Xiviko Xa Vahuweleri Va Mfumo

Mahungu Lamanene Ya Mfumo Ma Ta Twarisiwa

HI MALEMBE-XIDZANA, nala lonkulu wa Xikwembu, Sathana Diyavulosi, u tirhise tihulumendhe ta politiki ni vukhongeri bya mavunwa hi vutlharhi eka matshalatshala ya yena yo kavanyeta ku hangalasiwa ka Vukreste bya ntiyiso. Kambe maendlelo lawa ma ta tsandzeka. Yesu u vhumbe leswaku “mahungu . . . lamanene ya mfumo ma ta twarisiwa [ku nga ri leswaku “ma nga twarisiwa” kumbe, “ma nga ha twarisiwa”] emisaveni hinkwayo leyi akiweke leswaku byi va vumbhoni eka vanhu va matiko hinkwawo.”—Matewu 24:14, ringanisa NW.

Ku tsandzeka ka Sathana ku ve erivaleni eGreece. Etikweni rolero, Kereke ya Orthodox ya Magriki yi endle matshalatshala yo yirisa Timbhoni ta Yehovha eku chumayeleni mahungu lamanene ya Mfumo. Kambe, tanihi laha swi kombisiweke ha kona eka ntokoto lowu landzelaka, mintiyiso ya Bibele yi fikelela vanhu va timbilu to tshembeka hi nkarhi wa kona, ku nga khathariseki nkaneto.

Kwalomu ka malembe ya 30 lama hundzeke, muprista wa Orthodox ya Magriki u amukele mahungu lamanene ivi a phofula ni leswaku a a navela ku va un’wana wa Timbhoni ta Yehovha. Hambi swi ri tano, maxaka ya yena ma lwisane ni goza leri a ri tekeke ivi ma n’wi tshikilela leswaku a tshika ku hlanganyela ka yena ni Timbhoni. Leswaku a tsakisa ndyangu wa ka vona, u ye emahlweni ni ntirho-vutomi wa yena tanihi muprista; kambe, nkarhi hinkwawo a a swi xiya leswaku Timbhoni ta Yehovha ti n’wi pfune ku dyondza ntiyiso ni leswaku u wu tshikile hikwalaho ka xikhundla lexi tlakukeke evukhongerini bya mavunwa.

Hambi swi ri tano, nkarhi wun’wana a seketela Timbhoni ta Yehovha loko minkarhi yi n’wi pfulekela. Minkarhi yo tala a tsundzuxa vanhu leswaku loko va lava ku tiva mintiyiso ya Bibele, va fanele ku dyondza ni Timbhoni. Loko malembe ma ri karhi ma famba, van’wana va landzelele xitsundzuxo xa yena hi xiviri.

Ku nga ri khale muprista u sungule ku vabya ivi a swi xiya leswaku a nga ha fa hi xihatla. Loko a ri exibedlhele, u vitane vana va yena, ivi va hlengeletana hinkwavo etlhelo ka mubedo wa yena.a Kutani a va byela leswaku loko a fa, va nga ha hlangana na yena nakambe. U va byele hi dyondzo ya Bibele ya ku pfuxiwa ka vanhu hi Yehovha leswaku va hanya aparadeyisini emisaveni, kambe loko hakunene va swi lava ku vona sweswo swi endleka a va fanele ku dyondza ntiyiso eBibeleni naswona va tihambanyisa ni vukhongeri bya mavunwa. U va khutaze ku hlanganyela ni Timbhoni ta Yehovha kutani va dyondza ndlela yo va Vakreste va xiviri eka tona.

Endzhakunyana, muprista u file. Hambi swi ri tano, ndzayo ya yena yo lela yi ve ni vuyelo lebyinene eka vana va yena. N’wana wa yena wa xisati, ku fana ni maxaka ya yena layo tala, a a nga lavi ku twa nchumu hi Timbhoni ta Yehovha ni ntirho wa tona. Kambe a nga ta xi honisa xikombelo xa tata wa yena xa mbilu hinkwayo loko a fa, kutani hi xihatla u vonane ni Timbhoni ta Yehovha ivi a sungula ku dyondza Bibele. Wa ha ku va Mbhoni sweswinyana, a nyiketela vutomi bya yena eka Yehovha Xikwembu ni ku kombisa ku tinyiketela ka yena hi nkhuvulo wa mati.

Le Greece, kun’we ni le matikweni man’wana yo tlula 230, Timbhoni ta Yehovha ti titshega hi matimba ya moya lowo kwetsima wa Xikwembu. Va hlanganyela eku hetisekeni ka vuprofeta bya Yesu hikwalaho ka nseketelo lowukulu wa moya lowo kwetsima: “Mi ta nyikiwa matimba, siku Moya lowo Kwetsima wu taka ehenhla ka n’wina; kutani mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika emakun’wini ya misava.”—Mintirho 1:8.

[Nhlamuselo ya le hansi]