Ku Chumayela Mahungu Lamanene eMisaveni Hinkwayo

U LUNGHISELELA ku ya ensin’wini nimixo hi siku leri u nga yangiki entirhweni. Wa kanakana katsongo naswona u titwa u karhele. U twa u navela ku wisanyana mixo wolowo! Kambe u khongela hi mhaka yoleyo kutani u tiyimisela ku ya. U tirha ni makwerhu wa xisati loyi a tshembekeke la dyuhaleke naswona ku tiyisela ni musa wakwe swa ku khutaza. Kutani loko u ri karhi u chumayela rungula ra ntiyiso hi yindlu ni yindlu, u xiya leswaku vamakwerhu emisaveni hinkwayo va chumayela rungula leri fanaka va tirhisa minkandziyiso leyi fanaka, hinkwavo va vuyeriwa eka ndzetelo lowu fanaka. Loko u fika ekaya, u titwa u ri ni matimba. Wa tsaka hileswi u nga tshamangiki ekaya!

Namuntlha, vutirheli bya Mfumo wa Xikwembu i bya nkoka eka Mukreste. Yesu u profete leswaku ntirho wo chumayela a wu ta andza hi ndlela leyi hlamarisaka emasikwini yo hetelela. (Mat. 24:​14) Xana vuprofeta byakwe byi hetiseke njhani? Eka xiyenge lexi, hi ta bula hi vanhu, maendlelo ni switirhisiwa leswi veke swa nkoka swinene evutirhelini bya Vukreste, leswi pfunaka vanhu va timiliyoni emisaveni leswaku va teka Mfumo wa Xikwembu tanihi lowu nga wa xiviri.