Leswi Nga Endzeni

Eka Muhlayi:

Xana u vona onge Xikwembu xi nga va nga munghana wa wena? Vanhu vo tala va vona sweswo ku ri norho. Van’wana va ehleketa leswaku xi le kule ngopfu; van’wana va vona swi nga va faneli ku va munghana wa Xikwembu. Hambiswiritano, hi rirhandzu Bibele yi hi khutaza yi ku: “Tshinelani eka Xikwembu, kutani xi ta tshinela eka n’wina.” (Yakobo 4:8) Xi tlhela xi tiyisekisa vagandzeri va xona xi ku: “Mina, Yehovha Xikwembu xa wena, ndzi khoma voko ra wena ra xinene, Loyi a ku byelaka a ku, ‘U nga chavi. Ndzi ta ku pfuna.’”—Esaya 41:13.

Hi nga endla yini leswaku hi va vanghana lavakulu va Xikwembu? Munghana lonkulu i munhu loyi hi n’wi tivaka kahle, hi tiva ndlela leyi a ehleketaka ni ku endla swilo ha yona naswona hi rhandza vumunhu byakwe. Loko hi lava ku va vanghana lavakulu va Yehovha, hi fanele hi dyondza eBibeleni leswaku u njhani hi tlhela hi tiva ndlela leyi a ehleketaka ni ku endla swilo ha yona. Hi fanele hi anakanyisisa swinene hi ndlela leyi Yehovha a byi kombisaka ha yona vumunhu byakwe, ndlela leyi Yesu Kreste a n’wi tekeleleke ha yona Tata wakwe ni ndlela leyi na hina hi nga byi kombisaka ha yona vumunhu lebyi, leswaku hi ta kota ku tshinela ekusuhi ni Xikwembu. Hi ta swi vona leswaku Yehovha i Mufumi lonene loyi hinkwerhu hi n’wi lavaka. Tata wa hina Yehovha u ni matimba, vululami, vutlhari ni rirhandzu naswona a nge pfuki a fularhele vana vakwe vo tshembeka.

Onge buku leyi yi nga ku pfuna ku tshinela ekusuhi swinene na Yehovha Xikwembu, u va munghana wakwe hilaha ku nga heriki, leswaku u ta hanyela ku n’wi dzunisa.