tlhela u eneriseka. Ku eneriseka koloko ku ndzi endle leswaku ndzi rhandza ku tirha. Ku gingiriteka swi ta endla leswaku u va ni ndhuma leyinene.”—Reyon.

NSINYA WA NAWU WA LE BIBELENI: “Ku ni vuyelo lebyinene eka ku tikarhata ka muxaka wun’wana ni wun’wana.”—Swivuriso 14:23.

Tikarhatele ku va ni langutelo lerinene hi ntirho hi ku landzela magoza lama hlamuseriweke laha hansi.

Tinyungubyise hi ntirho lowu u wu endlaka. Hambiloko u endla mitirho ya le kaya, ntirho wa xikolo kumbe u endla ntirho wo tihanyisa, tinyiketele eka leswi u swi endlaka. Loko ku ri ni ntirho lowu u kotaka ku wu endla, lava tindlela to antswisa ni ku wu endla hi ku hatlisa. Loko u ya u wu tiva kahle, u ta tiphina hi ntirho wa wena.

NSINYA WA NAWU WA LE BIBELENI: “Xana u n’wi vonile munhu la nga ni vuswikoti entirhweni wakwe? U ta yima emahlweni ka tihosi; a nge yimi emahlweni ka vanhu lava tolovelekeke.”—Swivuriso 22:29.

Vona leswi nga swa nkoka. Mikarhi yo tala, loko u endla mitirho ya wena kahle, u vuyerisa van’wana. Hi xikombiso, loko u gingiriteka ekaya, u hungutela swirho leswin’wana swa ndyangu ntirho.

NSINYA WA NAWU WA LE BIBELENI: “Ku nyika swi tisa ntsako lowukulu ku tlula ku amukela.”—Mintirho 20:35.

Endla leswi engetelekeke. Ematshan’weni yo endla mitirho leyi u averiweke yona ntsena, ringeta ni ku endla leyi engetelekeke. Loko u endla tano, swi kombisa leswaku u ni vutihlamuleri, hikuva u endla tano handle ko sindzisiwa kambe hikwalaho ka leswi u swi rhandzaka.—Matewu 5:41.

NSINYA WA NAWU WA LE BIBELENI: “Xiendlo xa wena lexinene xi nga vi xa ku sindzisiwa, kambe xi va xa ku tirhandzela.”—Filemoni 14.

Ringanisela. Vanhu lava gingiritekaka a va lolohi naswona a va tidlayi hi ntirho. Va ringanisela, va tiphina hi ku tirha hi matimba va tlhela va wisa.

NSINYA WA NAWU WA LE BIBELENI: “Voko leri teleke ku wisa ra antswa ku ri ni mavoko mambirhi lama teleke ntirho wa matimba ni ku hlongorisa mheho.”—Eklesiasta 4:6.