Vana Ni Ripfumelo Eritweni Ra Xikwembu Ra Vuprofeta!

“Hi ni rito ra vuprofeta leri tiyisekisiweke swinene.”—2 PETRO 1:19.

1, 2. Hi byihi vuprofeta lebyi tsariweke ku sungula, naswona byi pfuxe xivutiso xihi?

YEHOVHA a a ri Xihlovo xa vuprofeta lebyi tsariweke ro sungula. Endzhaku ka ku dyoha ka Adamu na Evha, Xikwembu xi byele nyoka xi ku: “Ndzi ta veka vulala exikarhi ka wena ni wansati ni le xikarhi ka mbewu ya wena ni mbewu ya yena. Yi ta ku pfotlosa nhloko kutani wena u ta yi luma xirhendze.” (Genesa 3:1-7, 14, 15) A ku ta hundza madzana ya malembe marito wolawo ya vuprofeta ma nga si twisisiwa kahle.

² Vuprofeta byebyo byo sungula byi nyike vanhu lava dyoheke ntshembo wa xiviri. Endzhaku, Matsalwa ma vule leswaku Sathana Diyavulosi hi yena “nyoka ya khale.” (Nhlavutelo 12:9) Kambe, xana a yi ta va mani Mbewu leyi tshembisiweke hi Xikwembu?

Ku Lavisisa Mbewu

 3. Avele u ri kombise njhani ripfumelo eka vuprofeta byo sungula?

³ Ku hambana ni tata wakwe, Avele u ve ni ripfumelo eka vuprofeta byebyo byo sungula. Handle ko kanakana Avele u swi xiyile leswaku a ku fanele ku halatiwa ngati leswaku vanhu va rivaleriwa swidyoho. Hikwalaho, ripfumelo ri n’wi susumetele ku nyikela gandzelo ra xiharhi leri Xikwembu xi ri amukeleke. (Genesa 4:2-4) Kambe a swi nga si tiveka leswaku Mbewu leyi tshembisiweke i mani.

 4. Xikwembu xi n’wi tshembise yini Abrahama, naswona xitshembiso xa kona a xi kombisa yini malunghana ni Mbewu leyi tshembisiweke?

⁴ Endzhaku ka malembe ya kwalomu ka 2 000 Avele a file, Yehovha u byele kokwa wa hina Abrahama xitshembiso lexi xa vuprofeta lexi nge: “Hakunene ndzi ta ku katekisa ndzi tlhela ndzi andzisa mbewu ya wena ku fana ni tinyeleti ta matilo . . . Tinxaka hinkwato ta misava ti ta tikatekisa hi mbewu ya wena.” (Genesa 22:17, 18) Marito wolawo ma komba leswaku vuprofeta byo sungula a byi ta hetiseka hi ku tirhisa Abrahama. Ma swi veke erivaleni leswaku Mbewu leyi a yi ta tirhisiwa ku herisa mintirho ya Sathana a yi ta huma erixakeni ra Abrahama. (1 Yohane 3:8) “Hikwalaho ka xitshembiso xa Xikwembu, [Abrahama] a nga tsekatsekanga hi ku pfumala ripfumelo,” ni timbhoni tin’wana ta Yehovha ta le mahlweni ka Vukreste leti ‘nga ku kumangiki ku hetiseka ka xitshembiso’ na tona a ti tsekatsekanga. (Varhoma 4:20, 21; Vaheveru 11:39) Ku ri na sweswo, ti hambete ti va ni ripfumelo eritweni ra Xikwembu ra vuprofeta.

 5. Xitshembiso xa Xikwembu xa Mbewu xi hetiseke eka mani, naswona ha yini u hlamula hi ndlela yoleyo?

⁵ Muapostola Pawulo u hlamusele Mbewu leyi Xikwembu xi yi tshembiseke loko a tsala a ku: “Switshembiso swi vuriwe eka Abrahama ni le ka mbewu yakwe. Rito a ri vuli leswaku: ‘Ni le ka timbewu,’ onge hiloko ri vula to tala, kambe tanihi le ka yin’we: ‘Ni le ka mbewu ya wena,’ ku nga Kreste.” (Vagalatiya 3:16) Mbewu leyi matiko a ma ta tikatekisa ha yona a yi nga ta huma eka vatukulu hinkwavo va Abrahama. Vana va n’wana wa yena Iximayele swin’we ni vana va yena lava a va kumeke na Ketura a va tirhisiwanga leswaku ku katekisiwa vanhu. Mbewu leyi katekisaka yi hume eka n’wana wa yena Isaka swin’we ni le ka ntukulu wa yena Yakobe. (Genesa 21:12; 25:23, 31-34; 27:18-29, 37; 28:14) Yakobe u kombise leswaku “vanhu” a va ta yingisa Xilo wa rixaka ra Yuda, kambe endzhakunyana Mbewu a yi ta huma enxaxamelweni wa Davhida. (Genesa 49:10; 2 Samuwele 7:12-16) Vayuda va lembe-xidzana ro sungula a va langutele leswaku ku ta munhu un’we, la nga ta va Mesiya kumbe Kreste. (Yohane 7:41, 42) Kutani vuprofeta bya Xikwembu bya Mbewu byi hetiseke eka N’wana wa yena, Yesu Kreste.

Ku Humelela Ka Mesiya!

 6. (a) Xana hi fanele hi byi twisisa njhani vuprofeta bya mavhiki ya 70? (b) Yesu u ‘hete xidyoho’ rini naswona njhani?

⁶ Muprofeta Daniyele u tsale vuprofeta bya nkoka lebyi vulavulaka hi Mesiya. Eka lembe ro sungula ra ku fuma ka Dariyosi wa Mumeda, u swi xiyile leswaku malembe ya 70 ya ku onheteriwa ka Yerusalema a ma ri kusuhi ni ku hela. (Yeremiya 29:10; Daniyele 9:1-4) Loko Daniyele a ha ri eku khongeleni, ntsumi Gabriyele yi tile ivi yi n’wi hlavutela leswaku ‘mavhiki ya 70 ma vekeriwe ku heta xidyoho.’ Mesiya u ta dlayiwa exikarhi ka vhiki ra vu-70. “Mavhiki ya malembe ya 70” ma sungule hi 455 B.C.E., loko Hosi Atazekiseki wo Sungula wa le Peresiya ‘a rhumele rito ra leswaku Yerusalema wu pfuxetiwa.’ (Daniyele 9:20-27; Moffatt; Nehemiya 2:1-8) Mesiya a a ta ta endzhaku ka mavhiki ya nkombo ma hlangane ni mavhiki ya 62. Malembe lawa ya 483 ma sungule hi 455 B.C.E., ku ya fikela hi 29 C.E., loko Yesu a khuvuriwa naswona Xikwembu xi n’wi tota leswaku a va Mesiya kumbe Kreste. (Luka 3:21, 22) Yesu u ‘hete xidyoho’ hi ku nyikela vutomi bya yena byi va nkutsulo hi 33 C.E. (Marka 10:45) Mawaku swivangelo leswi twalaka swo va ni ripfumelo eka rito ra Xikwembu ra vuprofeta!a

 7. Hi ku tirhisa Matsalwa, kombisa ndlela leyi ha yona Yesu a hetisiseke vuprofeta lebyi vulavulaka hi Mesiya.

⁷ Ku pfumela eritweni ra Xikwembu ra vuprofeta swi endla leswaku hi kota ku tiva Mesiya. Eka vuprofeta byo tala lebyi vulavulaka hi Mesiya lebyi tsariweke eMatsalweni ya Xiheveru, byo tala bya byona a byi kombetela eka Yesu hi ku kongoma hi vatsari va Matsalwa ya Vukreste ya Xigriki. Hi xikombiso: Yesu u velekiwe hi wanhwana eBetlehema. (Esaya 7:14; Mikiya 5:2; Matewu 1:18-23; Luka 2:4-11) U vitaniwe a huma aEgipta, naswona swihlangi swi dlayiwile endzhaku ka ku velekiwa ka yena. (Yeremiya 31:15; Hosiya 11:1; Matewu 2:13-18) Yesu u rhwale mavabyi ya hina. (Esaya 53:4; Matewu 8:16, 17) Hilaha ku profetiweke hakona, u nghene eYerusalema a khandziye ximbhongolwana. (Zakariya 9:9; Yohane 12:12-15) Marito ya mupisalema ma hetiseke endzhaku ka ku beleriwa ka Yesu, loko masocha ma avelane tinguvu ta yena ivi ma hlahluva hi vuhlolotwana malunghana ni nguvu ya yena ya le ndzeni. (Pisalema 22:18; Yohane 19:23, 24) Mhaka ya leswaku marhambu ya Yesu a ma tshoviwanga ni ya leswaku u tlhaviwile, na yona a yi hetisisa vuprofeta. (Pisalema 34:20; Zakariya 12:10; Yohane 19:33-37) Leswi ko va swikombiso swi nga ri swingani swa vuprofeta lebyi vulavulaka hi Mesiya, lebyi boxiweke hi vatsari va Bibele lava huhuteriweke hi Xikwembu, va kombetela eka Yesu.b

Dzunisani Hosi Ya Vumesiya!

 8. I mani Nkulukumba wa Masiku, naswona xana vuprofeta lebyi tsariweke eka Daniyele 7:9-14 byi hetiseke njhani?

⁸ Hi lembe ro sungula ra ku fuma ka Hosi Belxatsara wa le Babilona, Yehovha u kombe muprofeta wa yena Daniyele norho ni swivono leswi hlamarisaka. Muprofeta u rhange a vona swivandzana swa mune leswikulu. Ntsumi ya Xikwembu yi swi hlamusele tanihi “tihosi ta mune,” xisweswo yi kombisa leswaku swi fanekisela mimfumo ya misava leyi nga ta landzelana. (Daniyele 7:1-8, 17) Endzhaku ka sweswo Daniyele u vone Yehovha, “Nkulukumba wa Masiku,” a tshame exiluvelweni lexi vangamaka. U avanyisa swivandzana hi ndlela yo vava, a swi tekela vuhosi ivi a herisa xivandzana xa vumune. Kutani vuhosi lebyi nga heriki ehenhla ka “vanhu, vanhu va matiko ni tindzimi hinkwato” byi nyikiwa “loyi a fanaka ni n’wana wa munhu.” (Daniyele 7:9-14) Mawaku vuprofeta lebyi tsakisaka, lebyi hlamuselaka hi ku vekiwa ka “N’wana wa munhu” Yesu Kreste exiluvelweni, etilweni hi lembe ra 1914!—Matewu 16:13.

9, 10. (a) Swiyenge swo hambana-hambana swa xifaniso xa le norhweni a swi kombetela eka yini? (b) U nga ku hlamusela njhani ku hetiseka ka Daniyele 2:44?

⁹ Daniyele a a swi tiva leswaku Xikwembu “xi susa tihosi ni ku veka tihosi.” (Daniyele 2:21) Hi ku va ni ripfumelo eka Yehovha, “Muhlavuteri wa swihundla,” muprofeta u paluxe nhlamuselo ya norho wa xifaniso lexikulu, wa Hosi Nebukadnetsara wa le Babilona. Swiyenge swa xona swo hambana-hambana a swi kombetela eka ku yima ni ku wa ka mimfumo ya misava yo tanihi Babilona, Meda-Peresiya, Grikiya na Rhoma. Xikwembu xi tlhele xi tirhisa Daniyele leswaku a xaxameta swiendlakalo swa misava ku ta fikela enkarhini wa hina ni le ndzhaku ka wona.—Daniyele 2:24-30.

¹⁰ Vuprofeta bya kona byi ri: “Emasikwini ya tihosi teto Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.” (Daniyele 2:44) Loko “nkarhi lowu vekiweke wa matiko” wu hela hi 1914, Xikwembu xi simeke Mfumo wa le tilweni ehansi ka Kreste. (Luka 21:24; Nhlavutelo 12:1-5) Hi ku tirhisa matimba ya Xikwembu “ribye” ra Mfumo wa Vumesiya ri susiwile hi nkarhi wolowo eka “ntshava” ya vuhosi bya Xikwembu, bya misava hinkwayo. Ribye rolero ri ta hlasela xifaniso xexo eArmagedoni ivi ri xi sila xi va mapa. Mfumo wa Vumesiya wu ta tshama hilaha ku nga heriki, ku fana ni ntshava leyi nga hulumendhe leyi funengetaka “misava hinkwayo.”—Daniyele 2:35, 45; Nhlavutelo 16:14, 16.c

 11. Ku hundzuriwa ka Yesu a ku ri xikombiso xa yini, naswona xivono xolexo xi ve ni vuyelo byihi eka Petro?

¹¹ Loko Yesu a ri karhi a anakanya hi ku fuma eMfun’weni wakwe, u byele vadyondzisiwa va yena a ku: “Ku ni van’wana lava yimeke laha lava nga ta ka va nga ri nantswi rifu nikatsongo va nga si rhanga va vona N’wana wa munhu a ta emfun’weni wakwe.” (Matewu 16:28) Endzhaku ka masiku ya tsevu, Yesu u fambe na Petro, Yakobo na Yohane entshaveni leyi tlakukeke laha a fikeke a hundzuriwa emahlweni ka vona. Loko papa leri vangamaka ri funengeta vaapostola, Xikwembu xi te: “Loyi i N’wananga, la rhandzekaka, loyi ndzi n’wi amukeleke; n’wi yingiseni.” (Matewu 17:1-9; Marka 9:1-9) Mawaku lunghelo ro vona ku vangamisiwa ka Mfumo wa Kreste! A swi hlamarisi leswi Petro a vulavuleke hi xivono xolexo lexi hlamarisaka a ku: “Xisweswo hi ni rito ra vuprofeta leri tiyisekisiweke swinene.”—2 Petro 1:16-19.d

 12. Ha yini lowu wu ri nkarhi wo hlawuleka wo kombisa ripfumelo ra hina eritweni ra Xikwembu ra vuprofeta?

¹² Handle ko kanakana, “rito ra vuprofeta” a hi vuprofeta lebyi nga eMatsalweni ya Xiheveru ntsena lebyi vulavulaka hi Mesiya, kambe ni marito ya Yesu ya leswaku u ta ta “hi matimba ni ku vangama lokukulu.” (Matewu 24:30) Ku hundzuriwa ku tiyise rito ra vuprofeta, leri vulavulaka hi ku ta ka Kreste loku vangamaka ematimbeni ya Mfumo. Ku nga ri khale ngopfu, ku humelela ka yena loku vangamaka ku ta vula ku lovisiwa ka vanhu lava nga riki na ripfumelo kasi eka lava kombisaka ripfumelo ku ta vula mikateko. (2 Vatesalonika 1:6-10) Ku hetiseka ka vuprofeta bya Bibele ku kombisa leswaku lawa i ‘masiku yo hetelela.’ (2 Timotiya 3:1-5, 16, 17; Matewu 24:3-14) Tanihi Mulovisi Lonkulu la vekiweke hi Yehovha, Mikayele, loyi ku nga Yesu Kreste, u lunghekele ku herisa mafambiselo lawa yo biha ya swilo hi nkarhi wa “nhlomulo lowukulu.” (Matewu 24:21; Daniyele 12:1) Kutani, lowu hakunene i nkarhi wo kombisa leswaku hi ni ripfumelo eritweni ra Xikwembu ra vuprofeta.

Tshama U Ri Ni Ripfumelo eRitweni Ra Xikwembu Ra Vuprofeta

 13. I yini lexi nga hi pfunaka leswaku hi ya emahlweni hi rhandza Xikwembu ni ku endla leswaku ripfumelo ra hina eritweni ra xona ri tshama ri hanya?

¹³ Entiyisweni a hi tsakile loko hi dyondza ro sungula hi ku hetiseka ka rito ra Xikwembu ra vuprofeta. Kambe ku sukela hi nkarhi wolowo, xana ripfumelo ra hina se ri hungutekile ni rirhandzu ra hina se ri horile? Hi nga tshuki hi fana ni Vakreste va le Efesa lava ‘lahleke rirhandzu leri a va ri na rona eku sunguleni.’ (Nhlavutelo 2:1-4) Ku nga khathariseki leswaku se hi ni nkarhi wo tanihi kwihi hi tirhela Yehovha, hi nga weriwa hi khombo rolero handle ka loko hi ‘hambeta hi lava mfumo wa Xikwembu ni ku lulama ka xona ku sungula’ ivi hi tihlayisela xuma etilweni. (Matewu 6:19-21, 31-33) Ku dyondza Bibele hi ku hiseka, ku hlanganyela nkarhi ni nkarhi eminhlanganweni ya Vukreste ni le ntirhweni wo chumayela hi Mfumo hi ku hiseka, swi ta hi pfuna leswaku hi ya emahlweni hi rhandza Yehovha, N’wana wa yena swin’we ni Matsalwa. (Pisalema 119:105; Marka 13:10; Vaheveru 10:24, 25) Kutani, leswi swi ta endla leswaku ripfumelo ra hina eritweni ra Xikwembu ri tshama ri hanya.—Pisalema 106:12.

 14. Xana Vakreste lava totiweke va hakeriwa njhani hikwalaho ka ripfumelo ra vona eka rito ra Yehovha ra vuprofeta?

¹⁴ Tanihi leswi rito ra Xikwembu ra vuprofeta ri hetisekeke enkarhini lowu hundzeke, hi nga swi tshemba leswi ri swi profetaka malunghana ni nkarhi lowu taka. Hi xikombiso, vukona bya Kreste sweswi eku vangameni ka Mfumo i nchumu wa xiviri, naswona Vakreste lava totiweke lava tshembekeke ku fikela loko va fa, se va ku vonile ku hetiseka ka xitshembiso xa vuprofeta lexi nge: “Loyi a hlulaka ndzi ta n’wi pfumelela ku dya emurhini wa vutomi, lowu nga eparadeyisini ya Xikwembu.” (Nhlavutelo 2:7, 10; 1 Vatesalonika 4:14-17) Yesu u nyika vanhu lava hluleke lunghelo ra “ku dya emurhini wa vutomi” “eparadeyisini ya Xikwembu” ya le tilweni. Eku pfuxiweni ka vona naswona hikwalaho ka Yesu Kreste, va kuma xiyimo xa ku nga fi ni ku nga onhaki lexi va xi nyikiwaka hi Yehovha, “Hosi leyi nga riki na makumu, leyi nga onhakiki, leyi nga vonakiki, leyi nga Xikwembu xi ri xoxe.” (1 Timotiya 1:17; 1 Vakorinto 15:50-54; 2 Timotiya 1:10) Mawaku hakelo leyikulu swonghasi leyi va yi kumaka hikwalaho ko rhandza ka vona Xikwembu hilaha ku nga heriki ni hikwalaho ka ripfumelo ra vona leri nga tsekatsekiki eka rito ra xona ra vuprofeta!

 15. Xisekelo xa “misava leyintshwa” xi vekiwe eka vamani, naswona i vamani vanakulobye va vona?

¹⁵ Endzhakunyana ka ku va vatotiwa lava tshembekaka va pfuxeriwe “eparadeyisini ya Xikwembu” ya le tilweni, masalela ya Israyele wa moya ya laha misaveni ma ntshunxiwile eka “Babilona Lonkulu,” mfumo wa misava wa vukhongeri bya mavunwa. (Nhlavutelo 14:8; Vagalatiya 6:16) Va ve xisekelo xa “misava leyintshwa.” (Nhlavutelo 21:1) “Tiko” ri velekiwile, naswona ri akiwe ri va paradeyisi ya moya leyi nga kona emisaveni hinkwayo namuntlha. (Esaya 66:8) Vunyingi bya vanakulobye va Israyele wa moya lava fanaka ni tinyimpfu byi khitikanela eka yona sweswi, “exiphen’wini xo hetelela xa masiku.”—Esaya 2:2-4; Zakariya 8:23; Yohane 10:16; Nhlavutelo 7:9.

Rito Ra Xikwembu Ra Vuprofeta Ri Vulavule Ka Ha Ri eMahlweni Hi Vumundzuku Bya Vanhu

 16. Lava va seketelaka vatotiwa hi ku tshembeka va langutele yini?

¹⁶ Lava va seketelaka vatotiwa hi ku tshembeka va langutele yini? Na vona va ni ripfumelo eritweni ra Xikwembu ra vuprofeta, naswona ntshembo wa vona i wa ku nghena eParadeyisini ya laha misaveni. (Luka 23:39-43) Eka yona va ta nwa eka “nambu wa mati ya vutomi” lama hlayisaka vutomi naswona va ta horisiwa hi “matluka ya mirhi” leyi byariweke ematlhelo ka nambu lowu. (Nhlavutelo 22:1, 2) Loko u ri ni ntshembo wo tano lowu hlamarisaka, onge u nga hambeta u kombisa ku rhandza Yehovha hilaha ku enteke u tlhela u va ni ripfumelo eka rito ra yena ra vuprofeta. Onge u nga va un’wana wa lava nga ta kuma ntsako lowukulu ngopfu wa vutomi lebyi nga heriki emisaveni leyi nga Paradeyisi.

 17. Vutomi eParadeyisini ya laha misaveni byi ta katsa mikateko yihi?

¹⁷ Vanhu lava nga hetisekangiki a va swi koti ku hlamusela vutomi lebyi nga ta va kona eParadeyisini leyi taka ya laha misaveni, kambe rito ra Xikwembu ra vuprofeta ri hi byela mikateko leyi vekeriweke vanhu lava yingisaka. Loko Mfumo wa Xikwembu se wu fuma wu nga kanetiwi hi nchumu naswona ku rhandza ka xona se ku endliwa emisaveni tanihi loko ku endliwa etilweni, a ku na vanhu va tihanyi—hambi ku ri swiharhi—lava nga ta “endl[a] swo biha kumbe ku onha.” (Esaya 11:9; Matewu 6:9, 10) Lavo rhula va ta tshama emisaveni, naswona “va ta kuma ntsako lowu heleleke eku rhuleni lokukulu.” (Pisalema 37:11) A ku nge vi na mintshungu ya vanhu lava sikaka, hikuva “ku ta va ni mavele yo tala emisaveni; ma ta khapakhapa etinhlohlorhini ta tintshava.” (Pisalema 72:16) Vanhu a va nge he rili hi ku twa ku vava. Vuvabyi byi ta va byi nga ha ri kona, ni rifu ri ta va ri nga ha ri kona. (Esaya 33:24; Nhlavutelo 21:4) Anakanya—ku nga ha ri na madokodela, mirhi, swibedlhele kumbe tindhawu to pfuna vanhu lava karhatekeke emianakanyweni ni swilahlo. Mawaku ntshembo lowu vangamaka swonghasi!

 18. (a) Xana Daniyele u nyikiwe xitiyisekiso xihi? (b) Xi ta va xihi “xiavelo” xa Daniyele?

¹⁸ Hambi ku ri masirha lama tolovelekeke ya vanhu ma ta sala ma nga ha ri na nchumu loko ku fa ku siviwa hi ku pfuxiwa ka vafi. Wanuna wo lulama Yobo a a ri ni ntshembo wo tano. (Yobo 14:14, 15) Na muprofeta Daniyele a a ri ni ntshembo wo tano, hikuva ntsumi ya Yehovha yi n’wi nyike xitiyisekiso lexi chavelelaka lexi nge: “Loko ku ri wena, yana emakumu; u ta wisa, kambe u ta yima u kuma xiavelo xa wena eku heleni ka masiku.” (Daniyele 12:13) Daniyele u tirhele Xikwembu hi ku tshembeka kukondza a fa. Sweswi u wisile eku feni, kambe u ta “yima” eku “pfuxiweni ka lava lulameke” enkarhini wa Ku Fuma ka Gidi ra Malembe ka Kreste. (Luka 14:14) Xi ta va xihi “xiavelo” xa Daniyele? Eka ku hetiseka ka byona ka le Paradeyisini, vuprofeta bya Ezekiyele byi kombisa leswaku vanhu hinkwavo va Yehovha va ta va ni ndhawu, ni tiko ri ta aviwa handle ko ya hi nghohe ni hi ndlela leyi hlelekeke. (Ezekiyele 47:13–48:35) Kutani Daniyele u ta va ni ndhawu eParadeyisini, kambe xiavelo xa yena a ku nge vi tiko ntsena. Xi ta katsa ndhawu ya yena exikongomelweni xa Yehovha.

 19. Leswaku u ta hanya eParadeyisini ya laha misaveni ku laveka yini?

¹⁹ Ku vuriwa yini hi wena ni xiavelo xa wena? Loko u ri ni ripfumelo eRitweni ra Xikwembu, ku nga Bibele, a swi kanakanisi leswaku u navela ku hanya eParadeyisini ya laha misaveni. Swi nga ha endleka u tianakanya u ri kwalaho, u tiphina hi mikateko ya yona yo tala, u khathalela misava naswona hi ntsako u ri karhi u amukela lava a va file. Phela, vanhu va fanele va hanya eParadeyisini. Xikwembu xi vumbe vanhu vambirhi vo sungula leswaku va hanya endhawini yo tano. (Genesa 2:7-9) Naswona xi lava leswaku vanhu lava yingisaka va hanya hi masiku eParadeyisini. Xana u ta endla hi ku pfumelelana ni Matsalwa leswaku u ta va exikarhi ka vanhu va magidi ya timiliyoni lava eku heteleleni va nga ta hanya emisaveni leyi nga Paradeyisi? U nga va kona loko wo rhandza Tata wa hina wa le tilweni, Yehovha, hi mbilu hinkwayo naswona u ri ni ripfumelo leri tiyeke eritweni ra Xikwembu ra vuprofeta.

[Tinhlamuselo ta le hansi]

A Wu Ta Hlamurisa Ku Yini?

• I vuprofeta byihi lebyi vuriweke ku sungula, naswona a ku ri mani Mbewu leyi tshembisiweke?

• Hi byihi vuprofeta byin’wana lebyi hetisekeke eka Yesu, malunghana na Mesiya?

• Daniyele 2:44, 45 yi ta hetiseka hi ndlela yihi?

• Rito ra Xikwembu ra vuprofeta ri ri byi ta va njhani vumundzuku bya vanhu lava yingisaka?

[Xifaniso lexi nga eka tluka 18]

Xana u ni ntshembo wa ku hanya eParadeyisini ya laha misaveni?