Ku Ka Mati ‘eXihlobyeni Xa Ku Enta’

XIVURISO xa le Bibeleni xi ri: “Makungu e mbilwini ya munhu i šihlov̌o ša ku enta, wa ku twisisa o tiv̌a ku ya ka šona.” (Swivuriso 20:5) Eminkarhini ya Bibele, a swi tika swinene ku kuma mati ku tlula leswi swi nga xiswona ematikweni yo tala namuntlha. Loko Yesu a vulavule ni wansati wa Musamariya, a a ri karhi a ka mati exihlobyeni xa Yakobo, xihlovo lexi a xi ente ku tlula 23 wa timitara!—Yohane 4:5-15.

Hilaha Swivuriso 20:5 yi kombisaka hakona, ku twisisa loku lavekaka ku humesa mianakanyo leyi enteke ni mintlhaveko leyi tshameke embilwini ya munhu ku fana swinene ni matshalatshala lama lavekaka leswaku u ka mati exihlobyeni. Leswi swi tano etimhakeni to tala ta vutomi. Hi xikombiso, kumbexana u tiva vanhu lava hlengeleteke rifuwo ra vutivi ni ntokoto ku ringana malembe yo tala. Loko vanhu lava va nga tali ku nyikela xitsundzuxo lexi nga komberiwangiki, u fanele ku va endla va vulavula. Hi ku kombisa ku va tsakela, u va vutisa swivutiso, naswona hi vutlhari u ya emahlweni u handzisisa, hi ndlela yo fanekisela, u ta va u nghenisa bakiti ra wena exihlobyeni xo enta xa vutlhari.

Xitsundzuxo xa Swivuriso 20:5 xa tirha ni le ndyangwini. Hakanyingi, vavasati va twiwa va ri karhi va ku: “Nuna wa mina a nga ndzi byeli ndlela leyi a titwaka ha yona!” Nuna a nga ha ku: “Nsati wa mina a nga ndzi vulavurisi!” Eswiyin’weni swo tano, ku laveka vutlhari leswaku u humesa mianakanyo leyi enteke embilwini ya munghana wa vukati. Swivutiso swa vutlhari swo tanihi leswi (Xana u ve ni siku ro tika? Ku humelele yini? Xana ndzi nga pfunisa ku yini?) hakanyingi swi sungula mbulavurisano wa ku phofulelana swa le mbilwini. Ku kombisa ku twisisa ko tano swi ta tiyisa xiboho xa vukati, leswi nga ta vuyerisa nuna na nsati.