Hlayisa Ripfumelo Eka Xikwembu Na Kriste

Tinhla-nkulu Leti Humaka Eka Vakolosa

RIPFUMELO eka Yehova Xikwembu na Yesu Kriste i ra nkoka leswaku u ta pona. Kambe ku hlayisa ripfumelo ro tano i ntlhontlho. A swi ri tano eka Vakriste va le Kolosa, muti wa le vuxeni bya Efesa le Asia Minor. Hikwalaho ka yini? Hikuva kwalaho vadyondzisi va mavunwa a va ri ni ntshembo lowu hoxeke wa leswaku ku ponisiwa ku tisiwa hi ku yimba, leswi munhu a swi dyaka kun’we ni ku hlayisa mikhuva yo karhi.

Kutani ke, hi laha swi twisisekaka, muapostola Pawulo a a khumbeka hi xiyimo xa moya xa Vakriste va le Kolosa, naswona entiyisweni a a lava leswaku va tiyisa ripfumelo ra vona eka Xikwembu na Kriste. Kutani eku heleni ka ku khotsiwa ko sungula ka vaapostola le Rhoma (kwalomu ka 60-61 C.E.), u tsalele Vakolosa epapila leri kunguhateriweke ku lwisana ni mianakanyo leyi hoxeke ni ku aka ripfumelo ra vona. A hi languteni leswaku na hina hi nga pfunekisa ku yini eka marito yakwe ya rirhandzu.

Tlangela Xikhundlha Xa Kriste

Eku sunguleni ka papila rakwe, Pawulo u kombise ku tlangela xikhundla xa Yesu. (1:1–2:12) U bumabumele Vakolosa hi ripfumelo ra vona malunghana na Kriste ni rirhandzu ra vona ra vapfumeri-kulobye. Pawulo u kombise vukulukumba bya Kriste tanihi Loyi ha yena swilo swin’wana hinkwaswo swi tumbuluxiweke, Nhloko ya bandlha, ni mativula eka lava feke. Ndzivalelano ni Xikwembu wu hetisisiwe hi Kriste, loyi eka yena rifuwo hinkwaro ra vutlhari ni vutivi ri fihliweke kona. Hikwalaho ka leswi hinkwaswo, Vakriste va fanele ku hambeta va famba hi vun’we na Kriste naswona ku nga vi na munhu loyi a va phasaka hi dyondzo ya filosofi ya vanhu.

Ha Kriste, Xikwembu xi suse Nawu endleleni. (2:13-23) Wu gongondzeriwe hi ku fanekisela emhandzini leyi Yesu a feleke eka yona. Swilaveko swa Nawu a ko va “ndzhuti wa leswi nga ta ta, kambe nsinya wa swona i Kriste hi byakwe.” Hi ku tshembela eka Kriste, a va nge pfumeleli munhu a va hambukisa eka hakelo ya vona ya vutomi lebyi nga heriki ematilweni.

Tlangela Xikwembu Na Kriste

Pawulo u ya emahlweni a khongotela Vakolosa leswaku va ambala munhu lontshwa ni ku tinyiketela evulawurini bya Yesu Kriste. (3:1-17) Hi ku hlayisa miehleketo ya vona eka swilo leswi nga laha henhla, va ta va va rhangisa swilaveko swa moya evuton’wini. Leswi a swi lava ku vekela malangutelo ni ku vulavula loku hoxeke etlhelo. Mayana ku kateka loku a va ta va na kona loko vo tiambexa hi timfanelo to tanihi nsovo, ku titsongahata ni rirhandzu! Ku rhula ka Kriste a ku ta fuma etimbilwini ta vona loko a va endle hinkwaswo evitweni ra Yesu, ni ku nkhensa Xikwembu ha yena.

Ku tlangela Yehova Xikwembu na Yesu Kriste ku fanele ku tlhela ku kucetela vuxaka bya Mukriste ni van’wana. (3:18–4:18) Vavasati, vavanuna, vana, mahlonga swin’we ni vini, a va fanela ku hetisa mindzhwalo ya vona hi ku chava Xikwembu ni ku xiya Kriste. Vona ndlela leyi swi hlawulekeke ha kona swonghasi ku phikelela eku khongeleni ni ku famba hi vutlhari!

Papila ra Pawulo eka Vakolosa, ri nga hi pfuna ku papalata tidyondzo ta mavunwa leti nga hi tekelaka hakelo ya vutomi. Ku tshikilela ka muapostola ku tsundzuka vulawuri bya Yehova ni N’wana wakwe ku nga va ni nkucetelo lowunene eku tirhisaneni ka hina ni van’wana. Naswona hi tshembisiwa mikateko leyi fuweke loko hi hlayisa ripfumelo rerhu eka Xikwembu na Kriste.

[Bokisi/Xifaniso lexi nga eka tluka 26]

Papila ro ya eLawodikiya: “Loko papila leri ri hlayiwile exikarhi ka n’wina,” Pawulo a a tsalela Vakolosa, “vonani leswaku ri hlayiwa ni le [bandlheni ra] Lawodikiya, ni leswaku na n’wina mi hlaya papila leri humaka le Lawodikiya.” (Vakolosa 4:16) Lawodikiya a ku ri muti lowu fuweke le vuxeni bya Asia Minor, lowu hlanganisaka hi mapato ni miti yo fana na Filadelfiya na Efesa. Kumbexana, ntirho wa Pawulo le Efesa wu fikelele na Lawodikiya, hambi loko a nga chumayelanga kwalaho. U rhumele papila eka Vakriste va le Lawodikiya, hambi leswi vadyondzi van’wana va tshembaka leswaku a ku ri kopi ya papila leri a ri tsaleleke Vaefesa. Papila leri yaka eka Valawodikiya a ri kumuwi eBibele, kumbexana hi mhaka ya leswi a ri ri ni rungula leri hi nga ri laviki namuntlha, kumbe a a ri phindha tinhla leti hlanganisiweke kahle emapapileni man’wana lama amukeriwaka.

[Xifaniso]

Marhumbi eLawodikiya