Vutomi Ni Vutirheli Bya Yesu

Loko Lazaro A Pfuxiwa

YESU, kun’we ni lava va nga na yena, manuku va fika esirheni ra Lazaro. Kahle-kahle, i bako leri pfariweke hi ribye. “Susani ribye!” ku vula Yesu.

Marta wa ala, a nga si twisisa lexi Yesu a lavaka ku xi endla. “Hosi,” ku vula yena, “sweswi ku fanele ku va na ku nun’hwa, hikuva u ni mune wa masiku a file.”

Kambe Yesu wa vutisa a ku: “Xana a ndzi ku byelanga leswaku loko u pfumela, u ta vona ku kwetsima ka Xikwembu xana?”

Kutani ribye ra susiwa. Manuku Yesu a languta ehenhla ivi a khongela a ku: “Tatana, ndza ku nkhensa, hikuva u ndzi yingisile. Mina ndzi swi tivile leswaku masiku hinkwawo wa ndzi yingisa, kambe ndzi vurile swilo leswi hikwalaho ka ntshungu lowu yimeke kwala, leswaku va ta pfumela leswaku hi wena la ndzi rhumeke.” Yesu u khongela erivaleni leswaku vanhu va ta swi tiva leswaku leswi a lavaka ku swi endla swi ta hetisisiwa hi matimba lama a ma amukeleke eka Xikwembu. Manuku u huwelela hi rito lerikulu a ku: “Lazaro, humela handle!”

Kutani, Lazaro a huma. Mavoko ni milenge ya yena a swa ha tsondzeriwe hi tinguvu to lahla vafi, naswona xikandza xa yena xi phutseriwe hi duku. “N’wi ntshunxeni, leswaku a kota ku muka,” ku vula Yesu.

Loko va vone hlori leri, Vayuda vo tala lava a va tile ku ta chavelela Mariya na Marta va pfumela eka Yesu. Hambi swi ri tano, van’wana va sukile va ya byela Vafarisi leswi swi humeleleke. Vona ni vaprista lavakulu hi xihatla va lunghiselele nhlangano wa Sanedri, huvo leyikulu ya Vayuda.

Sanedri yi vumbiwe hi Vafarisi ni Vasaduki, ku katsa ni vaprista lavakulu, Kayafasi muprista lonkulu hi nkarhi wolowo ni khale ka vaprista lavakulu. Vona va vilela va ku: “Hi ta endla yini xana, leswi munhu loyi a endlaka mahlori layo tala? Loko hi n’wi tshikisa sweswo, hinkwavo va ta pfumela ka yena, kutani Varhoma va ta ta va ta lovisa ndhawu leyi ya hina, ni ku hi teka hi rixaka.”

Hambi loko varhangeri va vukhongeri va pfumela leswaku Yesu ‘u endla mahlori layo tala,’ leswi va vilelaka ngopfu hi swona i swiyimo ni swikhundla swa vona vini. Ngopfu-ngopfu ku pfuxiwa ka Lazaro i nkhavi wa matimba eka Vasaduki, tanihi leswi va nga pfumeriki eku pfuxiweni ka vafi.

Kayafasi, loyi kumbexana a nga Musaduki, manuku wa vulavula, a ku: “A mi tivi nchumu n’wina; xana a mi voni leswaku hi leswi swi pfunaka n’wina loko munhu un’we a fela vanhu, ku ri leswaku rixaka hinkwaro ri lova xana?”

Xikwembu xi susumetele Kayafasi ku vula leswi, hikuva muapostola Yohane endzhakunyana u tsarile a ku: “[Kayafasi] u vule leswi ku nga ri hi ku tisungulela.” Leswi Kayafasi kahle-kahle a a swi vula a ku ri leswaku Yesu a a fanele ku dlayiwa ku N’wi sivela ku hambeta a tsongahata swikhundla swa vona swa vulawuri ni nkucetelo. Hambi swi ri tano, hi ku ya hi Yohane, ‘Kayafasi u vhumbe leswaku Yesu a nga fanelanga ku fela tiko ntsena, kambe leswaku vana va Xikwembu va ta hlengeletiwa.’ Kavula, i xikongomelo xa Xikwembu leswaku N’wana wa xona a fa tanihi nkutsulo eka hinkwavo.

Kayafasi manuku wa humelela leswaku a kucetela Sanedri ku endla makungu yo dlaya Yesu. Kambe Yesu, kumbexana hi ku byeriwa makungu lawa hi Nikodema, xirho xa Sanedri lexi n’wi tsakelaka, wa suka kwalaho. Yohane 11:38-54.

◆ Ha yini Yesu a khongela erivaleni emahlweni ko va a pfuxa Lazaro?

◆ Xana lava voneke ku pfuxiwa loku va ku langutisise ku yini?

◆ I yini lexi paluxaka vubihi bya swirho swa Sanedri?

◆ A xi ri xihi xikongomelo xa Kayafasi, kambe i yini lexi Xikwembu xi n’wi tirhiseke leswaku a xi profeta?