Yehovha U Hambete A Seketela Yosefa

Loko Yosefa a ri ekhotsweni, Faro hosi ya le Egipta u lorhe milorho leyi a ku nga ri na munhu loyi a a kota ku yi hlamusela. Un’wana wa malandza yakwe u n’wi byele leswaku Yosefa a nga swi kota ku n’wi hlamusela milorho yoleyo. Hi ku hatlisa, Faro u lerise leswaku ku ya vitaniwa Yosefa.

Faro u n’wi vutisile a ku: ‘Xana u nga swi kota ku ndzi hlamusela milorho ya mina?’ Yosefa u byele Faro a ku: ‘Tiko ra Egipta ri ta va ni swakudya swo tala ku ringana malembe ya nkombo, endzhaku ka sweswo ku ta va ni ndlala ku ringana malembe man’wana ya nkombo. Hlawula munhu wo tlhariha leswaku a hlengeleta swakudya leswaku vanhu va wena va ta ka va nga dlayiwi hi ndlala.’ Faro u te: ‘Ndzi hlawula wena! U ta va ndhunankulu etikweni hinkwaro!’ Yosefa u swi tive njhani leswi milorho ya Faro a yi vula swona? U pfuniwe hi Yehovha.

Eka malembe lama landzeleke ya nkombo, Yosefa u hlengelete swakudya. Endzhaku ka sweswo, ku ve ni dyandza emisaveni hinkwayo hilaha Yosefa a vuleke hakona. Vanhu a va suka ematikweni yo hambanahambana va ta xava swakudya eka Yosefa. Loko tata wakwe Yakobo a twe leswaku ku ni swakudya le Egipta, u rhumele vana vakwe va khume leswaku va ya xava swakudya.

Loko vana va Yakobo va fika, Yosefa u hatle a va tiva. Kambe vabuti wakwe a va nga swi tivi leswaku a ku ri Yosefa. Va fike va khinsama emahlweni ka yena hilaha a lorheke hakona loko a ha ri ntsongo. Yosefa a a lava ku vona loko vabuti wakwe va ha ri ni nsele. Hikwalaho, u va hehle a ku: ‘Mi tinhlori! Mi tele ku ta vona ndlela leyi mi nga hlaselaka tiko ha yona!’ Kambe vona va te: ‘E-e! Hi vana lava ringanaka 12 hi huma eKanana. Makwerhu un’wana u file kasi lontsongo eka hina u sale na tatana.’ Kutani Yosefa u te: ‘Landzani makwavo wa n’wina lontsongo, hi kona ndzi nga ta mi tshemba.’ Kutani va tlhelele ekaya eka tata wa vona.

Loko swakudya swi tlhele swi hela, Yakobo u tlhele a rhuma vana vakwe leswaku va ya xava swakudya le Egipta. Va fambe na Benjamini, makwavo wa vona lontsongo. Leswaku a ringa vabuti wakwe, Yosefa u tumbete xinwelo xakwe xa silivhere enkwameni wa Benjamini, lowu a wu ri ni mavele ivi a va lumbeta leswaku va xi yivile. Loko malandza ya Yosefa ma kume xinwelo xexo enkwameni wa Benjamini, vamakwavo va hlamarile swinene. Va kombele Yosefa leswaku a xupula vona ematshan’weni ya Benjamini.

Yosefa u swi xiyile leswaku vabuti wakwe va hundzukile. Yosefa u tsandzeke ku tikhoma ivi a sungula ku rila, a ku: ‘Hi mina Yosefa makwenu wa n’wina. Xana tatana wa ha hanya?’ Vabuti wakwe va hlamarile swinene. Kutani a ku eka vona: ‘Mi nga twi ku vava hikwalaho ka leswi mi ndzi xaviseke. Xikwembu xi ndzi rhumele laha leswaku ndzi ta ponisa vutomi bya n’wina. Sweswi landzani tatana mi ta na yena laha.’

Va fike ekaya va byela tata wa vona mahungu wolawo yo tsakisa ivi va n’wi teka va ya na yena Egipta. Yosefa ni tata wakwe va tlhele va hlangana endzhaku ka malembe yo tala swinene.