Goza Ro Tlhelela

‘U VULAVULE na vona hi swifaniso.’ Xisweswo Bibele yi hi tivisa hi swifaniso swinharhu swa Yesu leswi tsundzukekaka swa tintswalo—xa nyimpfu leyi lahlekeke, cheleni leyi lahlekeke ni xa n’wana wa vusopfa.—Luka 15:3-32.

Swihloko swimbirhi leswi nga eka Xihondzo xo Rindza xa April 15, 1991, swi vulavule hi swifaniso sweswo naswona swi pfune vahlayi vo tala ku vona ndlela leyi tintswalo ti nga kombisiwaka ha yona namuntlha. Ku xiyisisiwe ngopfu varisi va moya eka ku endla matshalatshala yo vulavurisana ni vanhu lava tsemiweke, lava nga ha amukelaka maendzo lamanene. Vuyelo bya swihloko leswi ni tirhelo leri lerintshwa byi ve byihi?

Endzhakunyana ka loko magazini lowu wu humesiwile, wanuna un’wana edorobeni ra Washington, U.S.A., u tsarile: “Vumbhoni bya tintswalo letikulu ta rirhandzu ta Yehovha byi fikile hi poso ya mina namuntlha. Ndzi tshame laha ndzi ri ni mihloti ni ntsako embilwini ya mina hikwalaho ka malunghiselelo ni mindzulamiso leyi nyikeriwaka hi la nge Henhla-henhla. I Xikwembu xa vululami bya ntiyiso ntsena lexi xi nga pfunaka lava fanaka ni tinyimpfu lava lahlekeke. . . . Ina, ndzi tsemiwile kambe ndzi le ndleleni yo tlheriseriwa.” U thleriseriwe hi October.

Kambe ku vuriwa yini hi maendzo lama endliweke hi vakulu vambirhi va vandlha? Wansati un’wana wa Mukreste u tsarile: “Marito a ma swi koti ku hlamusela ndlela leyi ndzi titwaka ha yona. Nuna wa mina u tsemiwile ku ringana malembe ya 13. Vakulu va n’wi endzerile, hi laha swi ringanyetiweke ha kona exihlokweni. Matolo u yile eka yin’wana ya minhlangano ro sungula eka malembe yo tala. U ringeta ku hundzula vutomi bya yena a hlakarhela.”

Tanihi leswi valanguteri lava famba-fambaka va endzelaka mavandlha, va byi vona vuyelo lebyi. Mulanguteri un’wana wa xifundzha u tsarile sweswinyana:

“Loko Xihondzo xo Rindza xa April 15, 1991 xi humesiwa, vo tala va tivutisile leswaku n’wangulo wo va vakulu va vulavurisana ni vanhu lava wu ta va wihi. Nhlamulo yi ve erivaleni swinene.

“Exifundzheni xa hina, mavandlha ya mune lawa ndzi ma endzeleke ma vone vanhu va kaye lava tlheleleke eTiholweni ta Mfumo. Hambi leswi ku tlheriseriweke un’we ntsena, lavan’wana va nhungu va endla nhluvuko lowunene. Vakulu va vandlha va nyanyuriwa hi ku vona mihandzu ya ntirho wa vona ni vutlhari byo tirhisa minkongomiso ya swa le tilweni.

“Ha ri tsakela lunghiselelo leri lerinene ra tintswalo. Hi laha makwerhu un’wana wa xisati la tlheriseriweke a hlamuseleke ha kona, ‘A ndzi ri hava xivindzi xo tlhelela hi ndzexe, tanihi leswi a ndzi titwa ndzi soleka emahlweni ka Yehovha. Kambe loko ndzi endzeriwe hi vakulu, a ku ri xikhutazo lexi a ndzi xi lava leswaku ndzi tlhelela.’ Ku hiseka ka yena ku ri khutaze ngopfu vandlha.”

Hambi loko vo tala lava endzeriwaka va nga anguri, ku endliwa leswinene hi matshalatshala lawa ya tintswalo. Xisweswo, ku sukela hi September vakulu evandlheni rin’wana ni rin’wana va ta kamba mavito ya vanhu va le nsin’wini ya ka vona lava tsemiweke kutani va lunghiselela ku endzela hinkwavo lava va va vonaka onge va nga amukela tintswalo leti kombisiwaka.